RIP September 18| Pastor Cung Biak Hum Biak Kolh cu Thantlang ah SAC ralkap nih Market Sang ah an kah i mual a liam. Amah hi MIT, Yangon in sianginn a dih hnu, Thantlang TCBC ah Mino Pastor a tuan lio mi a si. Kan theih khawh nakhnga hlasakthiam Pi Sui Tha Par pasal a si.
Mizoram Chin Ralzaam hna ca ah bawmhnak hal mi Kyats sing 700 leeng an hmuh September 18 Myanmar ram buainak a chuah hnu India, Mizoram lei ah a zaam mi Chin Ralzaam hna bawmhnak ca ah online in fund an kawl mi India tangka in sing 30 a chuak tiah rian ngeitu hna sin in thawng theih a si.
Atu bantuk in bawmhnak an hal i tangka a chuak mi hi tawlreltu lei nih kan I tinhmi leeng in a chuak tiah an chim. Hi kong he pehtlai in bawmhnak hal lei ah rian ngeitu pakhat nih, “Ramchung kahdohnak ruang ah a rak zaam mi Chin ralzaam hna ca ah tiin, 2021 September 15 ahkhan ZOFATE GOSPEL CHARITY FOR MYANMAR ti mi tlangtar in hlasak thiam hna nih concert an tuah. Hi an tuahnak ah bawmhnak a chuak mi a thahnem ngaingai.
India tangka in Rs. Sing 30 (Ks. Sing 700 leeng) a chuak. Hi bawmhnak a chuak mi hi Chin Ralzaam hna ca ah kan hman lai,” tiah a chim. Bawmhnak an hal i, September 17 tiang a chuak mi dihlak Rs. Sing 30, Myanmar ram tangka in Ks. 74,000,000 a si. Myanmar ram ramchung buainak ruang ah Mizoram lei a zaam mi hi nihin tiang minung 10,000 fai cu an si cang lai tiah Mizoram mi nih an chim.
Mizoram ah a zaam mi chung ah sianginn a kai lio mi ngakchia minung an tam i, an umnak an i dornak khua ah ngakchia sianginn kai kho ding in Mizoram Cozah lei nih an tawlrelpiak dih hna tiah thawng kan theih. Hmanthlak: Mizoram ah ralzaam ca inn an sak lio – TheHakhaPost
Mizoram Aizawl khuapi chung ah vok zuat lo ding in AMC nih mizapi sin ah nawl hal – Aizawl Municipal Corporation (AMC) nih Mizoram khualipi a si mi Aizawl khuapi chung ah vok le ar zuat ti lo ding in mizapi sin ah nawl a hal tiah Vanglaini Meidia nih 2021 September 18 ah a tial. Vok le ar zuat ti lo ding in nawl an halnak kong he pehtlai in AMC Lutlai Mayor Lalrinenga nih, “Vok le Ar zuatnak nih hin khuapi thianhlimnak a hrawh.
Khuapi a thurhhnawmhter. Cun, mizapi ngandamnak zong a hnursuang ngai mi a si. Aizawl khuapi, Aizawl mizapi kan ngandamnak a that khawh nakhnga le Aizawl khuapi atu nakin kan sersiam khawh than nakhnga mizapi nih vok le ar hi khuapi chung ah kan zuatpiak hram hlah uh,” tiah mizapi sin ah nawl a hal. Cun, Aizawl khuapi ca ah thanchonak tampi zong tuah ding a um rih, rengh ding le siamremh ding zong tampi a umrihnak kong zong mizapi sin ah chimphuannak an ngei. Photo: Credit TheHakhaPost
Leave a Reply