Thawngpang chia kho taktak bak theih a si e!!

Thawngpang Chia Fonh!!
============================
Hakha Le Thantlang Kar Um Timit Hleidonh Kan Remhkhawh Cang Tiah SAC Nih A Thanh, Chin ramkulh, Hakha le Thantlang kar um Timit hleidonh cu tlamtling tein kan remh i ka donh khawh dih cang tiah SAC ralkap lei nih October 11, ah thawng an thanh tiah theih a si. 2021, October 22 zinglei ah CDF nih bomb in an hrawhmi Hakha le Thantlang kar Timit tiva hlei pakhat cu 2022, September 24 ah tlamtling tein kan remhkhawh dih cang caah motor le cycle zong um kal a ngah cang tiah October 11, ah SAC ralkap media Myawaddy TV nih zaan suimilam 8:00 ah thawng thanhnak a tuah tiah theih a si.

Kalaymyo Ah Cycle I Pah Sualnak A Cang, Minung Pakhat Nunnak Liam, Kalaymyo, Sanmyo sang Bochoh lampi GBH hotel pawng ah October 11, zaan suimilan 7:00 ah cycle le cycle i pah sualnak a cang i, a hmun ah minung pakhat cu a nunnak a liam, a dang pakhat zong hliam a tuar ve tiah theih a si. Cycle i pahnak ruang ah a nunnak liammi hi mi zei a si theih a si rihlo, a ruak cu Kalaymyo general hospital ah an kalpi tiah theih a si.

May be an image of 1 person and indoor

Banmauk Ah SAC Bomb Hmanhmi Lamhsualnak In Tualchungmi Nu 2 An Nunnak A Liam, Sagaing ramṭhen Banmauk peng ah SAC nih vanlei kahdohnak nihnih chung an tuah hnu in nihin October ni 11 ah kahdohnak a chuak ṭhan tiah theih a si. Banmauk khua ah a luancia October ni 4 ah kahdohnak fak a rak chuak i SAC ralkap nih vanlawng in nihnih chung bomb an rak thlak. Cu kahdohnak ah cun SAC lei in a thi mi le ai hliam mi an tam pin ah hriamnam zeimawzat zong an rak laak bal cang tiah theih a si.

Cu kahdohnak a chuahnak pawng cu SAC nih bomb an hmanh dih caah meh hang kawl ah a chuakmi tualchungmi nu 2 cu SAC bomb hmanhmi lamhsualnak in an nunnak a liam i an chung le dang zong hliam an tuar, cun SAC nih duhpaoh in meithal an puah ruangah tualchungmi pakhat zong kuan nih a khen i hliam a tuar tiah tualchungmi hna nih an chim. SAC ralkap nih bomb an hmanhmi tampi a um rih caah tualchungmi hna nih ramlak ah i chawhvah lo dingin Banmauk Revolution nih ralrin peknak cathanh an chuah.

Monywa Economic Bank Hmai Ah Tualchung Mi Pakhat Meithal Kah A Ton Caah A Nunnak Liam, Sagaing ramṭhen, Monywa Economic Bank hmai ah, SAC ralkap kahdoh an ton hnu in tualchung mi pakhat cu meithal kah a ton caah a nunnak a liam tiah Monywa khuami nih an chim.

A luancia October 9, chunhnu suimilam 2:30 hrawng ah Monywa, khua helnak lam le general Aung San lam kam ah ummi Myanmar Economic Bank hmai ah SAC ralkap hna cu Myanmar’s Royal Dragon Army(MRDA) nih bomb puahhanwh an kan doh hna tiah MRDA nih October 10 ah cathanh an rak chuah. Kahdohnak a dih hnu ah SAC ralkap lei nih tonghmang loin meithal an kahnak ruang ah tualchung mi pa pakhat kuan nih a hliamh caah a nunnak liam tiah tualchunh mi nih an chim.

Mi bawmchantu phu chungtel pakhat nih meithal kahnak ruang ah nunnak liammi pa cu October 10 zinglei ah Myananda(မြနန္ဒာ) thlaan hmun ah kan vui tiah a chim.

Taze Peng Kahdohnak Ah PDF Ralkap 4 A Tlaumi An Ruak In An Char Hna, Sagaing ramṭhen, Taze peng Deyauk(ဒယ်ရောက်) khua pawng ah October 8 lah Sagaing hrambunh Tatma 33 SAC ralkap le PDF kar kahdohnak a chuak i, PDF ralkap 3 an thi i 4 an rak tlau.

A tlaumi PDF ralkap 4 cu October 9 le 10 ah an ruak in kan char hna, tiah Ye U-Pah Kah Phah in ralkap pakhat nih a chim. October 9 ah Taze PDF ralkap 3 cu an ruak in kan char hna. October 10 ah Ye U-Pah Kah Phah in ralkap Thura Shwe cu Ye U peng khuate pakhat leikuang ah a hliamhma he a ruak kan char, tiah a chim chap.

“PDF ralkap Thura Shwe cu Ye U peng hmun pakhat ah a ruak in kan char. A phone aa put ko nain a phone cu a thlau ta. Thlau hlah sehlaw kan pehtlaih khawh hnga i, kan khamh khawh ko hnga. Kannih cu ka umhmun ah him tein kan zam kho,” tiah Ye U -Pah Kah Phah in ralkap pakhat nih a chim. SAC ralkap Tatma 33 cu Deyauk khua ah ni thum umhmun an khuar i, nihin October 11 zinglei ah Shwe Tagye(ရွှေတကျေး) le Khapaung Kyaing(ခပေါင်းကြိုင်) khua lei ah rallam an sial, tiah theih a si.

Malaysia Kal Aa Timmi Myanmar Rammi 15 Cu Thailand Nawlngeitu Nih An Tlaih Hna, Thailand ram thlanglei Yanaung pengkomh ah Kawthaung(ကော့သောင်း) in Thailand ah a kalmi Myanmar rammi 15 cu, nizaan October 10 zinglei ah Thai nawlngeitu nih kan tlaih hna, tiah No. 25 Thailand ke ralkap nih cathanh an chuah.

Yanaung peng Sauksaram(စုက်စာရမ်) hmunram Nakha khua pawng ah Myanmar rammi phurtu motor pakhat cu Thailand ram nawlngeitu hna nih a hlan kan in a thawngpang an theih caah October 9 zaan sml 11:00 ah Thailand ram Yanaung pengkomh ah hram a bunhmi No. 25 ke ralkap hna nih an tlaih hna, tiah theih a si.

Phannga(ဖန်င) pengkomh Khuraburi hmunram lei ah a kalmi Myanmar rammi a phurtu motor cu Thai ralkap le nawlngeitu hna nih lam pakhat ah kan tlaih hna, tiah an langhter. Thai ralkap le nawlngeitu hna nih, Myanmar rammi pa 9 le nu 6 an tlaih hna pinah Thailand rammi kum 44 motor khaltu zong an tlaih, tiah theih a si.

Tlaih a tongmi Myanmar rammi 15 cu Kawthaung in Thailand ram ah tilawng in an kal i, Malaysia ah kal aa timmi an si, tiah Thailand nawlngeitu hna nih cun an langhter. Thailand le Maylaysia ah kal ai timi Myanmar rammi 300 leng kan tlaih cang hna, tiah FED nih an langhter nain hi nak tam deuh zong an phan kho, tiah theih a si.

SAC Palik He Kahdohnak Ah YDF Ralkap Bawi Bik Changtu Le YDF Ralkap Pakhat An Nunnak A Liam, Magway ramṭhen, Gangaw peng chaklei Kyunkhonethar(ကျွန်းခုံသာ) khua pawng ah Yaw Defense Force(YDF) ralkap bawi bik changtu Ko Phyo le YDF ralkap pakhat cu an pahnih in cycle he an kal lio October 9 zaanlei ah SAC palik 8 he an i tong i, hmaitonh in kahdohnak a chuak, tiah theih a si.

Cu kahdohnak ah YDF ralkap bawi bik changtu Ko Phyo(21) le YDF ralkap 1 an nunnak a liam. SAC kuttang palik Deputy Sergeant Ye Win Aung a thi ve i, palik 2 cu an phei le an baan ah hliamhma an pu, tiah theih a si. YDF ralkap bawi bik changtu le ralkap pakhat an ruak cu nizaan October 10 zinglei ah an vui hna, tiah theih a si. Crd-The Chin Post

Be the first to comment

Leave a Reply

Your email address will not be published.


*