Taiwan nih Vaccine maw Ramkhel dah Aa Thim Te Lai

Taiwan cu kan theih bantukin China nih ka ram a si a ti nain Taiwan nih Taluk kuttang um cu a duh bak ve lo. Tu nai ah Taluk nih Taiwan cu vaccine kan pek lai tiin vaccine he a lem nain Taiwan nih kan ram ah nawlngeih an duh ruangah a si tiin a pawm duh ve lo.

Corona Virus dohnak kongah mi nih an fak ngai mi Taiwan ah naihrong in zawtnak a karh than i kan hnu zarhte ni ah khan mi 21 nih an thi pi than tikah Covid-19 dohnak caah Vaccine a herh lio pi a si.

Taiwan nih a tu vaccine a ngeih mi hi an ram minung za ah pakhat tluk lawng a daih ding a si caah hripi doh ding caah vaccine cu loh theihlo in a herh mi cu a si. Mah hi Taluk nih a thei caah vaccine kan pek khawh lai tiah a rak ti ve.

A mahbelte cu Taiwan nih “mah hi Taluk nih kan ramah nawlngeihnak thuk deuh in ngei a duh caah a si, kan ram vaccine kongah ramdang an in rawlh kan duh lo. Ramkhel hlawknak duh ruangah vaccine supply timhnak zong kan duh lo. Vaccine pek khawh dingah tan kan lak lio a si” tiin Taiwan President Tsai Ing-wen nih a chimh.

Taluk pek mi vaccine hi a pawm si ahcun Taiwan mipi nih kan hruaitu pawl nakin Taluk nih a kan zohkhenh khawh deuh tiah lanh an duh lo bantukin khatalei ah Taipei mipi ngandamnak cu ruah lo awk a tha fon lo. Mah nih hin Taiwan hruaitu pawl thaw a pit ter ngai tiah Prof. Steve Tsang School of Oriental and African Studies, London nih a ti.

Taiwan nih mahten khuakhang lairelnak ngei a duh, Mah hi Taluk nih a duh bak ve lo caah virus maw ramkhel kong dah a biapi deuh? tih cu mi zapi nih ruah mi a si.

The Chin Post

Be the first to comment

Leave a Reply

Your email address will not be published.


*