Thawngpang Fiang, SNA Vice Chief of Staff kha Ralhangbu nih an Thah mi a si

Shanni National Army VCS, General Satt Khun Kyaw kha ralhrangbu nih an thah mi a si tiah SNA chimhnak nawlngeitu Col. Sei Saing Thun nih a phuang.

Col. Sei Saing Thun nih “Pumpak i huatnak a ngeihmi zong pakhat hmanh a um lo, kan ral pawl an si ko. Rallokap nih an tuah mi a si. Timh riangmangin an tuah mi a si” tiah a chimh.

May 26 ah a cang mi thil a si, 27 zinglei suimilam 9 ah a thi. A mah vengtu hna an kah hnuah an kah mi a si, a thi mi cu pakhat lawng a si. A vengtu hruaitu pakhat hma a pu ve. A thattu pa cu kan tlaih cang. A thattu pa he a pehtlaihmi minung hna cu kan hlathlai dih hnuah Gen. Satt Khun Kyaw ruak cu SNA luatnak hmun pakhat ah budhist phung ningin vui a si lai tiah a ti.

Gen. Satt Khun Kyaw hi Kachin ram Moegyin peng Mawhan khuachuak Shanni miphun pakhat a si i Yebaw Tan Chawng @ U Myint Soe tiin mi tampi nih theih mi a si.

Gen. Satt Khun Kyaw hi ABSDF ah Vice Chairman le ralkap lutlai a rak tuan bal mi le RCSS/SSA ah Colonel rankin central committee chungtel zong a rak tuan bal mi a si. 2006 January thla ah SNA dirh dingin Kawlram chak lei an kai lio ah Namkhan peng Namti khuapawngah ralhrangbu nih an tlaih i Teidan voi 4 tiang an rak pek a si.

2018 kum U Win Myint cozah tangah ngaihtiamnak he thongin chuah a si hnuah SNA a kir than i VCS rian atuan lio mi a si.

Shanni National Army (SNA) hi 1989 kum ah miphun i tluktlannak, Mahte khuakhang lairelnak le Shanni pine dirh ding timi tinhmi pathum he dirh mi a si.

SNA hi Shanni miphun tam deuh an umnak hmun Kachin ram Phakanh, Intawkyi le Sakaing ramkulh Homalin, Pinlebu, Banmauk, Khanti, Phawngpin le Tamu hrongah an colcang mi an si. Ref; irrawaddy

The Chin Post