Taphan Sait Tidil Pawng Kahdohnak Ah SAC Ralkap 10 An Thi=Kahdohank Thawngpang Tha Fonh!
===============================
Sagaing ramṭhen Kanbalu pengkomh, Kyunhla peng Taphan Sait tidil pawng Shwepawkune(ရွှေပေါ်ကုန်း) khuapawng ah October 4, zinglei ah minung thazaang 40 hrawng simi SAC ralkap le tualchung hriamtlai phu kar kahdohnak a chuak i SAC ralkap lei a thimi an tam tiah tualchung mi nih an chim.
Taphan Sait tidil palik sakhan ah umhmun khuarmi SAC ralkap le pyusawhṭi phufonh minung thazaang 40 hrawng nih Taphan Sait tidil pawng Shwepawkune(ရွှေပေါ်ကုန်း) khua lei ah rallam sial in an phan i, tualchung hriamtlai phu hna he kaphnih kar suimilam pakhat tluk hrawng naih tein kahdohnak a chuak tiah tualchung media Infinity Group nih an thanh. Kaphnih kar i kahdohnak ah SAC ralkap lei ralbawi pakhat telh in ralkap 10 an thi, ralbawi pakhat telh in SAC ralkap minung 20 leng nih hliamhma an tuar tiah Infinity Group nih an thanhmi ah cun an langhter.
Ayeyarwaddy ramṭhen Mawgyun khua pyithusit hruaitu Khin Maung Kyi cu nihin October ni 5 zaanlei ah meithal kahnak in a thi tiah tualchungmi hna nih an chim. Pyusawhti, MahBahTah le pyithusit hruaitu Khin Maung Kyi cu Bogale PDF le Mawgyun PDF hna nih kan fimtawl tiah cathanh an chuah. Khin Maung Kyi cu SAC pekmi uniform le meithal he mawtaw in khuachung lakphakti dawr hmai ah a um lioah kahthah a tong tiah tualchungmi nu pakhat nih a chim.
Kahthah a tongmi Khin Maung Kyi ruak cu SAC ralkap le palik nih an lak i siizung ah an kalpi, khuachung zong checkhlatnak an tuah tiah a chim. Tualchung hriamtlaiphu hna nih cun SAC ralkap he aa pehtlaimi , Dalan a ṭuanmi hna le SAC riankhinh mi a cohlangtu hna cu pehtlai thluahmah in fimtawl an si lai caah mipi nih SAC neihniam in um lo dingah an cathanh ah cun an langhter.
Sagaing ramṭhen Kani peng ah Chindwin tiva in a rak kaimi SAC ralkap le Daung Luth Linn -LPDF phufonh kar kahdohnak nihnih chung a chuak tiah theih a si. SAC ralkap tinbaw 13 cu October ni 4 zaanlei suimilam 3 hrawng ah Pansan (ပန်းဆိုင်း) khua pawngah Daung Luth Linn PDF le tualchung hriamtlaiphu hna nih an kahdoh hna i SAC tinbaw cu an rawk i minung 15 leng an thi tiah LPDF hna sin in theih a si.
October ni 4, Pansan khua ah SAC tinbaw cu tualchung hriamtlaiphu he fonh in kan kah hna, an mah lei zong nih hriamngan in a kan kah ve i kaphnih kar kahnak a chuak, SAC lei zeizat an thih cu fiangin theih a si lo. October ni 3 kahdohnak ah cun SAC lei thawng an i thanhnak radio line kan tlaih i 15 hrawng cu an thi tiah kan theih tiin Daung Luth Linn LPDF in ṭuanvo ngeitu pakhat nih a chim.
Sagaing ramṭhen, Monywa pengchung ah minung thazaang 60 hrawng nih zulhmi SAC ralkap raltuknak motor ruun cu bomb voithum tiang puahhnawh in doh an ton caah SAC ralkap 20 hrawng an thi tiah Monywa Peregrine People’s Defence Force in Bo Laypaw nih a chim. October 4, ah Monywa in Chaung U lei a kalmi SAC ralkap motor ruun cu padeta bomb hmang in voi thum tiah puahhnawh in kan doh hna tiah a chim.
“SAC ralkap motor ruun cu padeta bomb hmang in voithum tiang kan puahhnawh hna, SAC ralkap bomb puahhnawh in doh an ton caah ralkap 20 hrawng an thi lai, cu ralkap hna cu khoika battalion in an si kan thei lo” tiah Bo Laypaw nih a chim. Cu SAC ralkap hnacu Monywa Peregrine People’s Defence Force le Brave Heart Army phufonh nih an kahdoh hna, SAC motor ruun hna cu Chaung U lei ah an kal ṭhan tiah theih a si.
Sagaing ramṭhen Salingyi peng Kyatat palik sakhan cu tualchung hriamtlaiphu phu 5 nih aluancia October ni 2 ah an va kah hna tiah theih a si. Salingyi peng Kyatat palik sakhan cu a luancia October ni 2 ah tualchung hriamtlaiphu fonh hna nih rallam hmunhnih in an i ṭhen i an kahdoh hna, rallam hmunkhat a kal mi hna nih palik 5 an kahthah hna i G2 meithal pakhat an lak,
cun rallam pahnihnak nih sakhan chungah an luh hnawh hna i an kah hna caah an i runvennak hmun (Bunker) pathum a rawh pinah hriamngan chaihnak pakhat a rawk. Cun tutan kahdohnak ah hin a tlawmbik palik 10 an thi i 18 nih hliam an tuar tiah theih a si.
Kyatat palik sakhan kahdohnak ah hin suimilam 5 hrawng a rau i sakhan laknak ding ah bunker pahnih a tang, cu lio ah Monywa in Mi35 vanglawng pahnih in an kah hna caah hnu an kir tiah theih a si.
Mindat he meng thum hrawng aa hlatnak Matupi lampi cung ah a ummi SAC ralkap nih hriamngan he hrambunhnak khah-lah-yiah 274 sakhan cu nihin October 5 zinglei ah naih tein kan kah hna tiah CDF-Mindat in chimphuannak nawl ngeitu nih a chim.
“Tualchung mi hna an umnak khua hna ah hriamngan in a kap zungzaltu an si caah, kan kah ve hna” tiah chim phuannak nawlngeitu nih a chim.
Kahdohnak ah SAC ralkap leiin a thimi an tam kho, CDF-Mindat phu chungtel hliamhma tuarnak a umlo tiah chim phuannak nawl ngeitu nih cun a chim chap. Kahdohnak a dih hnu ah tualchung mipi an umnak khua hna cu SAC ralkap nih hriamngan he voi 20 hrawng an kah , Mindat sianghleirun kalnak lam pawng inn pakhat cu SAC ralkap hriamngan kahnak in a rawk tiah an thanhmi ah cun an langhter. SAC ralkap sakhan kahdohnak ruang ah a thimi le hlianhma tuarmi kong fiang in theih a si rihlo nain, kahdohnak ngol hnu chunhnu ah khah-lah-yiah 274 hmun chungah mizaw phortu motor cu rangngai in an lut, cun checkhlatnak fakngai in an tuah tiah theih a si.
Karen ramkulh, KNU Brigade 4 hmunram Myawaddy-Wawlay lam ah umhmun a khuarmi SAC ralkap pawl cu, drone in bomb kan thlakhnawh hna caah SAC ralkap 2 an thi, Officer 1 telh in ralkap 8 hliamhma an pu, tiah Cobra Column nih cathanh an chuah. Nizaan October 4 chun sml 12:30 ah SAC ralkap cu KNLA,
PDF ṭangṭi phu Cobra, Brigade Companny 2 hna i bawm in an kah hna caah kaphnih kar kahdohnak a chuak. Federal Wings drone phu, Yawngni Companny drone phu hna nih bomb an thlak hnawh caah Kha Mah Yah 102 in ralkap 2 an thi, 8 hliamhma an pu, tiah theih a si. October 4 chun ah Tatma 44 Beoha(ဗျူဟာ) 441 an umnak pura ah Federal Wings Drone phu nih bomb an thlak, asinain a thimi zat fiang in theih a si rih lo. PDF ṭangṭi lei in a thimi le aa hliammi an um lo, tiah theih a si.
Sagaing ramthen, Watlat peng Sannaingkuai(စိုင်နိုင်ကွေ့) pawngah PDF nih SAC ralkap cu lamhruang in kan bawh hna i kan kahdoh hna caah SAC ralkap 6 an thi tiah nizaan October 4 ah Chidwin Attack Force nih an thanh. October 3 zaanlei sml 3 hrawngah Watlet peng in Hlataw khua leiah rallam a sialmi SAC ralkap 80 hrawng cu, hriamngan le hriamhme in kan kahdoh hna i kaphnih kar kahdohnak sml 1:30 chung hrawng a chuak.
Cu kahdohnak ah cun SAC ralkap 6 an thih caah Yuatharkyi khua in SAC ralkap dang nih an rak bomh hna nain kanmah tualchung hriamtlaiphu lei cu hliamtuar um loin hnu kan tolh than tiah Chindwin Attack Force in tuanvo ngeitu pakhat nih a chim.Tannitharyi ramṭhen, Tanintharyi peng Nyaungpinkwin(ညောင်ပင်ကွင်း) khua ah pyusawhti Ko Naing cu M-16 meithal he tlaih a tong, tiah theih a si.
Pyusawhti Ko Naing cu nizaan October 4 zanlei sml 3:30 hrawngah ti kholh dingin a kal lioah Naga PDF nih an tlaih, tiah theih a si. Ko Naing cu M-16 meithal zun 1, kutcheh bomb lung 1, meithal kuan 157, kuan bawm 5 le meithal kuan kham angki 1 he kan tlaih i, cunglei nawlngeitu hna sinah kan ap, tiah Naga PDF an langhter.
Launglone Le Palaw Ah Pyusawhti 3 Kahthah An Tong, Tanintharyi ramṭhen, Launglone peng Panalay(ပန္ဒလဲ) khua pawng ah pyusawhti 3 cu, nizaan October 4 ah Launglone peng PDF nih an kah thah hna, tiah Dawei Information Center sinin theih a si. Nizaan zanlei sml 1:30 hrawng ah LLPDF le DDT Companny 3 nih pyusawhti Thaung Nang, Min Naing le Tin Shing cu an kah thah hna. Kutser meithal zun 1, kuan 3, phone 2, cycle 1, pyusawhti min cazin, liecence, tangka kyats 63,800 le thilri cheukhat hna zong PDF ṭangṭi phu nih an lak dih, tiah theih a si.
Pyusawhti Nga Zaw a kuttang minung an si i, khuami harnak an pek hna caah kan kah thah hna, tiah LLPDF ralkap pakhat nih a chim.
Ngaanzun Ah SAC Ralkap Kuttang Rianṭuantu Khuabawi Hla Myint Kahthah A Tong October 2 zinglei sml 10:10 ah Mandalay ramṭhen, ngaanzun peng Nyaungpin Yu(ညောင်ပင်ရိုး ) khuami SAC ralkap kuttang rianṭuantu, USDP party chairman hlun, Hla Myint cu NYSGF, Man Shwe Gyia PDF, NZN Revolution Force le One Giluerrilla phu hna i bawm in an kah thah, tiah theih a si.
Ye Peng Ah SAC Ralkap Thawng Petu Aung Myint Kahthah A Tong, Mon ramkulh, Ye peng Kyunglaung(ကျူံလောင်း) khua hlun ummi SAC ralkap thawng petu Aung Myint cu, nizaan October 4 zinglei sml 9:00 ah a inn chungah meithal zun 15 in kan kahthah, tiah Mon State Revolutionary Organization (MSRO) nih cathanh an chuah. Aung Myint nih a luancia March thla 18, MSRO phu nih motor an remh lioah SAC ralkap a chimh hna i, an kah hna caah ralkap Kyaw Zin Htet le kum 14 ngakchia pakhat an nunnak a rak liam.
Pakokku Ah Inn Zaa-uktu SAC Ralkap Kuttang Rianṭuan Kyaw Sein Htun Kahthah A Tong, Magway ramṭhen, Pakokku peng No.15 sang ummi inn zaa-uktu Kyaw Sein Htun cu min hngalh lomi hriamtlai phu khat nih October 2 zaanlei ah meithal in an kahthah. Kyaw Sein Htun cu thil a zuar pah in SAC ralkap thawng petu a si, tiah theih a si. Crd-The Chin Post
Leave a Reply