Thantlang Sianginn Sang ah SAC ralkap motor bomb a puak rih lo mi 3 a um, khuami ralrin a herh

August 25 lio CDF-Thantlang le SAC ralkap kahdohnak lio ah SAC ralkap nih motor in kah mi bomb 3 a puak rih lo mi a um i khuami nih lengchuah ralrin a herh, tiah min langhter lo mi khua upa pakhat nih The Hakha Times in ralrin peknak a tuah.

“Lau tuk le tih tuk ding a si lo. Asinain, khuami kan i ralrin nakhnga ka chim duh mi a si. Sianginn Sang Nitlaklei hoih Khuahel lam ah a puak rih lo mi 2 le Sopum lam hlun Khuahelnak lam duum chung ah 1 tiin motor bomb 3 a puak rih lo mi a um. Hihi anmah SAC ralkap pawl nih nihin August 28 ah khan laak ding in an timh cang nain i khamnak asiloah i runvennak thilri a herh ca ah an la manh lo,” tiah khua upa pakhat nih The Hakha Times ah a chim.

Hi motor bomb pawl hi 40 mm, 60 mm le 80 mm tiin an um i August 27 ah a puak mi kha 60 mm a si, tiah kan theih.

August 25 Thantlang kahdohnak ah kum 10 ngakchia pakhat mual a liam i minung 9 an rak i hliam. August 27 puahkehnak ah minung 2 an nunnak a liam i minung 11 hliam an tuar, tiah kan theih.

The Chin Post

Be the first to comment

Leave a Reply

Your email address will not be published.


*