Pu Tler Ling le Kham Bawi Thahnak Telh in Indonesia ah Kawl Ralkap Sualphawt Tazacuai A Tong!
======
Ramkomh Kawlam ah Kawl Ralkap nih an ton bal lomi a voikhatnak Indonesia ram ah sualphawt tazacuai a tong tiah theih a si. Indonesia ram chung in mithang le mihngalh a simi phungthiam hna komh in Indonesia Biacaihnak Sangbik (Constitution Court) ah Kawl Ralkap cu sualphawt in tazacuai a si tiah Minung Covo kilkamhnak riantuanmi bu (law firm) nih September 6 nithla khenh in thanhnak an tuah.
A bik in, an halmi cu Kawl Ralkap nih sualnak a tuahmi minung cihmih timhnak (crimes against humanity/genocide), raltuk lio ah sualtuahmi (war crimes) hi phungning tein Indonesia baceihnak tang ah tazacuai i baceih ding hi a si.
Atu bantuk in, Innpa ram 10 ASEAN chungtel pakhat nih a chungkhar khat a simi cung ah sualphawt in biaceih ding a tuah hi a um bal lomi a si. Biacaih ding in an cohlan a si ahcun, a voikhatnak a si dingmi a si.
Hi kong he pehtlai in, Chin Nuhrin Covo Bu (CHRO) nih atu bantuk tazacuainak ah Chin miphun nih sersatnak, covo buarnak kan tonmi kong ah kan sining langhter khawh le kan tonmi (case) pawl telh khawhnak caan tha kan ngeihmi cung ah lawmhnak kan ngei tiah an chim. Cun, tutan ahhin Chin ramkulh khualipi ah Ralkap nih hremnak ruang ah a thimi Pu Tler Ling le Kham Bawi kong zong felfai tein hlathlatnak tuah dih hnu ah telh a si. Anmah lawng silo in, Chin ramkulh chung i nuhrin covo buarnak le hramhram in ralkap nih an kan tuahto mi poahpoah case a tlakning in telh a si tiah tuanvongeitu pakhat nih The Chinland Post ah a chim.
Tutan Indonesia ram ah Kawl Ralkap uknak latu le sualtuahtu biaceih ding in tazacuainak ah a biapi in a telmi pakhat, a hlan Indonesia ah Biaceih Bawi a rak simi Marzuki Darusman nih, “Indonesia phunghram ning in fiangte in kan hmuh khawhmi cu phung tang ah a hohmanh kan i khat dih, Indonesia miphun he miphun dang he tiah a ti. Cucu nih a langhter mi cu ahohmanh an covo buar a si ahcun humhim piak ding tuanvo kan ngei. Cun, atu biaceih tazacuai ding kan chuahpi mi hi khualrang in kan tuah a herh mi a si. Kan hnulei July thla ah Kawl Ralkap nih zaukphung dirkamhtu minung pali an thah hna. Atu ah, zalonnak caah a cawlcangmi thongthlakmi thah ding a za leng an um rih” tiah a chim.
Kawl Ralkap nih nawlngeihnak an lak ruang ah a chuakmi buaibainak le harsatnak ruang ah, sualnak ngeih lo minung 2000 [Ralkap kut in] an thi cang, thong hleinga (15,000) leng tlaihkhih an tong. Cun, nuai 1.2 (million) tluk harsa le rawlei tidin awk ngei loin an um tiah an cathanh ah an langhter chih. Hiti bantuk in, Kawl Ralkap kut in a thimi hi felfai tein khumh le cazin tha tein lak an si. Chin le Rakhine i kahdohnak ruangah innlo a zaamtakmi 9,600 deng an um (UNOCHA). Rakhine ram peng tampi le Chin ramkulh thlanglei Paletwa khua ah SAC ralkap le AA karlak entainak a ngan chin ruangah innlo a zaamtakmi 9,600 deng an um tiah UN OCHA nih a thanh.
June thla thokin kaphnih karlak ah atu le atu kahdohnak chungah hriamngan zong an hman bantuk in SAC ralkap lei nih van i kahdohnak a tuah tiah UN OCHA nih September 6 ah a thanh. 2020 November thla lioah ralkap le AA karlak ah chikhat kahdaih hnatlaknak an tuah hnuin kahdohnak a chuah ṭhan hi a si.
Rakhine ram Buthidaung, Maungdaw, Mrauk-U le Chin ramkulh thlanglei Paletwa peng hna ah atu le atu kahdohnak a chuak tiah UN OCHA nih a langhter. August thla thok ah Paletwa thlanglei telh in, Kaladan tiva thluangthluan, Sami, Paletwa lam hna ah kahdohnak a fak i hriamngan puahnak le ralkap pawl nih hmunhma ṭhialnak hna an tuah tiah aa ṭial.
September 5 tiang hmuh khawhmi cazin ning ah kahdohnak ruangah mipi 9,600 deng an zaam i a hlan a um ciami ralzaam he fonh ahcun 84,000 deng an phan cang tiah a chim. Kahdohnak ruangah mipi nih hman bikmi vawlei lam le ti lam hna an phih caah khuami hna umkalnak a har i bawmhnak pek ding zong ah harnak a um tiah a chim. Eidin le sii hna a dih deng caah bawmhnak fund zong a herh tuk tiah UN nih ralrinnak a thanh. Credit: The Chinland Post
Relchap, Yangon Ramṭhen, Shwepyithar No. 9 Sang Ah In Hra Uktu Pa PDF Nih An Thah, Minung 4 Hliamhma An Pu: Yangon ramṭhen, Shwepyithar(ရွှေပြည်သာ) peng No. 9 sang um, sang bawi zung cu PDF le Yangon Urban Guerrilla Army (YUGA-Mo 7 Eagles) phu nih nizan September 6 zan ah kan kah i, inn hra uktu pa a thi, tiah Shwepyithar Pah Kah Pha nih cathanh an chuah.
September 6 zan sml 7:45 hrawng ah No. 9 sang um, sang bawi zung cu PDF ṭangrual phu hna nih an kah caah inn hra uktu Aung Htu a thi i, 4 hliamhma an pu, tiah theih a si. Cupinah September 6 zan sml 9:10 ah No. 9 sang um, sang bawi zung ṭhiamṭhiam ah bomb puahkehnak a chuak ṭhan, tiah theih a si.
Kalay-Tamu Lampi Ah Motor pakhat In PDF Nih Rithaisii an Tlaih, Kalay-Tamu lampi motor pakhat sin in ritsii Methamphetamine tlang songkhoi 5 khat cu PDF nih an tlaih. Tamu PDF nih cun, SAC ralkap thilchuah mi a thli tein a phortu hna cu kan tlaih peng ko hna lai, tiah cathanh an chuah. Tamu tualchung hriamtlai phu battalion 3 nih September 6 ah khan Tamu-Kalay lampi checkhlatnak an tuah i, cu lio ah cun rithaisii a phortu motor cu an tlaih, tiah theih a si. SAC ralkap rianṭuannak a bawmtu ah ruahmi khammi le zuarhsian lo mi cazin ah aa telmi thilri, rithaisii, sui le thil dangdang hna cu tlaih kan i zuam peng ko lai, tiah an langhter.
Bago Ramṭhen, Intakaw Peng Ah Pyusawhti Hruaitu Pakhat Cu PDF Nih An Thah: Bago ramṭhen, Intakaw peng, Kin Paing Kyone khua ah SAC rian khinhmi Pyusawhti hruaitu pakhat U Kyaw Sinh cu Sept 6 zan ah khan kan thah, tiah Intakaw tualchung hriamtlai phu (IPDF) nih nihin september 7 ah cathanh an chuah.
Kin Paing Kyone khua mi U Kyaw Sinh cu amah tein ‘khuabawi ka si, nawlngeitu bik ka si’ tiin khuami pawl cu a hrocer hna pin ah harnak phunphun a pek lengmang hna, tiah theih a si. U Kyaw Sinh cu meithal in voithum kan kah i a thi colh, khuami hna nan harnak kan in thianhpiak hna, tiah an cathanh ah cun an langhter. Tualchung mipi harnak petu cu mizei an si paoh ah kan fimtawl hna lai, kannih cu mipi humhimnak ca ah dirhmi phu kan si, tiah an langhter chih.
Shan Ram Chak Lei Muse Ah Misual Nih Inn Pakhat Luhhnawh In Ks Sing 500 Leng An Chuh Hna: Shan ram chak lei Muse khuachung ah Myanmar phaisa le China phaisa a thlengtu hna inn pakhat cu nihin September 7, zinglei ah misual nih an luhhnawh hna, tiah theih a si. Sangchung ummi pakhat nih cun, “September 7, zinglei suimilam 6:00 hrawng ah motor pakhat in minung 3 an ra i, cu hna nih cun an luhhnawh hna,” tiah a chim.
Cu thilcang kong he pehtlai in Muse pengkomh palik zung ah naihniam in a ummi pakhat nih, “Nihin zingka ah phaisa thlengtu hna inn cu minung 3 nih an luhhnawh hna. Meithal zun khat an puah hnu ah innchung ah cun an lut, cu hnu ah misual 3 hna nih cun inchung thilri an thlok i, phaisa sing 500 hrawng an lak. Innchung ah bunhmi CCTV zong an lak chih,” tiah a chim. Palik lei zong nih check hlatnak an tuah theih a si.
Magway Ramṭhen In Thlakhat Chung ah Inn 1300 Hrawng SAC Ralkap Nih An khangh, SAC ralkap le tualchung hriamtlai phu kar kahdohnak a fahnak hmun Magway ramṭhen chung ah, a luancia August thla chung ah khan Poah, Pakokko, Myaing, Yesagyo le Gangaw tiin pengkulh 5 chung ah khua 10 leng cu SAC ralkap nih an khangh i, inn 1300 hrawng khangh, tiah tualchung mi nih an chim. SAC ralkap nih cuka pengkulh chung ah cun kahdohnak fak ngai in a tuah caah inn le lo nih an tuar, tiah theih a si.
August 17 le 18 ah SAC ralkap le pyusawhti nihna nih thazaang 180 hrawng he Yesagyo peng, Yaylelkyun(ရေလယ်ကျွန်း) hmunram, Ngatayaw(ငတရော်) khua ah lut in inn 650 hrawng an khangh, tiah tualchung mi nih an chim. Inn 700 hrawng umnak Ngatayaw(ငတရော်) khua cu nihnih chung pehtlai in an khangh, tiah Ngatayaw(ငတရော်) khuami pakhat nih a chim. Ngatayaw(ငတရော်) khua cu inn dothnih sakmi an tam leng ah, Lei rianṭuantu zong an tam, chungkhar pakhat nih an umnak inn leng ah Bee, Facang le zeidang thil an i khonnak zong a um caah an sunghmi a tam khun lai, tiah an pawngkam ummi khua mi hna nih an chim.
A luancia August 22 zaan ah, inn 330 hrawng umnak Thadut (သဒွတ်) khua pawng ah SAC ralkap le tualchung hriamtlai phu kar kahdohnak a chuak i, SAC ralkap nih cu zaan chung ah cun inn 68 an khanghpiak hna. Atu lio hi SAC ralkap hna cu Thadut (သဒွတ်) khua pawnghrawng ah hmunhma an lak caah, minung 1800 hrawng cu ramtang ah an i dor hna, tiah theih a si.
NUG in nuhrin covo lei vuanci U Aung Myo Min nih cun SAC ralkap nih nuhrin covo phung buar in an tuahsernak vialte cu ramkip nih an theihkhawh nak ding ah kan i zuam ko, tiah a chim. Data For Myanmar nih August 27 ah cathanh an rak chuahning ah SAC ralkap hna le an kuttang um mi hna nih inn an khanghmi hi, uknak a lak thawk in 25 August, 2022 tiang ah inn 28,434 a si cang. Cu chung ah Magway ramṭhen ah inn 5418 an khangh, tiah an langhter.
Matupi le Mindat Khua Pawng Hrawng Khuami Dihlak Ngawt Cu India Ram Lei Ah An Zaam!, Chin ramkulh, Matupi le Mindat khua pawng ah SAC ralkap nih van lei kahdohnak an tuah ruangah le hriamngan hmang in kahdohnak an tuah caah tualchung mi hna cu an dihlak ngawt in India ram lei ah an zaam hna, tiah Matupi peng ralzaam pakhat nih a chim. A luacia August thlakhat chung ah ralzaam singkhat leng an karh, tiah UNOCHA nih September 5 ah cathanh an rak chuah.
Tualchung mi hna nih cinthlaknak an tuah kho ti lo, dumhau le Lei kuang hna cu kaltak in an zaamtak i, atu ah cun khuapi chung an kir khawh ti lo caah harnak nganpi an tong, bawnhchanh an herh ngai ko, tiah tualchung mi pakhat nih a chim. July thla dih tiang ah ralzaam dirhmun a phanmi 860,000 renglo an si nain, August thla ah singkhat renglo an karh caah ralzaam dirhmun a phanmi hi 970,000 leng an phan. SAC ralkap nih hramhram uknak an lak hlan buainak ruang ah mah umnak hmun kaltak in ralzaam dirhmun a phanmi 330,000 leng an um i, ralzaam dirhmun a phanmi dihlak hi sing 13 renglo tiang an phan cang.
Sagaing Ramṭhen, Butalin Peng Inn A Khangtu SAC Ralkap 20 Hrawng Cu Bomb Puahnak In An Thi!.Sagaing ramthen, Butalin peng, Dwintaung khua cu nizaan September 6 ah SAC ralkap nih an khangh i, an kirlei ah bomb kan puahhnawh hna, tiah Chindwin Brothers PDF nih nizaan September 6 ah an thanh. Dwintaung khua in an kirlei ah SAC ralkap 80 cu Laymay(လေးမြေ) khua le Ngaingthumya(ညောင်သူများ) khua karah ah bomb kan puahhnawh hna. Cu bomb puahnak ah cun SAC ralkap 20 an thi i, 5 faak ngai in hliam an tuar. SAC nih hriamngan le hriamhme hmang in an kan kah ve nain kanmah lei hliamtuar um lo tein hnu kan tolh kho, tiah Chindwin Brothers PDF in ṭuanvo ngeitu nih a chim.
Cu kahdohnak ah cun Chindwin Brothers PDF, Daung Generation, Bu Lah Mauk Seik (ဗိုလ်လမုတ်ဆိတ်) le Royal Diamond hna an i bawm, tiah theih a si. Myinkin Peng Kungmaw Khua Ah PDF Ralkap 2 Thah An Tong, Tualchung Mi 2 SAC Ralkap Nih An Kah Hna: Sagaing ramṭhen, Myinkin peng Kungmaw(ကုန်းမော်) khua cu September 3 ah SAC ralkap nih an luhnawh i, PDF ralkap 2 an thah hna pinah tualchung mi 2 zong meithal in an kah hna, tiah Myinkin PDF nih an thanh.
Thah a tong mi PDF ralkap Mya Din, kum 35 le Soe Min, kum 25 cu meithal in an kah thah hna pinah an tuk, an velh hnanak hma a um, tiah theih a si. “SAC ralkap pawl cu Kungmaw khua lei in rallam an sial i, khuami 10 leng an tlaih hna. Saihthar(ဆိတ်သာ) khua an phak ah an tlaih ṭhan hna. SAC ralkap nih an duhmi thilri vialte cu an i laak dih. PDF ralkap 2 ruak cu Saihthar khua ah kan hmuh hna. September 6 ah an ruak cu an vui hna,” tiah PDF an langhter.
SAC ralkap le Pyusawhti 100 hrawng cu Myinkin peng ah rallam an sial i, Kani peng lei ah an kal. Myinkin peng cu SAC ralkap nih internet le phone line an phih, tiah tualchung mi hna nih an chim. Nizan September 6 ah Tatchaung(တပ်ချောင်း) khua pawng ah umhmun a khuarmi SAC ralkap pawl cu Myinkin peng PDF nih hriamngan in an kah hna caah ralkap a thimi an um kho, tiah PDF lei nih cun an chim.
Leave a Reply