Sagaing ramthen, Ye Oo pengkulh Mun Tanpin khua cu SAC ralhrang nih May thla ni 10 ah an luh hnawh i sialngeilo mipi 22 nak tlawmlo an thah hna tiah theih a si. SAC ralhrang an thah mi hna an ruak cu, mei in an khangh hna, tikhulh chungah an peih hna, innsak mi tangah hna an an hrolh hna tiah theih a si. Cu pinah Mah khua te ah a um mi phungki sainginn Tanya pa 3 zong an tlaih hna i, khua chungah a um mi mipi suialngei lo 31 zong an tlaih chih hna tiah theih a si.
Mah an tlaih mi minung 31 chunagh minung 28 hna cu Human Shield ah an hman hna i, tanya minung pa 3 le adang a tangmi hna cu an thlah tthan hna tiah theih a si. Mun Tanpin khua pawngah a um mi, Hnaw Kung khua ah mipi inn pa 9, Innpin khua in inn 12, Chan Ta khua in 21, Sisung khua in inn 7, Tante khua in inn 2, Mun Tanpin khua in inn 29 hna cu SAC ralhrang nih an khangh piak hna tiah theih a si.
Relchap, Kayin ramkulh, Demoso ah ralzaam panga nih an zulh mi motor pakhat cu lam thlanglei khor ah a tla i, motor cung cuang mi minung 5 chung in 3 an nunnak a liam, 2 cu faak ngai in an i khawng, tiah theih a si. Accident a tong mi motor cu ft 400 tluk a thuhnak khor ah a tla, tiah theih a si. “Motor chung ah a cuang mi minung 5 chung in 2 cu a hmun ah an nunnak a liam colh. Faak ngai in aa khawng mi minung 3 cu mizaw phortu motor nih sii-inn ah an kalpi hna i, sii-inn an phanh ah pakhat cu a nunnak a liam ṭhan. Midang 2 cu thlopbul cuahmah lio an si,” tiah tualchung thawnglatu Roselin Ei nih a chim. Nunnak a liam mi hna cu Demoso pawng hrawng ah ralzaam dirhmun in a um mi an si, tiah theih a si.
Nattalin Peng Ah PDF le SAC Ralkap Kahdohnak a Chuak I SAC Ralkap 5 An Thi: Bago ramṭhen, Tayawady pengkomh Nattalin peng Gwaygyi(ဂွေ့ကြီး) khua pawng ah SAC ralkap le Nattalin PDF an i kap i, cu kahdohnak ah cun SAC ralkap 5 an thi, tiah theih a si. Nihin May 12 zinglei suimilam 8:00 hrawng ah Gwaygyi (ဂွေ့ကြီး) khua le Kyaukpyauk (ကျောက်ပြုတ်) khua kar ah a lut mi SAC ralkap minung thazaang 20 hrawng cu Tayawady pengkomh PDF battalion 3801 le Nattalin PDF nih bomb an puahhnawh hna i, kaphnih kahdohnak nih a pehzulh, tiah Nattalin peng PDF in chimphuannak nawlngeitu nih a chim. SAC ralkap lei cu 5 an thih hnu in, hnu an tolh i, minung 20 lak ah minung 9 hrawng lawng an kir, tiah a chim chap. PDF lei hliam tuar um lo in hnu an tolh nain, kahdohnak ruangah Gwaygyi (ဂွေ့ကြီး) khua mipi hna cu ralzaam dirhmun an phan i, umnak le eiding kongkau ah harnak an tong, tiah theih a si.
Magwe ramṭhen, Yesagyo peng ah inn a khaangtu SAC ralkap hna le tualchung hriamtlai phu hna cu nihin May 12 zinglei ah an i kap, tiah theih a si. SAC ralkap hna cu May 11 zinglei ah Yesagyo pengchung NanOo khua ah zaan an riak i, nihin May 12 zinglei ah nichuahlei Taung khua ah rallam sial in, khuachung inn an hrawh lio zinglei suimilam 9:00 hrawng ah kahdohnak a chuak, tiah Yesakyao PDF in hruaitu Hmai Tae Zah nih a chim.
Kahdohnak cu a rau lo nain SAC ralkap 4 an thi i, Tualchung hriamtlai phu lei cun hliam tuar an um lo, tiah theih a si. Rallam a sialtu SAC ralkap hna hi Sagaing ramṭhen in Magwe ramṭhen ah a phan mi an si. Ral tu ding nakin mipi hrem i, harsatnak pe ding in le khuachung inn khaang ding in timhtuahnak he a ra mi an si, tiah Hmai Tae Zah nih cun a chim chap.
SAC ralkap hna cu Yesagyo People’s Defense Force battalion 2 le KNT pah-kah-phah phufonh nih an kahdoh hna, tiah theih a si. Rallam sialtu SAC ralkap hna cu a luancia caan zong ah Yesagyo peng khuachung ah voi tampi rak lut in, mipi umnak inn an hrawh i, sui le mansung thilri leng ah thilri dang zong an fir hna, tiah tualchung mi nih an chim. May 9 le 11 ah Yesagyo peng, Yelaykyun (ရေလယ်ကျွန်း) ah SAC ralkap le tualchung hriamtlai phu hna cu an i kap i, sniper kahnak in SAC ralkap 3 an thi, tiah MG 6 pah-kah-phah phu nih an thanh.
Leave a Reply