Tanh See khua cheukhat ah ralhrang nih minung 5 an thah hna,minung 12 an tlaih hna

Tanh See(တန္႔ဆည္) peng chung khua cheukhat ah ralhrang an lut i minung 5 an thah hna minung 12 tlaih an tong tiah khuami hna nih an chim.

August 26 ni hrawng in ralhrang minung 80 hrawng cu Ka Puang Ciah (ကာေပါင္က်) khua tel in khua cheukhat ah an lut i an inn lo an hrawh tiah an chim.

Nizaan in ralhrang hna cu khua chung in an chuak i khuami ruak 5 kan hmuh tiah khuami pakhat nih a chim.

Kum 30 a si mi Ko Moe Swe Oo cu a keng ah kuan hma in a thih kan hmuh i Kum 55 a si mi U Nyein Aung cu alu ah an kah i a orh lei kut a kiak tiah an chim.

“U Nyein Aung cu Lik Chen khua a si , kum 32 Ko Hyein Zar, kum 42 Ko Zaw Min Lay le aho ti theih lo mi ruak kan hmuh.Kum 21 a si mi Nay Naan Nuai cu aban ah meithal kuan nih a khenh” tiah khuami pakhat nih a chim.

Kan theih tawk ah inn 1500 leng kan zaam i atu ting cu fiang ten cazin kan la kho rih lo tiah a chim.

Khuami pakhat nih ” Ka Puang Ciah(ကာေပါင္က်) ah mei in an khangh mi innkhat, an hrawh mi inn 15 a si. A hme tete in an hrawh mi cu inn tampi a si.Tlaih a tong mi hi Lik Chen(လိပ္ၿခံ) khua ah minung 11 ,Minung pakhat cu zei khua a si kan thei rih lo. An zapi minung 12 an si.Mah chung ahcun mi phun dang ( mi chambau ) 2 an i tel” tiah a chim.

Ralhrang hna nih Tanh See(တန္႔ဆည္) peng khuate hna ah lut in an hrawh an kah an thah hna hi voi 7 hrawng a si cang tiah khuami hna nih an chim.

Nizan zaanlei ahcun Tanh See khua hna cu an hrawh i Depeyin(ဒီပဲယင္း) lei ah a ra mi ralhrang mawtaw 3 cu bomb puah an si i a thi mi kong hi theih a si rih lo.

The Chin Post