Thawngpang tha tuk asi: Kawlram mi harsa bawmhnak caah Japan Cozah nih WFP sin ah Dollar 4 Million a pek

Kawlram mi harsa bawmhnak caah Japan Cozah nih WFP sin ah Dollar 4 Million a pek

Kawlram ah Ei le din a harmi chungkhar hna caah Japan nih WFP sinah bawmhnak a pek mi cung ah WFP nih lunglawmhnak tampi kan ngei. Mah bawmhnak hi Yangon ramkulh ah a um mi Minung Sing 6 le Eidin a har mi chungkhar hna kuat ah kan pek lai tiah WFP website nih a langhter.

Mah bawmhnak hi Kawlram Khuapi Area chung Sifak cem mi pengkhulh chung um minung Nuai 2 caah WFP bawmhnak cheukhat a si.

Hi bawmhnak he May 13 ni ah Yangon, Hlaingthaya pengkulh in thawk a si. Kawlram ah Eidin harsatnak an ton lo nak ding caah WFP a zuamnak cungah Japan nih tha a kan pek. Japan Mipi bawmhnak hi Kawlram khuapi le khuapi pawngkam sifak mi hna kut ah pek ding a si lai.

Japan Cozah Kawlram palai Ichiro Maruyama nih “Kawlram chung eidin harsatnak sihnalh dingin WFP nih hmalak nak cungah Japan cozah nih kan kilhkamh, WFP cawlcanghnak thawngin Japan Mipi sinin bawmhnak cu Kawlram mipi sinah a phan cang lai. Japan Mipi le Cozah nih Kawlram Mipi he kan dir ti peng ko lai” tiah a chim.

Kawlram ah rambuainak le Covid-19 ruangah a ra lai mi thla 6 chungah Mipi 3.4 Million (Abikin khua lei um mi) cu ei le din harsatnak an tong kho men tiah WFP nih an ruah mi a si.

WFP nih tukum hramthawk ah khan Chin, Kachin, Shan le Arakkhan ramkulh chung buainak nak ruangah ralzam hna bawmhnak caah Japan Cozah nih January thla ah US Dollar 4.7 Million, March thla ah $ 3 Million cu WFP sinah a rak pek bal cang.

The Chin Post