Kawlram mipi cungah zaangfahnak a ngei lo mi Taluk cozah’Petro China International Singapore’ company nih Jet Fighter Petrol cu ralhrangbu sinah kan hnu April thla ah khan a zuar tiah Reuter News a hlathlai ningin theih a si.
Mah hi February 1 ralhrangbu nih rampi uk nak a lak hnu a hmasa bik a cawknak a si, Tilawng he an rak phawrh tiah Reuter nih a tial.
Vanlawng Petrol a zuarmi Company pawl nih ralhrangbu sinah ralring ngai an zawrh hna, a ruang cu ralhrangbu nih tlangcung hriamtlai pawl Vanlawng he tuk nak ah mah vanlawng pertrol pawl hi an hman khawh ruangah a si tiah an ti.
Mah kong he pehtlai in Taluk ramleng pehtlaihnak vuanci sin biahalnak cu zeihmanh a leh lo bantukin Taluk Zinan sernak (China National Petroleum Corporation- CNPC) kuttang company pakhat a si ve mi Petro China zong nih zeihmanh bialehnak a um lo.
Phungningte in thanhnak um lo nain Petro Chin International Company nih ralhrangbu nih a cah mi Jet Fighter ti 13300 ton le Datsi ton 4000 a phurmi MT Yu Dong Tilawng cu Thilawah Lawngdinhnak hmun ah April 15 ah khan a rak phan tiah theih a si.
Taluk nih ralhrangbu sinah Vanlawng ti a zuar mi kong he pehtlaihin Justice for Myanmar nih “Taluk Petro China Company nih tlangcung hriamtlai pawl Vanlawng he a kah mi le sualnak a tuah mi ralhrangbu sinah Vanlawng ti a zuar mi cungah kan thinphang ngai” tiah a chimh.
Petro China International Company nih PUMA company le Myanmar Petroleum and Chemical Industry- MPE hna fonh mi NEPAS Co.Ltd sinah Vanlawng ti an zawrh mi pawl cu Fuel Business Owner (လောင်စာလုပ်ငန်းရှင်) pathum hna sin in Kawlram lei an pek tawn tiah theih a si.
Asian Oil Trade Zone nih Jet Fighter ti 79500 ton le Diesel 110700 ton cu kan hnu thla ah khan Vanlawng in Kawlram ah an phawrh tiah Singapore chawhlehnak lei riantuannak nih a langhter.
The Chin Post
Leave a Reply