Pathein Thonginn Ah Thih-dan Pekmi Minung 2 Le Thih Tiang Thong Thlak Ding Minung 5 An Um!:
=================================
Ayeyarwaddy ramṭhen, Pathein thonginn ah phungning lo in tlaih a tongmi ramkhel lei thongtla hna chung in thih-dan pekmi minung 2 le thih tiang thong thlak ding in bia ceihpiakmi 5 an um, tiah thonginn rianṭuantu hna sin in theih a si. Thih-dan le thih tiang thong thlak ding in biakhiahnak tuahpiak mi hna cu Insein thonginn in Pathein thonginn ah ṭhialmi an si i, thih-dan pekmi hna hi Yangon ramṭhen Shwepohkan (ရွှေပေါက်ကံ) myotit in Ko Kyaw Kyaw Naing le Ma Hlah Hlah, nupa an si tiah thonginn rianṭuantu pakhat nih a chim.
Thih tiang thong thlak ding in biakhiahnak tuahmi hna cu Yangon ramṭhen, Shwepyita(ရွှေပြည်သာ) peng in Ko Hlaing Min Kyaw, Ko Aung Phyo Twin, Taketa(သာကေတ) peng in Ko Zin Min Htun le Hlaingtaya(လှိုင်သာယာ) peng in Ko Zaw Win Myint le Ko Aung Ko Ko hna an si. “Thih-dan pekmi nupa hna cu September thla, 2021 khan Pathein thonginn ah an phan. Thih tiang thongthlak dingmi hna cu January thla, 2022 in Pathein thonginn an phan ve. An dihlak 7 ning in Insein thonginn biaceihzung nih biakhiahnak a tuah hnu ah Pathein thonginn an an phan,” tiah thonginn rianṭuantu pakhat nih a chim.
Biakhiahnak tuahpiak cangmi ramkhel lei thongtla 7 hna cu, thongtla dang he hmunkhat ah chia lo in a dang tein an chiah hna, an ngandamnak zong a ṭha ko, tiah a chimchap. Myanmar ramchung thonginn hmunkip ah thih-dan pek ding in biakhiahpiak a tongmi dihlak hi 70 leng an si cang, tiah AAPP nih a thanh.
Relchap, Tunbia duhtu caah, Lothlopa Tuanbia, Ni khat cu, Jesuh cu rili kam in mi tampi a cawnpiak hna. Minung cu tam tuk hringhran hna kaw, lawng chung ah a kai i cu kaa cun bia cu a chim. Jesuh nih tuanbia pakhat a chimh hna. “Lothlopa pakhat cu thlaici tuh awk ah aa thawh. A kut chung in thlaici cu a theh tikah a cheu cu lam cung ah an tla i, va an rak chuak i an char dihl.”
“Thlaici dang cu vawlei um setsailonak lung lak ah an tla. Lung lak vawlei i a tla mi thlaici cu khul rang ngai in an hung keoh. Nain ni a hung chuak i, khua a linh tikah, an uai zau i, an hram thuk hna hlah kaw an thi dih.” “Cheukhat thlaici tu cu hling bur lak ah an tla. Hlingbur nih a zik hna i an voi kho lo.”
“Thlaisi dang cu vawlei ttha cung ah an tla. Cu thlaici cu an keoh i, a let 30, 60, silole a let 100 tiang tam in an voi. Hna a ngei mi nih cun thei ko hna seh!” Cu tuanbia nih cun a zultu pawl cu an lung a tuai hna. Jesuh nih, “Thlaici nih cun Pathian Bia a aiawh. lam cung i a tlami thlaici cu Pathian Bia a thei ko nain a hngalthiam kho lo mi hna, cu ruang ah an theih mi bia zong cu an sin in khuachia nih a lakpiak tthan hna, ti chim duhnak a si.”
“Lung lak vawlei i a tla mi thlaici nih Pathian Bia a thei i lawmhnak he a pom colh mi hna a aiawh. Nain harnak le hremnak a tlun tik tu ah cun an zumhfehnak an ngeih lo ruang ah an tlu tthan tawn.” “Hling bur lak i a tlami thlaici cu Pathian Bia a thei i a zum mi bantuk an si. Nain caan a hung rau deuhdeuh i, Pathian an ttanhnak cu vawlei thil dangdang rumnak le nuamhnak tehna nih a dawrh dih tawn. An theihmi cawnpiaknak nih an nun ah thei a tlaiter kho lo.” “Vawlei ttha ah a tla mi thlaici nih cun Pathian Bia a thei, a zum i, thlarau theitlai a tlai mi hna a chimduh,” tiah a ti.
Pehrih, NGATAINU, Hlan lio ah khua pakhat ah nufa an rak um. A fanu cu a min ah Nga Tai tiah a auh. Nga Tai cu aa dawh tuk ah hin a hmumi paoh a duh lomi an um lo, zoh an rak cim hrimhrim lo. Mikip nih an dawt, a pumrua that le a tungtai rem lengah a hmaithlak hrim hi a rak I dawh tuk ti a si. A mitmu hrimhrim hi thipum fang dawh in aa dawh I a mit-au nih zing niceu bang a rak I dawh ti a si. A samthlai nih le aa rem i a ziaza le tha kaw, nu sinak a tlinh lengah a aw a nem i a pawngkam a ummi paoh nih an lawmh dih tawn.
Kum khat cu ruahpi a sur ciammam i a han kho ti lo. A fak chin lengmang i ti a lian thluahmah. Cucaah an inn le an lo zong a phum thluahmah. Mi vialte cu an inn an lo chuah tak in ti nih a phak rih lomi tlangcung ah an kai dih. A kai kho lomi cu ti nih a phum hna i an thi len cang. Ti cu a thang chin lengmang i tlang cu phum dih a timh cang. Saram pawl zong tlangsannak cu an panh cio. Minung le satil saram hna cu tlang a sannak bik ah cun an i sual len hna. “Zeidah a cang hna?” tiin zapi cu khuaci mui in an tap, an ai, an hram len.
Ti cu a thang chin lengmang i “Tai, Tai, Tai” tiah Nga Tai min chim pah in tlangpar cu a hun naih chin lengmang. Ti awthawng cu an theih tikah “Ti nih hin Nga Tai hi a duh caah a si ko,” tiah an ruah. A sam pakhat an phawi i ti lak ah an thlak. “Tai” a ti i ti cu tlawmpal a vung zor. Asinain a rauh hlan ah a hung thang than. A angki an thlak than. “Tai” a ti i ti cu a vung zor deuh nain “Tai, Tai” a ti i a hung thang than lengmang. Cuticun Nga Tai sam le thilri le a hnipuan cu an thlak dih cang.
NGATAINU: Ti cu “Tai, Tai” a ti i tlang ah a hung kai chin lengmang. Khuakhan awk an hngal ti lo i a donghnak ah mi vialte thihnak cha cun minung pakhat thih a tha deuh lai, an ti i Nga Tai cu thlak an timh. Asinain a nu nih, “Kanmah sual ruangah kan tonmi a si tung lo, zeiruangahdah ka fanu theng cu kan thlak in kan thither lai,” a ti i a siang lo. A fanu cu fekte in aa tlaih I zapi he an i chut len, a donghnak ah an chuh khawh i Nga Tai cu a tah a ai bu in tilian ahcun an vun paih. Tilian chungah cun Nga Tai cu a vung pil zuahmah. A nu nih a tahbu le a hrambu in, “Ka fa dawt sian lo, Nga Tai aw… nang ngami ah vung i cang law,” tiah a cah ta, ti a si.
Nga Tai cu a nu bia bang ngami ah aa cang taktak. Cucaah ngami cu minung bantuk in hnuk a ngei I taw zong aa ngeih venak a si an ti. Nga Tai nu cu a lung a leng tuk. A fanu zun in a zaw zungzal, ti a si. A fanu zung cu a tuar i ei le din zungzuam lo le tuan zaang tlung lo in a um. Mi thil he fing le tlang kip a cult awn.
Aa chokvak lengmang i tlangsang kip hin khua za a cuan tawn. A umhar le a lunglen celh loah thiam tal ka bang lai a ti I thiam tial baannak dingah tlangsang le tlangdawh a kawl I a donghnak ah tlangdawh ngai pakhat a hmuh i cuka cun thiamtah aa thawk. Thantlang peng Khualhring tlang chungah tlangsang ngai pakhat a um i, cu tlang cu “Ngatai nu tlang” tiah atu tiang auh a si. Pupa chan ah cun Nga Tai nu thiamruak zong a rak um, an ti. Nga Tai nu tlang ah cung thiam a tak i Falam peng Ramthlo khualu Zinghmuh tlang ahkhin a thiam tlang a rak sih.
Nga Tai nih a nu thiam a tah le a lunglen kha a theih tikah minung in a hun i langh i a nu cu a hung veh tawh, ti a si. A nu sin a phanh tikah a taitang cu nga a si i a tai cungcu minung a si. Minung bantuk in minung sin ah um awk a that lo caah caansau um lo in ti chungah a kir than tawn. A nu a thih hnu zongah Nga Tai cu tlang ah a kai tawn i a nu um tawnnak kha lungleng le ngaihchia in a rak cult awn. Kha ti tlang i a kai kha minung nih an hmuh tawn i ngaknu dawh tuk a si fawn, a tai tang nga a si fawn tikah a hmumi kip an khuaruah a har i a min ah Ngatainu tiin an auh colh ti a si.
Leave a Reply