Dawtnak a neituk mi sakhi nih chiandeih cu a dawi ruang mang ko, chiandeih cu thin phan in a zam ruang mang ve ko. Tei nak cu dawtnak in a chuak mi asi. Dawt nak cu a ral a tha I tih a nei lo. A dawt mi caah cun thih a tihlo. A thinlung a thawng tuk caah tei khawh asi lo.
Mah kong ka tial duh hnawh nak a chan cu, kan ram le kan mi phun hi , kan dawt taktak maw ti hi asi. Ram le miphun a daw taktak mi hna cu, an zam bel lo. Sakhi nu nih fate a nei I, a fate cu a dawttuk I, sahrang nih an seh sual lai ti a phang tuk caah , kal tak lo in a pawng kam te ah um in, a veng peng. Cu lio ah sahrang hna lak ah a cak bik mi chiandeih nih sakhi fate cu a hmuh I, seh ding in a dum len ko. Mah cu sakhi fate I a nu nih a hmuh tik ah, a thinphang I ka neih chun ka fa ka dawt tuk mi hi, chiandeih nih a ka thah piak I, a ka ei piak ah cun, kei ka nun man sai tlai ti lo ati.
Cu caah a theih tawk a chuah ve I, sakhi nih cun chiandeih cu ati khawh tawk in, heh tiah hna hnawh nak a pek. A can a van sau cang I, chiandeuh pi cu a bei a dong I zam thluah mah ko. Sakhi nu nih a fa a dawt tuk I, a thi lai a phan tuk ruangah, a nun nak hmanh ruah kho lo in, a fa a veng him chiandeih pi chung sin in.
Tei nak cu dawt nak nih a chuah pi. Kan nih chin mi zong kan ram kan dawt taktak cun kan zam tak ding asi hrim lo. Ral tha tak le dawt nak taktak in kan ram kan veng ah cun, a ho hmanh nih an kan tei lai lo. A biapi mi cu kan ram hi kan daw taktak maw ti asi ko.
Sakhi hmanh nih a fate kha chiandeih kut chung in a khamh kho ah cun, kan nih Chin mi hna nih cun, kan ram hi rallokap hna kut in kan khamh kho hrimhrim lai ti hi a fiang tuk ko. Kan ram daw hna usih cun raltha in veng hna usih. Tei nak cu kan hmuh hrim hrim ko lai.
Leave a Reply