Thawngpang Tha; Min Aung Hlaing a min cu cahaang sen in tial a si cang lai!!

SAC Ralhrang Cu Ral Cahmai Pa 6 In Nam An Si Lai+Vanlawng Kahnak Hriamnam Kan Ngei Cang-NUG
==================================
Hramhram in uknak a latu SAC ralhrang cu ral cahmai pa 6 hun in kum 1 chungah rengh deuh in nam khawhnak timhlamnak suaisamnak an ngeih nak kong cu, NUG nih cathanh a chuah. NUG Nih a ra lai mi kum ah kan ral cu ramkhel, ral lei, chawhlehnak, vawleicung International kongkau..etc..tibantukin a phunphun fonhtom in nam khawhnak Plan cu timhtuahnak ngeih a si nak kong cu, an langhter.

Cu timhtuahnak cu hoikom phufonh hna he i fonh in ceihhmainak ngeihti a si hnu ah suaisam mi a si, tiah kan theih. NUG president zungin chimphuan ngeitu U Kyaw Zaw nih,”Ral cahmai pa 6 in kahdohnak tuah nam a si lai timi cu, SAC ralhrang cu ral lei, Ramkhel lei, uknak lei, Internaltional kongkau, Chawlehnak lei le mipi chawnhbiaknak timi vauhruang ah lungkhat thinkhat tein kahdohnak tuah a si lai timi hi a chim duhnak cu a si.” tiah a chim.

Dohthlennak kum 1 leng a rauh hnu ah NUG nih hmunhma 50% cu tlangcung hriamtlai phu hna he i bom in uk khawh a si cang nak kong, Cu pinah Magway ramthen le Sagiang ramthen ah a um mi a biapi bikmi lammahgyi pawl 90% telin khuate 80% cu uk khawh a si cang bantuk in uknak hmunhma hna zong uknak lei le Judiciary (တရားစီရင်ရေး) riantuannak pawl cu tlam a tlin khawh nak hnga ding ah tuanvo lak a si nak kong, zong NUG sin in theih a si.

Cu pinnah hramhram in uknak a latu SAC ralhrang thlak khawh dingah a dihdongh kahdohnak tuahcaam a caan cu kum khat rikhiah in a phunphun nam in kahdohnak tuah a si lai tiah, NUG nih official in thangthanh nak a tuah.

SAC ralhrang vanlawng pawl a kap thlah khotu vanlawng kahnak pawl an ngeih cang nak kong cu, NUG i Minister of Information and Technology U Thin Linn Aung nih a chim. October ni 7 ah Online in tuah mi mipi dohthlennak kum 1 tlin tuakcaamnak le hmai lei ah zei kan tuah lai timi timhlamhnak thawngzamh thianhhlimhnak ah a chim.

U Thin Linn Aung nih, ” Kan mah sinah vanlawng kahnak hriamnam kan ngei, ngah cang. Cu hriamnam pawl cu hmun cheukhat ah kan cah (kan chiah). Khuaikaa hmun ah ti cu ka chim lai lo. A tak ah SAC ralhrang vanlawng nih cu kaa hmun cu an kahdoh a si ah cun kan mah lei nih an kahthlah ko lai.” tiah a chim.

NUG nih vanlawng kahnak hriamnam a ngeih mi cu zeibantuk vanlawng kahnak dah a si timi bel cu chimphuan a um lo. SAC ralhrang nih cung lei in kahdohnak a tuah mi khamnak caah Cung lei khamnak system pakhat ngah khawh nakhnga ding ca zong kan i zuam ko, ti zongin NUG nih a chim.

SAC Ralkap Uknak An Laak Thla 20 Chungah Nu 307 An Nunnak A Liam, Myanmar ramchung ah SAC ralkap nih 2021 February 1, uknak an laak thokin 2022 September 30 tiang, thla 20 chungah nu 307 an nunnak a liam cang i 2472 tlaih an tong tiah Burmese Women’s Union(BWU) nih nihin September 7 ah cathanh an chuah. A luancia September thlakhat chungah Myanmar ram huap in nu 23 nunnak a liam i, nu 31 cu SAC ralkap kut in tlaih an tong tiah an langhter.

Thla 20 chung ah tlaihkhih a tongmi nu vialte hna chungin nu 213 hi sualphawt biakhiahnak tuahpiak cangmi an si i, cu chung ah thih-dan pekmi minung 9, thil hlanlo thongtla dingin biakhiahnak tuahpiak mi minung 10 le kum 9 chung le kum 9 nak tam thongtla dingin biakhiahnak tuahpiak mi hi 55 an si tiah theih a si.

SAC ralkap nih anmah a dohtu paoh cu poh-mah phunphun min bunhpiak in tlaihkhihnak an tuah, dohthlennak ding ca cawlcanghnak thazaang a ṭhawnnak hmun paoh ah hriamnam thazaang a hleihluat tuk in a hman i tualchung mi hna umnak ah kahdohnak an tuah caah nu le ngakchia a thi mi an tamnak a si tiah an langhter chih.

Pale Ah Ral Vengtu SAC Ralkap Hriamngan He Kah An Tong, Ralkap 7 An Thi. Sagaing ramṭhen, Yinmapin pengkomh, Pale ah ral vennak a tuahtu SAC ralkap hna cu October 6 ah hriamngan he kahdoh an ton caah SAC ralkap 7 an thi tiah theih a si.

SAC ralkap, palik le pyusawhṭi tiin minung 18 cu Pale khuachung ah ral vennak an tuah lio zaan suimilam 8:40 hrawngah tualchung hriamtlai phu hna nih Auto gun, sniper le 40 mm hmang in kan kahdoh hna tiah Southern YSO PDF in Bo Aung Maung nih a chim.

Cu SAC ralkap hna cu Sagaing ramṭhen hrambunh ṭah-khah-mah 33 in an si i, kaphnih kar i kahdohnak ruang ah SAC ralkap 7 an thi, tualchung hriamtlai phu lei in minung pakhat hliamhma a tuar tiah Bu Aung Maung nih a chimchap. “PDF leiin minung pakhat nih hliamhme a tuar, ralkap lei minung 5 an thi, cun sizung phanmi ralkap hna chungin minung 2 an thi chap” tiah a chim. Crd-The Chin Post

Thlahnih Chungah SAC Ralkap Kut In Tualchung 8 An Nunnak A Liam, 20 Leng Hliamhma An Pu, A luancia August thla in SAC ralkap le AA kar kahdohnak a chuak ṭhan i, SAC ralkap nih timh ciammam in tualchung mi cu an kah hna pinah an tlaih hna, tiah theih a si.

SAC ralkap nih hriamngan he hriamhme he khua chungah duh paoh in an kah caah tualchung mi a thimi le aa hliammi an tam. Western News nih cazin a khawmh ning ah August le September thla chungah SAC ralkap kut in tualchung mi 8 an nunnak a liam i, 23 hliamhma an pu, tiah theih a si.

Rakhine rammi ramkhel thiam sang Phe Than nih, “SAC ralkap le AA kahdohnak a chuak kho ko nain SAC ralkap nih, tualchung mi hna cu ralphaw hman ding in an tlaih hna awk a si lo,” tiah a soisel hna. Rakhine ramkulh chung kahdohnak ah SAC ralkap kut in tualchung mi a thimi le inn le lo a rawkmi vialte cungah ANP party nih SAC ralkap thil tuahmi cu fak piin a soisel i, duhlonak a langhter.

SAC Ralkap Nih Khinmon Khua An Khangh Pinah Khuami 400 Tluk An Tlaih Hna, Sagaing ramṭhen, Chaung U peng Khinmon(ခင်မွန်) khua cu, SAC ralkap nih nizaan October 6 zaanlei sml 1:00 hrawng ah an khangh i, khuami 400 tluk an tlaih hna pinah an hrem hna, tiah tualchung mi hna nih an chim.

SAC ralkap pawl cu Min sianginn le Chan Thar Gyi(ချမ်းသာကြီး) sianginn ah hmunhnih ah ṭhen in an um i khuami 400 tluk an tlaih hna, tiah theih a si. “Khinmon khuami 400 tluk cu uico ralkap 50 hrawng nih hmun hnih ah an i ṭhen i, an tlaih hna. NLD party a ṭanhtu hna inn 5 cu an khangh caah a ciam dih,” tiah tualchung mi pakhat nih a chim.

SAC ralkap nih Sagaing ramṭhen chungah Chaung U, Khin U, Monywa le Taze peng khuate an khangh lawng si loin Magway ramṭhen ah peng cheukhat zong ah hmunhman thianhhlimnak kan tuah an ti i, khuate hna cu mei in an khangh hna. Khuami zong an tlaih hna i an thah hna, tiah tualchung mi hna nih an chim.

Myaing Peng Ah Pyusawhti Sakhan Cu Hriamngan In Kah A Ton Caah Pyusawhti Umnak Inn 7 A Ciam, Magway ramṭhen, Myaing peng thlanglei Watpauk(ဝက်ပုတ်) khua ummi pyusawhti sakhan cu October 5 zaanlei ah PDF nih hriamngan in an kah, tiah theih a si. Cu sakhan cu SAC ralkap le pyusawhti 70 tluk an umnak a si i, October 5 zaan sml 9:00 hrawng in 60mm le 80mm hriamngan in voi 30 hrawng kan kah hna, tiah Wolf Guerrilla Myaing in bawino Mi Pua(မီးပွား) nih a chim.

“Zaan sml 9:00 hrawng ah 60mm, 80mm le 120mm in kan kah hna. Japhnih kar kahdohnak hi mins 40 tluk a rau, SAC ralkap a thimi zat fiang in kan thei rih lo,” tiah a chim chap. Cu kahdohnak ah SAC ralkap a thimi le aa hliammi fiang in theih a si lo nain inn 7 cu a ciam dih, tiah theih a si.

North Okkalapa Phone Dawr Pakhat Luhhnawh An Tong I Phaisa Le Sing 500mmk Renglo Man Phone An Laak Piak Hna, Yangon ramṭhen, North Okkalapa pengchung WiNn Mobile Yangon dawr cu luhhnawh le bauhpiak an ton caah phaisa le sing 500mmk renglo man phone firpiak an tong tiah theih a si.

Cu thilcang mi kong he pehtlai in cu palik sakhan sin ah phuannak kan tuah, mifir cu a rannak in tlaihkhawhnak ding ah kan i zuam ko tiah WiNn Mobile Yangon dawr i ṭuanvo ngeitu Ko Ye Htet Koko nih a chim. “Phone hi lung 50 in lung 60 hrawng an lak lai tiah kan zumh, cun phaisa zong an lak, a zat bel fiangin kan chim kho rihlo. Nihin nikhat cu dawr kan khar lai, thaizing cun kan hon ṭhan ko lai, voidang kel bang bawmhkhawh kan si ko” tiah WiNn Mobile Yangon dawr i ṭuanvo ngeitu Ko Ye Htat Koko nih cun a chim.

Cobra Phu Kahdohnak Ruangah October Zarhkhat Chungah SAC Ralkap 10 An Thi, Hliamhma Tuar An Tam, KNU brigade 6 hmunram, Doepalaya pengkomh Myawady-Wawlay lampi ah rallam sialtu SAC ralkap le KNLA battalion 27 kuttang um Cobra kar kahdohnak a chuak tiah theih a si. Cobra lei ralkap sniper phu le drone phu kahdohnak ruangah SAC ralkap leiin October 1 in October 6 tiang zarhkhat chungah minung 10 an thi tiah theih a si.

Taungni khuapawng SAC ralkap ṭat-mah 44 kuttang um khah-mah-yiah 104 battalion cu Cobra phu nih October 1 in October 3 le October 6 ni ah sniper in an kah hna caah ralkap 8 an thi tiah theih a si. Cun October 4 ni Tunh Hṭaṭ Kweit(သုံးထပ်ကွေ့) lei ah rallam sialtu khah-mah-yiah 102 battalion cu vanlei in drone in bomb an thlakhnawh hna caah SAC ralkap 2 an thi, fakngai in minung 8 hliamhma an tuar tiah Cobra nih cathanh an chuah.

Kanbalu Ah SAC Ralkap Nih Pehtlaiin Nili Chung Rallam An Sial Caah Tualchung Mi Thonghra Renglo Ralzaam Dirhmun An Phan, Sagaing ramṭhen, Kanbalu pengchung October 4 in nihin October 7 tiang, SAC ralkap nih pehtlaiin nili chung rallam an sial. Mipi umnak inn an hrawhpiak pinah an khangh piak hna, cun mipi ngeihmi thilri an firpiak rih hna caah tualchung mi thonghra renglo nih an umnak an zaamtak tiah theih a si.

Nili chung SAC ralkap nih rallam an sial caah khua 7 in khuami minung thonghra hrawng nih an umnak khua cio chuahtak in an zaam hna tiah Kyunhla khuami dohthlennak tuahtu phu chungtel pakhat nih a chim. Rallam sialtu SAC ralkap hna nih cun October 5 ah Lwingyi khuachung an khangh, cun nizaan October 6 ah Zawchaung khua an khangh ṭhan. Tintaw khua zong ah an lut i mipi umnak inn chung thilri an thlok dih tiah tualchung mi nih an chim.

Htilin Ah Kahdohnak A Chuak, SAC Ralkap Nih Tharakhar Khua An Khangh Caah Inn 6 A Ciam, Magway ramṭhen, Htilin pengah SAC ralkap le PDF-Htilin kar kahdohnak a chuak i SAC ralkap nih Tharakhar khua an khangh tiah PDF-Htilin nih cathanh an chuah. October ni 6 ah Shwe Aung Thar in Htilin lei ah a rami SAC ralkap thazaang 80 tluk cu tualchung hriamtlaiphu hna nih Gyichaung hleidonh ah zaanlei suimilam 3:19 ah bomb in an kahdoh hna tiah theih a si.

Tualchung hriamtlaiphu hna nih an kah hna hnu ah SAC ralkap lei nih hriamngan le hriamhme he an kah ve hna i kaphnih kar kahdohnak faak a chuah. Cu hnu zaanlei suimilam 5:30 hrawngah Tharakhar khua umhmun khuarmi SAC ralkap pawl cu PDF-Htilin nih 60 mm in an kah ṭhan hna nain SAC lei a thi le aa hliammi theih a si rih lo. October ni 7 zing suimilam 7:20 ah SAC ralkap pawl cu Tharakhar khua ah an lut i tualchungmi inn 2 an khangh i a pawngkam inn 6 zong a ciam chih tiah theih a si.

Wundwin Ah Cycle In Aa Chawkmi SAC Ralkap Kah An Tong 2 An Thi, Mandalay ramṭhen Wundwin peng Yonepinkone khua hnulei ah SAC ralkap ralveng in ai chawkmi cycle pawl cu bomb puah an tong i palik 2 an thi tiah theih a si. SAC ralkap le palik ralvennak tuahmi cycle pawl cu nihin October ni 7 chun suimilam 12:30 hrawng ah Wundwin Township Revolution Force (WTRF) nih bomb in kan doh hna caah palik 2 an thi tiah Wundwin Township Revolution Force nih cathanh an chuah.

KNU brigade 1, Thaton Pengkomh September Thlachung Kahdohnak Ah SAC Ralkap 50 Hrawng An Thi, Ralkap 2 CDM An Tuah, KNU bridage 1, Thaton pengkomh September thlakhat chung SAC ralkap le KNLA brigade 1 phufonh kar kahdohnak voi 39 a cang, cu kahdohnak ah cun SAC ralkap 48 an thi i 41 nih hliamhma an tuar tiah KNU brigade 1 nih cathanh an chuah.

Kahdohnak chungah SAC ralkap lei motor 10 a rawk i, Revolver pakhat, MA meithal 2, kuanbawm 8, kuan 390 hna cu KNLA phufonh nih an lakkhawh. Kaphnih kar i kahdohnak ah KNLA phufonh lei in minung 5 nih hliamhma an tuar tiah theih a si. SAC ralkap chungtel minung pahnih nih an hriamthil he CDM cawlcanghnak an tuah tiah KNU brigade 1 nih an cathanh chung ah an langhter.

SAC ralkap lei nih ni fatin in hriamngan le hriamhme he mipi umnak khuachung an kah caah inn 4, motor pakhat a rawk i, inn zuat saṭial Naa, Caw zong an thi. SAC ralkap hna nih an sakhan remhkauhnak ding caah tiin tualchung mi hna thing le rua cu hramhram in an lakpiak hna tiah theih a si.

Matupi Khua Thawngpang Cheukhat, Fiamcawnnak , Chin ramkulh, Matupi ah Covid-19 zawtnak ai thok than caah, Matupi ah ca a cawng liomi siangakchia hna cu sianginn kai tikah mask i huh hrimhrim dingin an ti hna pinah mask ai huh lomi cu sianginn ah luhnak nawl an pe hna lo tiah theih a si.

Khualtlawng Cazin Cheknak, “Nizaan October 6 ah SAC ralkap hna nih Matupi khua Laungban(လောင်ဗန်း) sang ah khualtlung cazin an kan check i SAC ralkap hna cu kan inn chung tiang an rak lut. Laungban sang hi thlakhat voikhat khualtlung cazin an kan check peng” tiah Laungban sang um mi pakhat nih a chim.

Khua Luhchuah Phihkhamnak , Matupi khuachung ah, SAC nih khua luh chuahnak gate an phih peng rih i, tlunkal a ngah lo, motor zong a chuak kho lo, cu caah thilman a kai tiah theih a si. “Khua luh chuahnak gate cu an kham peng rih ko i zeitikdah an on te lai theih a si rih lo. A hlan i arti kan cawk mi reet in kan caw kho ti lo. Micheu cu a zuar hmanh an zuar ti lo i anmah ei ding caah an i chiah hna. Cawk duh zong ah cawk ding a um ti lo. Kan lung re lawng a thei ko” tiah Matupi khuami pakhat nih a chim.

MATC/MDF nih CDF-Mara An Kah Mi Hna Kongah ZZLMS Nih MATC/MDF Cu Ralrin An Pek Hna, 2022 October 3 lio ah, CDF-Mara Headquarter in Brigade 2 Bataillon 3 ah hriamnam ken loin a umkal mi CDF-Mara ralkap hna cu, MDF nih timh ciammam tein an kah hna ti thawng kan theih caah ZZMLS cu kan lung a tha hrim hrim lo.

MDF nih SAC doh loin SAC a dotu CDF-Mara ralkap hna cu nan doh hna i, a luancia 2022 March 25 ah voikhat, October 3 ah voikhat tiin voihnih tiang nan kah cang hna. Cu caah hi hnu voikhat hiti bantukin nan tuah rih a si ahcun, ZZLMS nih kan in zoh sawh ti hna lai lo, biatak tein hma kan in lak cang hna lai tiah ZZLMS nih nihin October 7 ah cathanh an chuah.

CDF-Kanpetlet Ralkap Hna Ca Ah, Tanghra Sianginn An On Lai, Chin ramkulh, Kanpetlet peng ah, CDF-Kanpetlet ralkap hna nih fimnak an cawn khawhnak ding caah, Public Administration le Township Education hna i bawmin, sianginn an on lai tiah theih a si. CDF-Kanpetlet ralkap hna fimnak an cawn khawh nak ding caah, a ra laimi October 10 in sianginn kan on cang lai. Hi sianginn onnak ahhin harnak tampi a um ko.

Zeicatiah ca an cawnnak ding ah hrukeih, sehthilri, mei le ca a chimtu ding saya/mah zong an herh rih. A sinain a si khawh chungin kan i zuam ko lai tiah CDM sayamah pakhat nih a chim. Kanpetlet peng ah, Public Administration le Township Education hna i bawm in an on dingmi sianginn cu tanghra kai dingmi ca lawng an on lai i, a kai dingmi siangakchia 400 hrawng an si lai tiah theih a si.

SAC Ralkap Nih Hriamngan An Kah Caah Nanchaung Khua Pawng Ah A Tla, Khuami An Zam Dih, Kalaymyo ah umhmun khuarmi SAC ralkap nih, nizaan October 6 zaanlei sml 2:00 hrawng ah hriamngan lung 5 nak tlawm lo an kah i Kalaymyo hnulei Nanchaung(နန်းချောင်း) khua pawng ah a tla, tiah theih a si. Nanchaung khua luhnak in pe 500 a hlatnak ah SAC ralkap nih hriamngan an kahmi kuan cu, voi 2 a tlak caah khuami cu thinphang in an um i, Letpanchaung khua lei ah an zam, tiah theih a si. Crd-The Chin Post

Be the first to comment

Leave a Reply

Your email address will not be published.


*