Tlangcung hraimtlai phu khat cio in thaizing May thla ni 20 thawk in SAC ralhrang lutlai Min Aung Hlaing he ceihhmainak ngeih ding ah ton biaruahnak ngeih a si lai tiah theih as i. Tuni May thla ni 19 Nay Pyi Daw ah tuah mi thawngzamh thianh hlimhnak ah SAC ralhrang in chim nawl ngeitu Zaw Min Htun nih a chim.
” Thaizing thawk in ceihhmainak ngeih a si cang lai. A pakhat nak in ceihmainak ngeihtii hnga ding tlangcung hraim tlai phu cu RCSS/SSA a si lai. Ton biaruah ceihmainak ngeihti dingah an rak phan cang. ” tiah Zaw Min Htun nih a chim.
SAC ralhrang lutlai tonbiaruahnak ngeih ding ah talngcung hraimtlai phu hna laak cu RCSS, SSPP le KNU/KNLA-PC phu hna cu an mah phu hruaitu pawl an rak kai lai i, a tang mi phu hna cu phu chungtel aiawk tu an rak kai lai tiah theih a si.
A tu ah SAC ralhrang he tonbiaruah ceihhmainak ngeih ding ah NCA ah min a thu cia mi tlangcung hraim tlai phu 7 hna le NCA an min a thu rih lo mi thu 3 an rak kai lai tiah theih a si.
Relchap, India ram, Mizoram Aizawl khuapi ah Myanmar ralzam hna nih Nizaan May 18 ah thi hlutnak an ngei, Thi hlutnak ah minung 130 an kal i minung 100 nih thi hlut ding in min an pek ko hna 48 lawmg nih thi an hlut khawh. ”Min a pemi a tlawm deuh lawng nih thi an hlut khawh , a ruang cu an thisa a der tuk hna i pin ngandamnak zong nih a tlinh lotu hna an um hna, Hlasakthiam David Lai zong nih a thi a hlut ve, Thi an hlut mi dihlak Aizawl Civil Hospital ah pek a si ” tiah rianngeitu pakhat nih a chim.
Hi thi hlutnak program hi Myanmar ralzam lei cawlcang tu hna, Central YMA, Dawrpui YMA, Association for Voluntary Blood Donation( AVBD) hna hruainak in tuah mi asi . SAC nih uknak an lak hnu in Mizoram ah Myanmar ralzam 40000 hrawng an um i, India Central cozah nih ralzam cohlan le theihpinak a um lo nain Mizoram cozah, Biaknak, Zatlang bu le pumpak nih ralzam bawmhnak an pek hna.
Shan ramkulh thlanglei Nansan khua ummi journalist Than Soe Aung cu, Nansan biaceihzung nih May 18 ah Anti-Terrorism Law(အကြမ်းဖက်မှုတိုက်ဖျက်ရေးဥပဒေ) in thong kum 5 tla ding in bia an khiah piak, tiah biaceih zung he naihniam pakhat nih a chim. Than Soe Aung cu a luancia March 7 ah SAC ralkap nih an rak tlaih i Anti-Terrorism Law section 52(a) in taza an cuai, tiah a chimchap.
Than Soe Aung cu NUG le PDF he aa pehtlai mi thawng pakhat cu amah pumpak page ah a tar ti ruang ah taza an cuai. An tlaih thla 3 hnu ah bia an khiah piak hi a si, thlathum chung thong a umnak ah a dam lo i zunthlum zawtnak a ngei, tiah theih a si. Mandalay Ayeyawaddy News Agency i photo journalist, Zaw Zaw cu U Bo thong ah SAC ralkap nih an rak tlaih. A luancia April 10 zing sml 9:30 hrawng ah SAC ralkap nih an rak tlaih i, May 18 lawng ah an tlaih ti thawng cu a chungkhar nih an theih. Zaw Zaw cu Section 505(a) in SAC ralkap nih taza an cuai.
A luancia May 10 lioah journalist Maung Maung Myo zong Karen ramkulh Myawaddy khua in Mandalay a kal lioah SAC ralkap nih an rak tlaih. RFA nih cazin a khawmh ning in SAC ralkap nih, kum khat leng chung ah Myanmar ram chung um journalist an tlaihmi hna hi a tlawm bik 143 an tlaih hna i cu chung ah 3 an thi, tiah an langhter.
Leave a Reply