2021 May 19 zingka suimilam 5 hrongah SSPP/SSA le TNLA te fonh ralkap 500 leng nih in SSA (South) tiah kan theih mi RCSS/SSA Tipaw peng Namlang, Manli khua hrongah a um mi hna cu an va kah tiah theih a si.
Khatalei ah ralhrangbu ROC 1 kuttang LIB 505, 506 battalion pahnih in SSPP le TNLA pawl cu an hnulei in 81 MM he an kah pi ve tiah theih a si.
SSPP, TNLA le RCSS te cu Namlang peng Kaungkhan, Sanka khua kar le Mantat khua chak lei, Mansein oksuh hna nikhat ah hmun 3 hrong an in kap. Nizan zongah an in kah nak hmun ah SSPP nih thazaang an kuat chap caah bu nih kar ah buainak a zual ngai tiah theih a si.
Shan hriamtlai bu hna kar i kahnak ruangah Sanka, Mantat, kaungkhan, Kungmung, Honam, Pansin, Kungnu khuami 1000 hrong cu Namlang le Mansein oksuh Phunki inn ah an zam cang, a tu tiang a rak zam mi an um peng rih ko tiah khuami pakhat nih an chimh.
SSPP/SSA le Ralhrangbu palai hna cu kan hnu April ni 8 ah khan SSPP hmunlipi Womhai ah an i tong i kan tlamtling ngai tiah ralhrangbu nih April 9 press conference ah an chimh.
RCSS/SSA cu Ralhrangbu nih uk nak a lak mi cu kan duh lo, Mipi he kan dir ti lai tiin cathanh a rak chuah cang bantukin an hmunhma chungah ralhrangbu he a kah pah lengmang mi an si.
Khatalei ah SSPP/SSA le TNLA hriamtlaibu hna i fonh in Shan ram chak lei Namtu, Tipaw le Kyaukme hrong um mi RCSS/SSA umhmun pawl an kah ruangah Mipi thong reng lo an tlik zam nak hi a si.
The Chin Post
Leave a Reply