Watlet peng ah USDP Party chungtel nuva meithal kah an tong – Sagaing ramthen Watlet peng ah USDP party chungtel nuva cu Oct. 14 zing suimilam 11:00 ah Watlet – Shingmah lam Yonepinkung le Sataungni kar ah meithal kah an tong tiah khuami sin in theih a si. Shingmah khua thar i U Ting Tan (Kum 40) le a nupi Mah Yee Thant cu Watlet khua ah Covid rai kham sii an i chun i an kir lei ah kah an ton hi a si tiah khuami pakhat nih a chim.
Khuami pakhat nih “An nuva in Covid rai kham sii an i chun i Watlet in an kir lei ah kah an ton hi a si. An nuva in USDP party chungtel an si. An pa hi palek he zong aa theihngal ngai mi a si. Mizei phu nih an kah hna ti cu kan thei lo. An pa cu a hmun ah a thi colh i an nu tu hi hliam hma he a zaam i a tlau. Khoika a zaam kan hngal lo” tiah a chim. Credit: DVBE
Thantlang khuami hna nih an zaam taak mi thilri pawl motor 40 hrawng in an hung laak -m October 13, 2021 Raal ruang ah Thantlang khua chuah taak in a zaam mi khuami hna nih nihin, October 13 ah, an kal taak mi thilri cheukat cu motor 40 hrawng in an hung laak tiah theih a si. “Thantlang Khuami nih October 13 le 14, 2021 ni hnih chung thil laak caan kan ti mi ah nihin 13.10. 2021 ni tluang tein kan laak khawh hna,” tiah Thantlang Sipin Committee Chairman Pu Ram Khar nih Facebook ah a tial.
Vailam Tlang, Bual Peng, Zophei, Vanzang Tlang le Hakha lei in motor a hme he a ngan he 40 in thil sia herh mi cio an lak khawhnak le tluang tein anmahle umnak cio ah an kir khawh thannak zong a langhter. “Thaizing 14.10. 2021 ni cu a ho hmanh kal lo ah a tha. Kan nunnak a him kha biapi ah ruah a hauh caah kal lo ding si lai”, ti zong Pu Ram Khar nih a tialchih. Thantlang khua cu khuami hna nih caan karlak an chuah taak chung ah Council ralhraang pawl nih innzuat satil an fir hna lawng siloin inn tampi an bauh i thilri an fir tiah kan theih. TheHakhaPost
Leave a Reply