Thawngchia, Yangon Ah Mi Pakhat Meithal In Kah A Tong!!

Yangon Ah Mi Pakhat Meithal In Kah A Tong!

Yangon khuapi, Daw Pun peng, Kyi Su sang May hla ni 8 suimilam 5:00 leng hrawngah mi pakhat meithal in an kah nak kong cu tualchung um sinin thawng theih a si. Kyi Su sang Dammayet lam ah min theih lomi mipi hna nih min , Kum le umnak a dohhlettu mipakhat cu meithal in an kah i an tlik tak tiah theih a si.

” Meithal thawwng ka theih le cang ka in inn leng ah ka chuak , ka zoh i mi pakhat a thi he a ril ko mi cu ka hmuh a kah  tu mi zong theih a si lo, kah a tongmi zong theih a si lo.” tualchung um mipakhat nih a chim. Cu hnu caan tlawmpal a roh hnuah mibawmtu motor pakhat a rak ra i, an i kal pi tiah theih a si.

Cu bantuk thil a caan ruangah meithal in a kahtu hna cu Security phu hna nih a pawngkam hrawng ah le mah sang cungah cun a kal len i, meithal in a kap tu cu tlaih dingin hlethlainak an tuah cuah mah lio a si ko tiah theih a si.

Relchap, Tubantuk in kan rak langhtermi hi cmpage (Facebook) nih nizaan tihni May 5 ah kan pasalttha hna nih ram le miphun caah ti’n an nunnak an peknak konghe pehtlai in Europe ram um Lai miphun nih tthutpinak an tuah. Cu ah cun kan pa Dr Lian Hmung Sakhong zong aa tel ve, biahalnak tete zong an tuah, cu biahalnak chungin a lehmi hna cu tubantuk ah kan rak langhtermi a si.

Biahalnak ahcun hi dothlennak hi nangmah pumpak ruahnak ah zeitik tiang dah kan rauh lai i zeitik ah dah teinak cu kan hmuh te hnga tiah biahalnak an tuah, cu ahcun Dr Lian Hmung Sakhong nih tihin lehnak a tuah “Bawi Jesuh Khrih a rat lai hi mizeihmanh nih kan thei kho lo, a ni le caan cu rak ka hal hlah uh. Thaizing zongah a si kho, a tu ah Min Aung Hlaing kuttang rianttuanmi ralbawi tampi an lungtling ti lo. Philipine lio i Marcos tangah rianttuanmi an lungtlin ti lo tikah zaankhat ah a dih ko. Lybia zongah Gaddafi kuttang rianttuanmi ralbawi an lungtlin ti lo tikah an meithal an mer i a dih ko. Cu caah cun hibantuk tete zongah hin thlacam kan tthawn a herh, Pathian nih zeitindah khua a khaan lai kan thei lo. Lam tampi a um kho kanmah meithal zong in a dih kho an mah meithal lila zong in a dih kho.

Kan Bible ca zongah a um ko khah Judah miphun an ral nih an teituk lio hna caan ah Pathian sin ah thlacam in bawmh an hal i a thaizing an i tuk tikah raal pawl cu anmah le anmah an i palh i an i kap i an thi dih, Judah miphun pakhat hmanh an thi lo. Khabantuk thil kha kan sin ah a tlung lai lo ti kan chim kho lo, kan zumhnak hi a tthawn a herh, ralttha tein doh rih ko usih law Pathian nih a kan umpi ko lai, thil ttha lo a tuahmi nih zungzal an uk bal lo, Hitler nih ralpi cu a thawhpi ko nain sau a nguh kho lo khah. Mi ttha lo pawl uknak hi cu a rauh hlan ah an donghnak a phaan te ko lai, ralttha tein doh rih ko usih, a ni le caan hi cu ka hal ti hlah uh, a ni le khua kan chim mi a can lo ahcun lih chim kan si cang. Lih chim phung a si loh” tiah biahalnak cu a leh.

Cun Facebook ah miphun kong i a phunzai tukmi le thinhun tuk ruangah phunzai a hmangmi hna sin ah biacahnak zong a ngeih chih, nan zainak le duh paoh in ca nan ttialnak nih lungrual lo nak a chuahpi ti thei uh tiah a ti “Facebook chungah kan lung aa ruallonak kong, sivanghnak kong, aipuannak kong te hna hi chim lengmang hlah uh. Hibantuk caan i lungruallonak caa kan ttialnak nih khan mipi tamtuk ah thachiatnak a chuahter. Biachim holh rel rak i ralring uh” tiah a chim.

Tutan a chimmi hi a cunglei ah kan langhter cang bantuk in cmpage (facebook) nih tuahmi ngaihchiat tthutpinak le biaruahnak ah a chim mi a si, a chim mi tampi lakah a tawinak in kan rak langhtermi a si, cmpage ah tlamtling tein ngaih khawh le zoh khawh zong a si. Tubantuk dothlennak ah pumpak pakhat cio kan biapi, kan biachim holhrel ah siseh kan cawlcangh ah siseh kan i ralrin taktak kha biapi tuk hringhran. Cun Pathian sin thlacam hi kan daithlan lo zong a herh.