Kum 10 hnu Chennai: ‘ka saduhthah cu a tling ko nain…?’
——————
Bachelor of Science (BSc) ka rak kainak Loyola College le Chennai khua cu kum hra hnu ah ka va phan than. Riahnak kan ngei lo caan ah ka hawile cheukhat he kan rak riah tawnnak tlanglawng station zong ka va phan — zu, fikfa le mifir tampi lak zong ah kan rak i hngilh khawh ko kha ka mithlam ah a cuang than.
‘BSc ka dih in IELTS ka phi lai i England ah master ka peh lai, ka dih in sipuazi ka tuah lai i phaisa cuzat ka kawl te lai’ timi hi college ka kai lio ka saduhthah a rak si. Ka sining dihlak i pek in ka rak i zuam ve, Pathian zong nih aka dawt i kum 10 chung ah ka rak tinhmi leng in a thlawchuah aka coter.
Chennai ka rak um lio cu ‘mah ka saduhthah a tlin taktak khawh ahcun lunglawmh hnangam nak tling ka ngei te lai, ka duh a tling te lai’ tiah ka rak ruah. Atu cu kha lio ka saduhthah kha a tling cang ti khawh a si, nain ka rak i ruah chanmi lunglawmh hnangam nak tling a um hlei maw timi biahalnak tampi ka tuah than. Vawlei cu zeitluk i zuam zong ah duh a tling kho lo timi fiang ngai in ka vun pemh.
Duh a tling lomi vawlei a si caah a piangthar mi zong an duh a tling thlu kho ve hlei lo, chawva loin khuasak khawh a si ve lo tikah minung sinak in harnak an ton caan a tampi ve ko. Zeibantuk minung ca hmanh ah duh a tling timi a um kho lo. Bill Gates zong a nupi he an i then ko, Steve Jobs zong cancer in a thi ko. Billion in phaisa an ngei zong ah an duh a tling, lunglawmh hnangamnak tling an ngei timi a um kho lo, anmah le sining cio ah an lungnuam lonak le midang sining an hngar nak a um ve lengmang ko lai— a tling lomi vawlei ah kan um caah a si.
Tinhmi saduhthah ngeih, cucu phak khawhnak hnga i zuam cu a tha tuk. Nain, kan saduhthah a tlin zong ah kan duh a tling thlu kho hlei lai lo timi kan i fian ding a biapi tuk. Kan saduhthah lawng dawi in kan nunthluan caah a biapi vemi a dangdang kan tlolh dih sual maw timi i check lengmang a herh ngai. Kan saduhthah tlinh nak ding caah kan takpum zong hi a celh lo tiang in kan hrem sual maw timi zong tuak ngai a hau.
Nuamh caan a phak ah ai nuam kho i tuan caan a phak ah a tuan khomi, vah caan a phak ah a vak i chawva kawl caan ah a kawl khomi, ih caan a phak ah a it i thawh caan a phak ah a tho khomi, chawva zong a kawl kho i hman caan a phak ah a hmang khomi — hmailei kong ah lungrethei tuk in khuasak a hmang lomi — hna khi nuncaan man ngei bik in an hmang kho, an rum bik tiah kei nih cun ka ruah hna.
Kei zong kum hra chung ka saduhthah ka rak dawi nak ah ka tlolhmi tampi a um ve. Khirh ka duhmi tampi a um ko, nain khirh khawh an si ti lo. Kan tinhmi tampi kan tlinh ko zong ah zeitik hmanh ah kan duh a tling kho lai lo timi te hi tuan deuh ah rak pemh cang ninglaw tihi ka ruat ngaimi a si. Atu belte cu ka pemh cang.
Relchap, Zaporizhzhia Nuclear Power Plant Chekhlatnak Tuah Ding in Thiamsang Hna An i Thawh! Ukraine ram Zaporizhzhia Nuclear Power Plant cu chekhlatnak va tuah ding in International Atomic Energy Agency(IAEA) in thiamsang hna an i thawh cang, tiah United Nations Atomic Energy in ṭuanvo ngeitu nih a chim.
Zaporizhzhia chekhlat ding in a kalmi (IAEA) hna cu keimah nih ka hruai hna lai, Europe ramchung ah a lian bik mi Nuclear Power Plant cu ṭih a nun nakhnga lo felfai tein chekhlatnak kan tuah lai, tiah Rafael Mariano Grossi nih cun a chim. Tutan khualtlawnnak ah hin Nuclear he pehtlai in an tuahto ning cang kong ah phung an buarmi cu fiang hlang tein theih khawh a si lai, tiah Ukraine Ramleng Minister Dmytro Kuleba nih cun a chim ve.
Tutan chekhlatnak tuah ding mi cu Russia a lungtling nain Cu hmunhma ummi a ralkap kirter ding tu cu a duh lo. Zarhpi ni zingka ah Zaporizhzhia hmun ah Missile a tla i aho nih dah a kahmi a si cu theih a si lo, Cu kong he pehtlai in Russia le Ukraine cu pakhat le pakhat an i puh.
Tamu Peng, Witoke Khua Cu SAC le Pyusawhti Nih An Thlok i, An Thilri Zong An Fir, Sagaing ramṭhen, Tamu peng, Witoke(ဝိတ်တုတ်) khuathar; mipi nih an zaamtak cangmi cu an Khuabawipa hruainak in SAC ralkap le Pyusawhti nih an thlok i, thilri mansung hna cu an lak hna, tiah tualchungmi hna sin in theih a si. Thil mansung pin ah facang, chiti, puan, battery, solar, angki le tawhrolh tiangin an lak hna, tiah an chim chap.
Witoke khuathar, SAC khuabawi U Maung Tan nih cun NLD lei ṭangmi hna cu SAC ralkap a tlaihter lengmang hna ruangah mipi nih khua cu chuahtak in, an zaam dih. Khuachung ah cun SAC ralkap le Pyusawhti pawl lawng an um cang, tiah theih a si. Pyusawhti chungtel cheukhat hna cu SAC ralkap nih meithal an pek hna, tiah theih a si.
Sagaing Ramṭhen, Myinmu ah SAC Ralkap Mawtaw Bomb Puah An Tong I, Ralkap 2 An Thi: Sagaing ramṭhen, Myinmu peng, Gwaypintaw(ဂွေးပင်တော) khua le Boemingyikin (ဘိုးမင်းကြီးကင်း) khua kar ah SAC ralkap mawṭaw pakhat cu nihin August 29 zing suimilam 10:40 ah tualchung hriamtlai phu nih bomb lung 16 kan puahhnawh hna i, SAC ralkap 2 an thi, tiah Myaung peng tualchung hriamtlai phu CDSOM nih an thanh. Cu kahdohnak ah cun Myaung tualchung hriamtlai phu CDSOM, Toeme fighter(တူမီးဖိုက်တာ) le Myaung nu ralkap phu hna i bawm in an kah hna, tiah theih a si.
Mandalay Ramṭhen, Mogok Peng SAC Ralkap Le PDF Kahdohnak Ah SAC Ralkap 15 Hrawng An Thi, Mandalay ramṭhen, Mogok pengchung ah rallam a sialtu SAC ralkap hna cu Mokok PDF battalion 1221, 1222 le 1223 hna nih nihin August 29 zinglei suimilam 8:00 hrawng ah, Mokok peng Laungsin(လောင့်စင်) le Gwaypin(ဂွေးပင်) khua kar an phanh ah bomb kan chehhnawh hna i kan kah hna, tiah Thabeikkyin(သပိတ်ကျင်း) PDF battalion 1222 nih nihin August 29 ah cathanh an chuah.
“Motor lampi he pe 60 hrawng aa hlatnak ah hmunhma lak in SAC ralkap motor pakhat chung ah kutcheh bomb pakhat kan cheh khawh in, bomb(mine) lung 5 kan puah chap hna, cu hnu ah meithal zong in kan kah hna,” tiah battalion 1222 nih cun an thanh. SAC ralkap nih hriamngan in an leh ve hna caah minutes 30 hrawng kahdohnak a chuak, tiah PDF lei nih an langhter. Cu kahdohnak ah cun SAC ralkap 15 hrawng an thi i, tualchung hriamtlai phu lei hliamhma tuar um loin hnu an tolh, tiah theih a si.
Myittha Tiva Ah SAC Ralkap 3 Cu CDF-KKG Nih An Thah Hna: Magway ramṭhen, Gangaw peng Myittha tiva chaklei tlang in EPC zung lei ah cycle 2 he ralveng in aa chawk mi SAC ralkap 3 cu kan thah hna, tiah CDF-KKG battalion 5 in chimphuannak nawlngeitu nih media ah a chim.
CDF-KKG nih SAC ralkap ralvengtu hna cu nihnih chung kan bawh hna hnu ah nihin August 29 zinglei ah EPC zung luhnak hauka ah kan kah hna, tiah ṭuanvo ngeitu nih cun a chim. SAC ralkap hna cu KKG battalion 5, YDF-14 le Htilin chaklei PDF ṭaṭ-khuai 7 hna i bawm in kan kah hna, tiah CDF-KKG nih cathanh an chuah.
SAC Nih Uknak An Laak Hnu Ah Inn 30,000 Deng An Khangh Cang, Tiah Data for Myanmar Nih An Thanh! SAC nih uknak an laak kumkhat le cheu chung ah Myanmar ramchung ah inn khanghpiak a tongmi inn hi inn 30,000 deng an um cang, tiah Data for Myanmar nih cathanh an chuah. 2021 February 1 thawk in 2022 August 25 tiang ah inn 28,434 cu SAC ralkap nih an khangh, tiah Data For Myanmar nih an langhter.
Yangon Ramṭhen, Inya Tidil Chung Ah Mi Pakhat a Zuang: Yangon, Kamayuat peng Inya tidil chung ah pa pakhat cu nihin August 29, chunhnu suimilam 2:00 hrawng ah a zuang, tiah meithat zung lei nih an thanh. “Cu tidil chung ah a zuangmi pa cu kum 40 in kum 50 kar hrawng a si lai tiah zumh a si. Mi bawmchantu phu nih an kawl nain atu tiang ah an hmu rih lo,” tiah mithmutu tualchung mi pakhat nih a chim.
Minkin Ah Rallam A Sialtu SAC Ralkap Bomb Puah An Tong I, Ralkap An Thi: Sagaing ramṭhen, Minkin peng, Mauhkadaw (မောဣတော်) khua ah, rallam a sialtu SAC ralkap hna cu tuzing suimilam 9 ah tualchung hriamtlai phu nih bomb an puahhnawh hna, tiah theih a si.
Mauhkadaw nichuah lei, buddhist pathian(buddha) lem pawng i thingkung tang ah bomb kan hmanh. Bomb puahnak in palik bawi 1, SAC ralkap 2 le Phyosawhti 3 cu a hmun ah an thi colh i, midang 12 zong hliam an tuar, tiah Phyosawhti chungtel Pyophayeti (ပျူဖရဲသီး) ralkap pakhat nih a kan chimh, tiah tualchung hriamtlai phu in hruaitu pakhat nih a chim. Kanmah tualchung hriamtlai phu lei cun hliamtuar kan um lo, tiah a chim chap.
SAC nih rallam an sialnak hmun cu Mauhkadaw in Chindwin va ral, Taungphyo(တောင်ဖြူ) le Tunset (သွင်းဆက်) khua in Chindwin va lei ah a si, tiah an chim. SAC ralkap hna cu Kareni peng le Minkin peng ah rallam an sial caah khuami a thong leng cu a himnak hmun ah an zaam hna, tiah theih a si.
Kawthaung-Baukpin Lam Ah SAC Ralkap Motor Bomb Puahhnawh An Tong I Ralkap 3 An Thi, 8 Hliamhma An Pu, Tanintharyi ramṭhen, Kawthaung(ကော့သောင်း) pengkomh Kawthaung-Baukpin lam meng 48, Khamaukkyi(ခမောက်ကြီး) khua pawng ah nizan August 28, zing sml 8:55 ahkhan SAC ralkap motor 2 cu bomb kan puahhnawh caah ralkap 2 an thi i, 8 hliamhma an pu, tiah Local PDF nih an langhter.
Local PDF ralkap pakhat nih cun, “Pengkomh bawi nih cun meeting kai aa thawh lai ah motor pakhat a thlah hmasa. Cu motor chung ah cun ralkap tam ngai an i cit,” tiah a chim. SAC ralkap a phortu motor 2 cu Baukpin Pah Kah Pha le Kawthaung Pah Kah Pha hna i bawm in an doh hna, tiah theih a si.
Motor bomb puahhnawh an tonnak lampi thluan cu SAC ralkap nih check hlatnak an tuah lo nain Kawthaung khua chung ah mi chawkvai hna cu check hlatnak an tuah hna, tuah Kawthaung ummi hna sinin theih a si. Kawthaung khua, Aung Tu Kha sang um, peng biaceih zung le palik sakhan cu August thla chung ah PDF nih an rak kah cang.
Sagaing Ramṭhen, Kani Peng Tayetpin Khua Cu SAC Ralkap Nih An Khangh! Sagaing ramṭhen, Kani peng, Tayetpin khua cu nihin August 29 zing sml 7:30 hrawng ah SAC ralkap nih mei in an khangh, tiah theih a si. Inn 300 hrawng a ummi Tayetpin khua ah zan khat an riak i, khua in an chuah hnu ah atu bantukin an khangh, tiah theih a si.
“Kan khua kan zaam taknak hi nihnih a si cang. Kan khua cu nihin August zing ah an khangh i, Inn zeizat dah a ciamh ti cu kan hngal kho rih lo,” tiah Tayetpin khuami pakhat nih a chim. Tayetpin khua ah a riakmi SAC ralkap pawl cu Wawtan(ဝါးတန်း) khua lei ah an kal, tiah theih a si. SAC ralkap nih rallam an sial caah Tayetpin, Wawtan, Min U, Aingtaung, Minma hna telh in khuate 7 cu an zaam hna, tiah theih a si.
Myawaddy-Waylay lampi Ah Bomb Puahnak In SAC Ralkap 2 An Thi, 5 Hliam An Tuar! Karen ramkulh, Myawaddy-Waylay motor lampi, Kyawwabu (ကျော်၀ါးဗူး) Biakinn pawng ah umhmun a khuarmi SAC ralkap hna cu nizaan August 28 zanṭim ah KNLA tangrual phu, Federal wings le Copra ralkap hna nih drone in bomb an thlakhnawh hna i, ralbawi pakhat telhin, SAC ralkap 2 an thi, 5 hliam an tuar, tiah Cobra ralkap hna sin in theih a si.
Hliam a tuarmi lak ah ralbawi pakhat cu a hliamhma a faak ngai; a ke a bul i, a thih cu a thi rih lo, tiah an chim chap. SAC ralkap hna nih cun vanlawng le tanglei in; thazaang tam ngai in Copra ralkap hna umhmun an khuarnak hmun cu an nam i, Kyawwabu Biakinn pawng ah umhmun an khuar.
Myawaddy-Waylay lampi, Tebawbu(သေ့ဘောဘိုး) le Ukharihta (ဥကရစ်ထ) ralkap sakhan cu KNLA le KNDO tangrual phu nih an lak hnu in, cuka hmun cu SAC ralkap nih lak ṭhan an duh caah ralkap thazaang tam ngai chuah in kahdohnak an tuahnak a si, tiah KNLA tangrual phu hna nih an chim.
Karen Ramkulh, Matsalaung Tlang I Ummi SAC ralkap Hna cu KNDF le KA Nih An Kah Hna i, SAC Ralkap 3 An Thi!: Karen ramkulh, Bawlakhe(ဘော်လခဲ) peng, Matsalaung(မတ်စလောင်း) tlang ah umhmun a khuarmi SAC ralkap hna cu August 27 ahkhan KNDF le KA nih an kah hna i, cu kahdohnak ahcun Sniper tlaitu ralkap 2 telh in SAC ralkap 3 an thi, tiah KNDF nih cathanh an chuah. SAC ralkap hna nih Tuthla August thla laifang hrawng khan Karen ramkulh ah ralkap thazaang tam ngai an chap, tiah theih a si.
FTIMT le Falam Mobile Clinic Team Nih Man Lo Tein Mizaw An Zoh Hna, Falam Township IDPs Management Team (FTIMT) le Falam Mobile Clinic Team i bawm in nizaan August 28 ah Falam peng Taisun khua ah manlo tein mizaw an zoh hna, tiah theih a si.
Mizaw zohnak ah cun Falam in Doctor 4 le Nurse 7 an i tel i mizaw an zohmi hna dihlak hi minung 102 an si. FTIMT ṭuanvo ngeitu pakhat nih cun, “A tu hi khua 5 nak man lo tein mizaw kan zohnak a si cang nihin ah mizaw 102 kan zoh khawh hna, atu bantuk in mizaw mi hna zohkhenhnak ca ah phaisa a rak hluttu nan cung ah kan lung a lawm tuk,” tiah a chim.
Hi bantuk in rambuai lio le thawngpang chiat lio ah Kan khua Taisun ah zawnruahnak nganpi he a rak kan tlawng i mizaw a rak kan zohtu Doctor, Nurse le tuanvo ngeitu nan dihlak cung ah kan i lawm tuk, tiah Taisun khua upa pakhat nih cun a chim ve.
Misual Phu Nih Myinchan Khua Sui Dawr An Luhhnawh I, Kyats Sing Thongthum Leng Man Sui An Fir, Mandalay ramṭhen, Myinchan pengkomh Myinchan khua No. 8 sang ah ummi Wintsan sui dawr cu nizan August 28 zanlei sml 3:00 hrawng ah misual phu nih an luhhnawh i, kyats sing thongthum(300,000,000) leng man sui an fir, tiah Myinchan khua ummi hna sin in theih a si.
“Hmai aa hupmi minung 4 cu cycle 2 in an ra i, sui dawr a vengtu minung 2 cu meithal le namte in an tlerh hna. Ṭhut buin an baan an hlerter hna. Cu dih cun sui chiahnak thlalang an khuai i, sui cuai khat leng cu an fir,” tiah Myinchan pengkomh palik he aa naihniam mi pakhat nih a chim. Myinchan khua um sui a zuar mi pakhat nih, “Hi bantuk firnak hi a um bal rih lo, timhtuahnak ṭha tuk he an luhhnawhmi a si lai,” tiah a chim.
Sui dawr luhhnawhnak le firnak kong ah Myinchan palik nih hlathlainak an tuah, tiah theih a si. Mandalay ramṭhen, August thla chung ah sui dawr baohnak le luhhnawhnak hi voi 5 hrawng a chuak cang. Crd-The Chin Post
Leave a Reply