Nihin April 3, 2022 chunhnu suimilam 12:30 ah Salai Khin Maung Thein cauk “Chin Miphun Dohthlennak Tuanbia” cu Aizawl Khuapi Carson Baptist Church, Biakinn ah tlangzamhnak program ngeih a si. Cauk tlangzamhnak caan ah hin Pu Khua Uk Lian, Caṭialtu Salai Khin Muang Thein le Dr Van Nun Ham hna nih bawitawi chimnak an ngei i, Carson Baptist Church chungtel hlasak hna hna nih cauk tlangzamhnak ah a ra mi hla in an awih hna. Hi cauk tlangzamhnak ah hin Carson Baptist Chuch Pastor Zothanpuia nih thlacamnak a ngeih. Hi cauk ah hin cahmai 432 a um, a man ah ₹ 500 a si i, Copy 1000 nam a si.
Falam Ah Mirang Ca Cawnnak Tuah A Si Lai: Chin ramkulh Falam khuachung ah mei laak lo in Mirang ca cawnnak cu Chin Community College, FBC E&M le CSSDD hruainak in tuah a si lai, tiah theih a si. Cu mirang ca cawnnak cu kumtin tuah tawnmi a si i, April 4 in May thla dih tiang tuah a si lai. Cu mirang ca cawnnak ah cun kum-7 in kai khawh a si lai i, a huam mi poh nih man lo tein cawn khawh a si lai. Cu mirang ca cawnnak cu World Vision bawmhnak in tuahmi a si, tiah kan theih.
April 1-2 Tiang Ni 2 Chung Matupi-CDF Kahdohnak Thawng: April 1 ah Matupi-CDF nih an hmanh mi bomb(mine) cu SAC ralkap nih an i lamh i, SAC ralkap 3 an thi; hliam tuar mi zong an tam. Cun April 2 ah Chanpian(ချန်းပြန်း) khua pawng ah SAC ralkap le Matupi-CDF kahdohnak a chuak i SAC ralkap 6 an thi i tamlakte hliam an tuar, tiah theih a si.
SAC ralkap nih a pawngkam ramlak zong an khangh pinah Matupi ah umhmun khuar mi SAC ralkap thazaang an chap caah Matupi-CDF nih thlacampiak an herhnak kong mipi sin ah sawmnak he cathanh an chuah. Cred : The Chin Post
Leave a Reply