Thawngpang Chia! Hakha khualipi a hnu bik thawngpang update!!

SAC ralkap raltuknak Helicopter pakhat nih nihin November 22 zing sml 10:46 ah Timit um Chin ralkap a kah ṭhan hna, tiah theih a si.
Zing sml 10:44 hrawngah SAC ralkap raltuknak Helicopter pakhat cu Hakha a phan i Hakha le Thantlang karah kahdohnak va tuah sehlaw a dawh bik.

Cung sang piin a zuang i timh ciammam tein a kah hna, tiah tualchung mi pakhat nih a chim. Nizan November 21 zong ah SAC ralkap raltuknak Helicopter pakhat nih a rak kah hna, tuni zong pehzulh in a kah ṭhan hna, tiah theih a si.

Hakha-Thantlang kar Timit ah kahdohnak a tuahtu SAC ralkap raltuknak Helicopter cu a kir țhan cang tiah theih a si.
Nihin chung vanlei kahdohnak tuahmi ruangah kan miphun ralkap hliam tuarnak um loin an him tiah tutiang thawng kan theih.

Kalay in SAC Helicopter pakhat Hakha a phan țhan, niam tein a zuang i Rungtlang lei a panh tiah theih a si.
Tutan a rak zuang thanmi nih hin thilri le hriamthil a phurh lai tiah zumh asi.

Myaing Peng Bahin Khua Khangtu SAC Ralkap Doh An Tong, 10 An Thi, Magway ramṭhen, Myaing peng Bahin khua palik sakhan le tualchung mi hna umnak inn a khangtu SAC ralkap hna cu PDF nih an kahdoh hna caah SAC ralkap 10 an thi tiah theih a si.

Myaing peng Bahin khua cu SAC ralkap nih an khangh caah khuami an umnak inn 52 a ciam tiah Myaing Nway Oo dohthlennak tuahtu phu nih an chim.

“SAC ralkap hna nih kahdohnak umlo in Bahan khua palik sakhan le tualchung mi hna an umnak inn 52 an khanghpiak hna, nihin November 22 zinglei suimilam 8:00 hrawng ah an kir than” tiah Myaing Nway Oo dohthlennak tuahtu phu chungtel pakhat nih a chim.

India-Myanmar Ramri Ah Hriamthil An Tlaih, Mizoram ramkulh le Chin ramkulh ramri ah Assam rifle le Champhai nawl ngeitu phufonh hna nih hriamthil an tlaih tiah theih a si.

Hriamthil an tlaihnak hmun cu Mizoram le Chin ramkulh ramri Farlui Tiau pawng ah a si i, India chuak rifle 2, kuan, bomb le walkie talkie kan tlaih tiah Vanglaini nitin thawngthanhnak nih a langhter. An tlaihmi hriamthil hna cu Champhai Customs Department ah an chiah naij minung tlaih an ton le ton lo belte thawng thanhnak an tuahmi ah an langhter lo.

PDF Nu Ralkap Nih Pakokku No.14, Sang Khuabawi An Fimhlawm, Magway ramṭhen, Pakokku no.14 sang khuabawi cu PDF nu ralkap nih an fimhlawm tiah Earthquake People’s Defence Force nih cathanh an chuah. SAC ralkap kuttang ah rianṭuan in mipi cung ah phunkip in hremnak a tuahtu no.14 sang khuabawi U Myint Thein cu nihin November 22, zinglei suimilam 7:30 hrawng ah fimhlawm a tong tiah an thanhmi ah cun an langhter.

“Amah cu SAC ralkap hna he a tangti mi a si hleiah sangchung mipi hna cung ah phunkip in hremnak a tuahnak kong cu tet-te he phuannak a um caah kan fimhlawmnak hi a si” tiah Earthquake People’s Defence Force in Ko Pein nih a chim.

SAC ralkap kuttang rianṭuantu khuabawi cu a umnak inn lila ah tualchung hriamtlai nu ralkap hna nih an luhhnawh i meithal in voi thum an kah hnuah a thih hi a si. SAC ralkap kuttang rianṭuannak in chuah ding ah voi tampi cathanh chuah a si cang na in, cu nawl chuahnak zul duh loin a ummi rih mi zong hmailei ah hmalaknak tuahding a um rih tiah theihternak an tuah chih tiah theih a si.

Malaysia Ah Amah Tein A Nunnak Ai La Mi Lal Hnem Sung Ruak Myanmar Ram Ah An Kuat Lai, Malaysia, Kuala Lampur ah amah tein a nunnak ai la mi Chin nu Lal Hnem Sung ruak cu November 23 ah Mingalardone airport ah phanhpi ding in kan kuat lai tiah Malaysia um Myanmar miphun a bawmtu phu hna sin in theih a si.

“CRC, a chungkhar hna he i fonh in nihin November 22 chunhnu suimilam 2:00 (persuaran Kajang) ah thlacamnak tuah hnuah Malaysia airport in Myanmar ram Mingalardone airport ah November 23, zinglei ah a phan lai, cun a chungkhar sin ah phan ding in kuat a si lai” tiah Malaysia um Myanmar mi bawmchantu phu nih an social media ah an langhter.

Amah tein a nunnak ai latu Chin nu Mai Lal Hnem Sung hi Chin ramkulh Thantlang peng Hmawngtlang khua mi a si i, November 18 lio ah ah khan amah le amah a nunnak a rak i la. Mai Lal Nun Hmen a nunnak a liam ah hin kum 37 lawng a si rih tiah theih a si.

KNU Hmunram Ah SAC Ralkap Nih Vanlawng In Bomb A Thlak Caah Tualchungmi Minung 23,000 Leng An Zam, KNU Kawthu Lay hmunram Nyaunglaypin pengkomh Brigade 3 ah SAC ralkap nih bomb an thlak caah tualchungmi minung 23,000 leng an zam, tiah KNU nih cathanh an chuah.

A luancia November 12 in KNU Kyaukkyi peng le Shwe Kyin peng chung um mi SAC ralkap sakhan 3 cu KNLA le ṭangṭi phu hna nih an lak, cuti sakhan an laak khawh in SAC ralkap vanlawng nih khuate ah bomb thlaknak a tuah hi a si. SAC ralkap nih Kyaukyi peng Bawkahtar(ဘောကထာ) khua chungah vanlawng in voi 2, Kawtharse(ကော်သာစေး) khua ah voi 3, Padekaw khua ah voi 1, Shwe Kyin peng chung Thanseih le Kyauktan (ကျောက်တန်း) khua ah voi 8 bomb an thlak, tiah KNU nih an langhter. Ralhrial mi Karen rammi hna cu atu tiang ral an hrialnak hmun in an khua ah an kir ngam rih lo, tiah theih a si.

Tuluk Ram Ah Seh Zung Pakhat A Kangh Caah Minung 36 An Nunnak A Liam, Tuluk ram ah seh zung pakhat ah mei kanghnak a chuak i, minung 36 an nunnak a liam, tiah theih a si. Nizan November 21 ah Henan ramkulh, An Yang khua seh zung pakhat ah mei kanghnak a chuak i, minung 36 an nunnak a liam pinah 2 an tlau, tiah Tuluk media nih an langhter.

A luan cia 2021 lio zong ah seh zung le thilri ser chuahnak ah meikanghnak a rak chuak i a thimi le a tlaumi an rak tam, tiah theih a si. Seh zung a kanghnak kong ah hliamhma a pumi cheukhat an um ko nain thinphan awk a um lo. Seh zung a kaangmi cu sml 7:00 chung kan phalh hnuah mei a dai, tiah bawmchantu hna nih an chim.

Seh zung a kangh ning hi hngalh a si lo caah Henan palik phu nih, seh zung ṭuanvo ngeitu hna le rianṭuantu cheu khat belte an tlaih hna i biahalnak an tuah hna, tiah theih a si. October thla lio zong ah Shan Yang khua ah gas dur pakhat a rak puak i, minung 3 an nunnak a liam i 30 leng hliamhma an rak pu cang tiah theih a si.

Tamu Ah CDM Sianginn Sayamah Pakhat SAC Ralkap Nih Thong 10 An Thlak, Sagaing ramṭhen, Tamu ah CDM sianginn sayamah pakhat cu SAC ralkap nih an tlaihnak kum khat hrawng a rauh hnu ah thong kum 10 thlak ding in bia khiahnak an tuah piak, tiah theih a si.
Tamu, Nan Farlong sang um Chaungnatkyi(ချောင်းနက်ကြီး) siangniamrun sayamah Honey Sukyi Zaw cu SAC ralkap nih, nizan November 21 ah thong kum 10 thlak ding in bia an khiahpiak hi a si.

“An tlaih hnu kum 1 hrawng a rauh ah kum 10 thlak ding in bia an khiahpiak. Anih hi a fapa kum 9 he a um mi a si i, mi ralṭha ngaimi sayamah pakhat a si,” tiah Honey Sukyi Zaw a hawinu pakhat nih a chim. Kum 30 tluk siangniamrun sayamah Honey Sukyi Zaw cu SAC ralkap nih a luancia 2021 November 23 ah an rak tlaih, tiah theih a si. Tamu ah sianginn sayamah Honey Sukyi Zaw telh in thong thlak ding in bia khiaknak a tuah piaktu hi pengkomh biaceihtu Hla Oo a si, tiah Tamu khuami hna nih an chim. Crd-The Chin Post

Be the first to comment

Leave a Reply

Your email address will not be published.


*