Soe Win Nih Nu Talihhram Hi Baitak Tein Kan Doh Lai
========================
Kawlram leiin nu le pa sulanak, tlaihhrem nak kong he pehtlai in zeitik hmanh ah cohlang lomi timi hi kan kut i tlaiin tuanvo kan laak lai tiah SAC ralhrang lei in Duh-Bochohkyi Soe Win nih Kawlram nu ni ah a chim. Nu pawl cungah sahrang thiltuahnak pawl cu Upadi ningin himnak peek khawh dingah sahrang thil a tuah mi pawl cu phihkham himnak upadi cu tial piakin chuahpi khawh dingin biatak tein tuanvo kan laak ko tiah July ni 3 ah tuah mi Kalwram nu ni ah Duh-Bochohkyi Soe Win nih a chim.
Hi kongah ralral a si ah zeibantuk hmun a si ah nu pawl tlaihrem timi hi fak piin kan doh lai tiah a chim. Soe Win nih a tu bantuk in bantuk bia a chim cuah mah lio piah Kan Chinram Matupi ah SAC Major Win Naing nih Kum(17) cu Inn chung cia ah a Tlaihhrem tiah Juyly ni 2 ah theih a si.
KNU Brigade 1 hmunram, ThaTone peng ToneBuLay(ထုံးဘိုလေး) khua cu SAC ralkap nih an khangh caah inn 61 a ciam i, khuami pathum an nunnak liam, tiah KNU nih nihin July 4 ah cathanh an chuah. June 25 ah ToneBuLay khua cu an khangh i, phungki sianginn le cacawnnak sianginn a kaangh chih, tiah an langhter. Inn kaangmi lakah khuami pathum an ruh an hmuh hna. A nung in an khanghmi hna a si lai kho men, tiah KNU ThaTone peng thawng fianternak ṭuanvo ngeitu nih a chim.
Thah a tong mi hna cu ke khattelei a bulmi Saw Sa Mu(kum 39), Saw Maung(kum 55) le Zin Ti Htu Pawei(kum 54) an si. Ni 25 chung an pehtlai kho ti hna lo, tiah theih a si. KNU- ThaTone peng hmunram ToneBuLay khua khanghnak le khuami pathum thahnak kongah nuhrin covo a buartu SAC ralkap Tat Ma 44 le 22 kuttang BGF le a dang Battalion kuttang hna an i tel, tiah KNU nih an langhter.
Yangon ramṭhen, KaMaYut peng HleDan pawng ah nihin July zing sml 9:00 hrawng ah minung pahnih meithal in kah an tong i, pakhat cu a thi. Pakhat hliamhma pu. Kah a tongmi hna hi SAC ralkap thawng petu an si lai tiah zumh an si. “HleDan pawng ummi nu pahnih cu kah an tong. Pakhat cu a thi colh i pakhat hi aa hliam. An pahnih in SAC ralkap thawng petu an si. HleDan pawng dawr pawl cu an khar dih hna,” tiah tualchung mi pakhat nih a chim. HleDan dawr pe 50 lam cung le a pawng kam cu ralkap le palik nih lam an kham dih. Dawr zong an khar cio hna, tiah theih a si.
KNU brigade 3 hmunram Ngawnglaypin(ညောင်လေးပင်) pengkomh ah rallam a sualtu SAC ralkap nih Kyaukgyi(ကျောက်ကြီး) peng Lawmupe(လော်မူပယ်) khuami cu meithal in an kah hna i minung 4 an thih lengah pakhat hliam a tuar, tiah KNU nih an thanh. July 3 zaanlei sang ah Bohmu (ဗိုလ်မှူး) Za Ya Lin(ဇေယျာလင်း) hruai mi SAC ralkap nih Lawmupe khuachung an luhhnawh i khuami an thah hna leng ah mipi innlo an khangh, tiah theih a si.
Thah a tong mi hna cu kum 18 mino pakhat, kum 24 pakhat le midang 2 an si i, kum 30 tluk a si mi pakhat zong hliam a tuar. Inn 12, cycle 13, mawṭaw 1 le cycle pakhat an khangh tiah KNU nih an langhter. Tu chung hrawng hi SAC ralkap hna cu KNU hmunram ah thazaang tam ngai in rallam an sial tiah KNU nih an langhter.
Chin ramkulh, Falam peng Valung khua ummi mitlamtlinglo (holh thiamlo) Pi Tial Kap, kum 63 cu SAC ralkap nih June 30 ah an thah i, nihin July 3 ah khuami nih a ruak cu an hmuh tiah theih a si. Kalaymyo in a rak chuakmi SAC hna cu June 30 ah khan Valung khua ah zaan an riak. Nihin July 3 ah Valung khuami Pi Tial Kap ruak cu hmuh a si i, a lu ah meithal kahnak hliam hmuh a si tiah tualchung mi nih an chim. Nizaan July 2 ah Hlanzawl khuami mitlamtlinglo, a taitang zengmi pa pakhat cu a kut hnulei let in, hri ṭem bu in an thah, tiah tualchung mi sin in theih a si.
Myaung Peng Ah PDF Nih SAC Ralkap 4 An Thah Hna, Wetlet Peng Ah PDF 11 An Thi!: Nihin July 3 zinglei 11:30 ah Sagaing ramṭhen, Myaung peng Netyekaan(နတ်ရေကန်) le Yeposa(ရေိုးစား) khua karlak ah bomb zohfelnak ngei ding in a kal mi SAC ralkap hna cu bomb kuan in kah an si i ralkap 4 an thi i 3 hliam an tuar tiah Bo Nayto(ဗိုလိနေတိုး) nih a chim.
Cubantuk in, nihin July 3 zinglei ṭhiam ah Sagaing ramthen, Wetlet peng Myinywa(မင်းရွာ) a khangtu SAC ralkap 130 leng cu Tawgyi Myoipuai(တောကြီးမြွေပွေး) phu le PDF phufonh hna nih an kahdoh hna nain hriamthil an i thlau tuk ruangah PDF 11 an nunnak a liam i, SAC ralkap 2 an thi ve, tiah Tawgyi Myoipuai phu in rianngeitu pakhat nih a chim.
“Hi kahdohnak ah hin a thi le hliam tuar kan tam ngai i, kan rel khawh tawk hna ah minung 11 an thi, hliam tuar zong an tam ngai. Kahdohnak cu minutes 40 fai a rau i, Kanmah lei nih kan thok hmasa mi a si. Minung thazaang zong kan tam i kan ral zong ṭha ko nain kan hriamthil aa thlau tuk caah nunnak tam tuk a liam. SAC ralkap lei in 2 an thi ve,” tiah a Tualchung hriamtlai phu in rianngeitu nih cun a chim.
Wetlet peng ah Automatic meithal 100 hmanh a um lo buin SAC ralkap doh an si tawn caah tualchung ralkap lei in nunnak a petu an tam ngai cang. A rannak in meithal tampi le bomb kan herh hringhran ko, tiah mipi bawmhnak an hal. SAC ralkap hna nih cun Myinywa le Innginpin(အင်ကြင်ပင်) khua an khangh i tualchung mi hna cu a himnak hmun ah an zaam, tiah theih a si.
Leave a Reply