SAC Ralhrang Sinah Mipi Ralkap Pakhat Aa Fonh!!

SAC Ralhrang Sinah PDF Pakhat Hriamnam A Chiah!
==================================
Nizaan zingkaa tuan deuh ah suimilam 1:00 hrawngah Sagaing ramthen, Wetlet pengkulh, Shwe Paan Kung police sakhan ah Wetlet pengkulh PDF pakhat cu hriamnam he SAC ralhrang sinah a mah pumpak in a pum aa up tiah theih a si.Cu pinah Nizaan zaan suimilam 9:00 hrawngah Magwe ramthen, Thilin khuapi sang 2nak ah a um mi U Aung Than Win le an nu Daw Kyi Tin le an fa nu Ma Ya Min Eaih hna pathum cu an inn ah hraimnam bomb a tlak sual ruangah hraim an tuar ii Thilin siizung ah an kal pi hna tiah theih a si.

Nizaan chun lai suimilam 1:30 hrawngah Sagaing ramthen, Botalin pengkulh, Myo Kyi khuate pawng gate ah khualtlawng pahnih cu SAC ralhrang nih zohfelnak tuah dingah an dir ter hna ii an dir duh lo caah meithal in an kahthah hna pinah hraimnam an laak piak chap hna tiah theih a si. Nizaan zinglei suimilam 6:00 hrawngah Sagaing ramthen, Katha penghlulh Pyin Ma Hlut khuate ah a um mi dalaan U Yan Naing Oo le U Than Myint hna cu PDF nih an tlaih hna tiah theih a si.

Pago ramṭhen, NguangLayPin(ညောင်လေးပင်) pengkomh, KNU Brigade 3 hmunram KyaukKyi(ကျောက်ကြီး) peng ah June 25 le 24 ah KNLA le SAC kar kahdohnak voi 3 a chuak i, SAC ralkap 14 an thi, tiah KNU nih nihin June 27 ah cathanh an chuah. June 25 zing sml 7:00 hrawng ah NgaBiatInn(ငဗြက်အင်း) khua le InnNet(အင်းနက်) khua karah ral tuk bawmh ding a rami SAC ralkap Kha Ma Ya 439 Battalion in ralbawi 1, ralkap zohkhenhtu(sergeant) 1 le lam hmuhsaktu Than Lwin hna cu Sniper kahnak in an thi, tiah theih a si.

“Atu hrawng cu kahdohnak a chuak peng. KyuakSaYit(ကျောက်စရစ်) sakhan kah an tong i Battalion 439 nih an rak bawmh hna. June 25 zinglei ah InnNet lei in rallam an sial. Rallam a sial mi hna cu Sniper in an kah hna caah Battaliin 439 in ralbawi 1, ralkap zohkhenhtu(sergeant) 1 le lam hmuhsaktu pa cu an thi,” tiah tualchung mi pakhat nih a chim.

KNU nih cathanh an chuah ning ah Kyaukkyi peng nihnih chung kahdohnak ah SAC ralkap le lam hmuhsaktu telh in 14 an thi. SAC ralkap pawl nih InnNet khua le YanMyoAung(ရန်မျိုးအောင်) khua cu hriamngan in an kah, tiah an langhter. KyaukKyi peng ah kahdohnak a zual i, SAC ralkap nih hriamngan an kah tuk caah KyaukKyi peng khuate 15, milu in a thong leng cu a himnak ah an zam, tiah tualchung mi hna sin in theih a si.

June thla chung ah Rakhine ramkulh, Sittwe le Punarkyawn(စစ်တွေမြို့နှင့် ပုဏ္ဏားကျွန်း) khua in tualchung mi 29 cu, SAC ralkap nih an tlaih hna, tiah AA nih cathanh an chuah. A luancia June 23 ah Sittwe khua ah SAC ralkap nih, tualchung mi 21 an tlaih hna, cu chung ah kum 18 tling rih lomi minung 3 an i tel, tiah June 25 ah AA nih an langhter.

June 16-26 tiang ah Punakyawn khua in tualchung mi 8 cu SAC ralkap nih an tlaih hna i, kum tling lo pakhat aa tel. Cu pinah Kyauktaw le MyoOo(ကျောက်တော်နှင့် မြောက်ဦး) khua in tualchung mi 20 leng SAC ralkap nih an tlaih hna, tiah tualchung mi hna nih an chim. June thla thawk in Rakhine ram chung peng 4 AA nih, SAC ralkap le palik an tlaihmi hna hi 18 an phan cang. AA sinah aa zammi SAC ralkap le palik hi a thong leng an si cang, tiah June 4 thawng fianternak tuah lioah AA in chimphuannak nawlngeitu Khine Tuh Khah nih a chim.

Covid zawtnak khamnak caah tiin hnar chungbl toih mi sii-ai cu Thailand ramchung scientists nih an serchuah. An sermi sii-ai cu hman dingin an chuah rih lo nain research an tuah ningin a tha ngai tiah an chim. Sii thazang riantuan ning cu a bikin covid zawtnak a chuahter khomi Sars-Cov 2 virus hna cu chunglei ah lut lo dingin a kham tiah an ti.

Mah sii cu Bangkok khuapi Chulalongkorn University ah siibawi hna telh in cozah le mithiam hna i bawm in an serchuah. Hneksaknak an tuah cuahmah liomi zawtnak khamnak sii cu Prototype level a phanmi cu Antiboby hmangin hnar chung toih dingin an serchuah.

Research an tuahmi cu biatek tein zanghleicawi in an tuah nak ah Antibody sersiam ningcang zong a thar in an hmuhchuah. Taksa chungin covid zawtnak cu kham kho dingin minung pumsa thazang thawnter ningcang zong an hmuhchuah tiah sianghleirun i associate professor nih a chim. An serchuah liomi sii cu hnar chungin zawtnak a lutmi virus cu kham kho dingin tuahmi a si. Covid zawtnak virus i chawnh khawhnak bik cu hnar hi a si fawn.

Hnar kua chungah Antibody hmang in virus zawtnak lut kho loin a phihkham hnu ahcun zawtnak virus cu tih ding a um ti lo tiah associate professor nih a chim. Hnar chung toih mi sii cu tha tein zohfelnak an tuah dih hnuah rinhawktlakmi dirhmun a si ahcun Thai cozah department FDA sin ah nawlpeknak catlap kan laak lai i, kum dongh hlan ah zuar khawh colh dingin ruahchannak kan ngei tiah a chim chih.

Sagaing ramṭhen, BanMauk peng thlanglei ah rallam a sial mi SAC ralkap cu, PDF nih nizan June 26 ah bomb in an puahhnawh hna caah ralkap panga an thi, tiah theih a si. Rallam a sial mi SAC ralkap pawl cu, Kathar pengkomh Battalion 2 le PDF ṭangṭi phu hna nih bomb in an puahhnawh hna i ralkap panga an thi. PDF ṭangṭi lei in a thimi le aa hliammi an um lo. PDF nih bomb an puahhnawh dih hna in SAC ralkap nih hriamngan he hriamhme he an kah tuk caah, pawngkam khuate hna cu a himnak hmun ah an zam dih, tiah theih a si.

Post Views: 13

SAC Ralhrang Sinah Mipi Ralkap Pakhat Aa Fonh!!

Be the first to comment

Leave a Reply Cancel reply