Kahdohnak Thawngpang Fong!
========================
Mon ramkulh, Ye in Tanphyuzayat(သံဖြူဇရပ်) lei ah a kalmi SAC ralkap motor ruun cu kahdoh an ton caah, SAC ralkap 10 nak tlawmlo an thi, motor 2 a rawk tiah Taungnyo(တောင်ညို) pah-kah-phah nih nihin October 16 ah cathanh an chuah.
October 15, zaanlei ah SAC ralkap motor ruun 7 cu Ye in Tanphyuzayat(သံဖြူဇရပ်) lei a kallio Pinnaytaw(ပိန္နဲတော) khua le Thayaraye(သာယာအေး) khua kar ah Taungnyo(တောင်ညို) pah-kah-phah nih a thli in an kahdoh hna caah SAC ralkap 10 nak tam an thih i, motor 2 zong a rawk hi a si. Cu SAC ralkap hna cu a luancia October 1 lio zong ah Tanphyuzayat(သံဖြူဇရပ်) in Ye lei ah motor ruun 10 he an kallio ah, a thli in kahdoh an tong i SAC ralkap 10 nak tam an rak thi, motor pakhat hrawhpiak an rak tongcang tiah theih a si.
Tanintharyi ramṭhen, Launglon pengchung Kathaungni(ကထောင်းနီရွာ) khua lampi ah hriamtlai pyusawhṭi phu chungtel pakhat simi Htun Naing cu October 15, zaanlei suimilam 5:00 hrawng ah tualchung hriamtlai phu nih an kah caah a thi tiah Launglon PDF nih an chim. A thimi pyusawhṭi sin in meithal pakhat, tuknak fung pakhat, WY rithaisi tlang 24, phome 2 le phaisa 3000ks kan laak tiah LLPDF nih an langhter.
Cun Mon ramkulh, Bilin peng Daukyat(ဒေါက်ရပ်) khua pawngah October 15 chunhnu suimilam 3:30 hrawng ah KyaitHto in Thaton lei ah a kalmi SAC ralkap motor ruun 14 cu KLNLA phufonh noh bomb puahhnawh in an kahdoh hna caah SAC ralkap 10 nak tlawmlo an thi tiah theih a si. Tanintharyi ramṭhen Htawai peng ah rallam sialtu SAC ralkap hna cu bomb puahhnawh in kahdoh an ton caah SAC ralkap 5 an thi tiah theih a si.
SAC ralkap hna cu October 15, zinglei suimilam 4:10 hrawng ah Htawai pah-kah-phah DDT phu nih meng 8 gate le Uyinkyi(ဥယျာဥ်ကြီး) khua pawng ah an kahdoh hna. Kaphnih kar i kahdohnak a chuah hnu ah SAC ralkap 5 an thi, hliamhma tuar an tam. Hliamhma tuarmi ralkap hna cu meng 8 gate ah an kirpi hna i, a taangmi SAC ralkap nih cun khuate cheukhat um khuami hna cu ralphaw caah an tlaih hna tiah theih a si. Kaphnih kar kahdohnak ngol a si hnu ah tualchung hriamtlai phu hna nih October 16, zinglei ah hmunhma thianhhlimhnak an tuah i 60mm hriamngan lung hnih, M-16 kuan 74 le kuan bawm tampi an lak.
SAC ralkap kuttang rianṭuan sniper tlaitu ralkap Zam Chan Dawl(kum 27) cu CDF/CDM-Siyin sin ah CDM a tuah tiah theih a si. Zam Chan Dawl(private number ṭah-ṭah- 540719) cu 2015 in ralkap ah a rak lut i Meiktila ah sniper tlaitu ralkap pakhat a si. SAC ralkap nih hranhram uknak an lak ruang ah 2022, October 7 ah SAC ralkap rianṭuannak cu kaltak in CDM cawlcanghnak a tuah tiah CDF/CDM-Siyin nih October 15 ah cathanh an chuah.
Zam Chan Dawl cu SAC ralkap thilsual tuahmi cung ah a lungtlin tilo caah cu rianṭuannak a kaltaknak hi a si. Cun SAC ralkap kuttang um rianṭuantu hna nih ram le miphun dawt le kilven nan duh a si ah cun nan mah he ai naihnak PDF sin ah a rannak in CDM tuahcio uh tiah CDF/CDM-Siyin nih an thanhmi ah cun an langhter chih. Crd-The Chin Post
Relchap, SAC Ralkap Nih Pauk Peng Taungmyint Khua Sianginn An Khangh Pinah Mipi Volpamhnak Ca An Ṭial Ta, Magway ramṭhen Pauk peng Taungmyint khua siangin cun SAC ralkap nih an khangh tiah Shwetaungmae tualchung hriamtlai phu sin in theih a si. SAC ralkap nih Taungmyint khua sianginn le cozah ruanṭuan pawl ca sakmi inn pinah tualchungmi cycle pawl cu October ni 16 zaanlei ah an khangh, cun tualchungmi hna volhpamhnak ca zong an tar tiah theih a si.
SAC ralkap nih kan rampi an hrawh lawng si lo in ngakchia hna an hmailei tinhmi zong an hrawh dih, cu lawng si lo in volhpamhnak ca zong an tar chap rih, cucaah an rak kir ngam ah cun ra hna seh kan hngah hna lai tiah Shwetaungmae tualchung hriamtlaiphu pakhat in ṭuanvo ngeitu pakhat nih a chim.
Chaung U Peng Ah SAC Ralkap Nih Inn 300 Leng An Khangh, Tualchung Mi 4 Thah An Tong, Sagaing ramṭhen, Chaung U peng khua 4 cu SAC ralkap nih a khuapi ning ngawt in an khanghpiak hna caah inn 300 leng vutcaam ah a cang tiah tualchung mi nih an chim.
SAC ralkap hna nih October 15, ah Hmancho(မှန်ချို) khua, Mahṭita(မထိသာ) khua, Ngalungṭin(ငါးလုံးတင်) khua le Sinpay(ဆင်ပြေ) khua hna cu a khuapi ning in an khanghpiak hna caah tualchung mi 8000 leng cu a himnak hmun ah an i dor hna tiah theih a si.
Ngalungṭin(ငါးလုံးတင်) khua cu SAC ralkap nih an luhhnawh hna lio ah tualchung mi 3 cu meikhangh buin an thah hna, cun midang pakhat zong an tlaih i an thah, an thahmi cu meizei a si zong an fehter kho rihlo tiah theih a si. October 15, zinglei ah Mahṭita(မထိသာ) khua a khangtu SAC ralkap le tualchung hriamtlai phu kar kahdohnak a chuak. Kaphnih kar i kahdonhnak ruang ah SAC hmanmi hriamngan ruang ah PDF 4 an nunnak a liam tiah theih a si.
Malaysia Ah Chin Miphun Pakhat Misual Kut In A Nunnak A Liam, Malaysia ah Cameron Highland (ကင်မရွန်ဟိုက်လဲန်း ) cinthlaknak dumah rianṭuanmi Mindat peng Kyalayhlaing (ကြာလေလှိုင်း) khuami Salai Aung Thang cu misual pawl nih an thah tiah theih a si. October ni 14 zaan ah misual pawl nih a tubantuk in a thilri an fir piak hnu ah an thah hi a si. Aluancia september ni 15 zongah Malaysia ram Cameron Highland ṭhiam ah Mindatpa pakhat thah a rak tongbal cang tiah theih a si.
Gangaw Pengkomh Chungah A Voi 6 Nak Drone Training An Tuah , Gangaw pengkomh chung ah a voi 6 nak drone training cu HUF hriamtlai phu hruainak in tlamtling tein an tuah khawh cang tiah theih a si. Yaw hmunhma chung tualchung hriamtlai phu simi CDF-KKG, Gangaw thlanglei PDF, PDF(Gangaw), le PDF (Htilin) ralkap hna an i tel tiah theih a si.
Hakha Pengkomh Meithat Zung Ah Kahdohnak A Chuak, Palik Pakhat A Thi I Meithat Motor Pahnih A Kaang, Chin ramkulh, Hakha thar Hakha pengkomh meithat zung ah kahdohnak a chuak i palik khat a thi, meithat motor pahnih a kaang, tiah theih a si. Tualchung mi pakhat nih, “Zahan October 14 zan sml 12:00 hrawngah Hakha thar um meithat zung ah kahdohnak a chuak. Zanṭim hnu a si caah kan lau ngaingai. Anmah le anmah maw an i kah hnga timi tucu kan hngal lo,” tiah a chim.
Nihin October 15 zinglei ah SAC ralkap pawl cu motor khat in meithat zung lei ah an kal. Meithat motor pahnih a kaangmi zong kan hmuh, tiah mithmutu pakhat nih The Chin Post ah a chim. Meithat zung kahdohnak ah Chin ralkap nih maw an kah hna asilole anmah le anmah an i kah dik a si, palik pakhat cu a thi, tiah min langhter a duh lomi pakhat nih a chim. Crd- The Chin Post
Mekong Tiva Ah Tilawng Pakhat A Pil Caah Siangakchia 14 An Nunnak A Liam, Combodia ram ah sianginn in an inn lei a tlunpi tu siangakchia phurtu tilawng cu Mekong tiva ah a pil caah a tlawm bik siangakchia 14 an nunnak a liam, tiah nawlngeitu hna nih nizan Octobet 14 an langhter.
October 13 ah Combodia khualipi Phnom Penh in nichuah thlanglei meng 33 a hlatnak Kandal ramkulh ah tilawng pakhat cu Mekong tiva ah a pil, mi bawmchantu phu hna nih siangakchia pakhat a tlin lo caah an kawl cuahmah rih ko, tiah ramkulh palik bawi Chhoeun Sochet nih Reuters thawngthanhnak ah a chim.
Tilawng nih Mekong tiva ah a pilpi i nunnak a liammi siangakchia hna cu kum 11 in 14 kar an si. Tilawng ngeitu nih thilri a phurh pinah nun khamhnak angki zong a chiah lo caah siangakchia hna an nunnak a liam hi a si, tiah palik bawi Chhoeun Sochet nih cun a chim. Tilawng ai citmi chungah ngakchia pahnih le tilawng chungah tuanvo ngeitu upa pahnih lawng an nung, tiah AFP nih an langhter.
Combodia Prime Minister Hun Sen nih, siangakchia an nunnak a liammi kong he pehtlai in a ngaihchiatnak kong social media ah a chim i, nunnak a liammi hna chungkhar bawmhchanh dingin tuanvo ngeitu zong nawl peknak a ngeih hna, tiah theih a si.\
Mobae Ah SAC Ralkap Nih Meithal Duh Paoh In An Kah Caah Khualtlawng Mi Pakhat Hliamhma A Pu, Karen ramkulh, le Shan ramkulh ramri Mobae khua chungah kahdohnak zeihmanh um loin SAC ralkap nih meithal an kah caah khualtlawng mi pakhat a cal ah a khen i, hliamhma fak ngai a pu, tiah theih a si.
Nizan October 14 chun sml 12:00 hrawngah Mobae khua Settawyar(စက်တော်ရာ) khua tlangpar ah umhmun khuarmi SAC ralkap nih, cycle in khual a tlawngmi pa pahnih cu an kah hna caah pakhat cu a lu ah meithal kuan nih a khen, pakhat cu a luat, tiah Mobae PDF ralkap pakhat nih a chim.
“A hlan zongah mipi cu um kal i ralring u tiin kan chimh lengmang ko hna. Thil poipang a um theng lai lo tiin an ruah i an kal caah atu bantuk in kah an ton hi a si. Hliamhma pumi hi cycle khaltu maw a si, a hawipa dah a si ti cu fiang in kan hngal kho rih lo. Hliamhma pumi cu sii-inn ah kan kalpi,” tiah a chim chap. Khualtlawng mi kah an tonnak hmun cu Mobae PDF nih mizapi um kal lo ding in ralrin an pek hna, tiah theih a si.
Electric Mei Hri Remhlio Ah Mei Nih A Leih Hna Caah Minung 3 An Thi, 2 Sizung An Phan, Mizoram ramkulh chung, Lawngtlai District, Rulkual khuami hna cu October 14, zinglei ah electric mei hri an remhlio ah ruahlo piin mei nih a leih hna caah minung 3 cu an nunnak a liam i, 2 fakngai in minung 2 an i hliam caah sizung ah an kalpi hna tiah theih a si.
October 12 ah Rulkual khua he kilometres 4 hrawng ai hlatnak hmun electric mei hri cu thingkung pakhat nih a nenh caah mei a rawk, cu caah electric zung nih Rulkual khuami hna cu tlangrian ṭuan dingin an auh hna tiah theih a si.
Tlangrian ṭuan an kal dih hnu mei hri an remh lio ah atubantukin a thih hi a si. Mei hri leih ruang ah a nunnak liammi hna cu Samuel Lalthianghlima, Lalramdinpuia, Lalrinchhana hna an si i, Lalrinenga le Lalnghawrliana nih fakngai in hliam an tuar caah Lawngtlai sizung ah an thlop hna tiah theih a si. Crd-The Chin Post
Leave a Reply