SAC Ralkap Vanlawng Mawngtu Lieutenant Colonel Kyaw Kyaw Htun A Inn Bomb Puahhnawh A Ton Caah Hringtu A Nu Ai Hliam
==============================
Yangon ramṭhen, North Ukalarpah(ဥက္ကလာပ) pengah a ummi SAC ralkap vanlawng mawngtu(pilot) Lt. colonel Kyaw Kyaw Htun a inn cu nizan October 11 zan sml 8:00 hrawngah bomb a puak i, Kyaw Kyaw Htun hringtu a nu hliamhma a pu, tiah tualchung mi hna nih a chim. Operation Spitfire nih Yangon ramṭhen chung ummi SAC ralkap vanlawng mawngtu min cazin an langhter hnuah Lt. Colonel Kyaw Kyaw Htun a inn bomb puahhnawh a ton hi a si.
“Lt. Colonel Kyaw Kyaw Htun a inn ah bomb a puak i, a hohmanh a pawngkam minung an chuak ngam lo. SAC ralkap zong an auh ko hna nain, an rat kan hmu lo. Kyaw Kyaw Htun a nu cu a ke ah hliamhma a pu. Annih hi hmundang ah a zammi an si i, an inn an rak kirnak zarhkhat a tling rih lo. Kyaw Kyaw Htun nih lamzawhtu mino le CDM palik bawi pa a inn zong a hrenhpiak hna pinah CDM sianginn cachimtu hna zong a hrocer hna,” tiah tualchung mi pakhat nih a chim.
SAC ralkap nih vanlawng hmang in Sagaing, Magway, Rakhine, Kachin, Chin le Karenni ramkulh ah bomb an thlak i, tualchung mi an thah hna pinah Sagaing ramṭhen, Depeyin peng ah a luancia September 16 ah Letyakone(လက်ယက်ကုန်း) sianginn cu Helicopter in bomb an rak thlak caah siangakchia a thimi le aa hliammi an rak um. Crd-The Chin Post
Relchap, Pathein Thonginn Ah Ramkhel Lei Thongtla An Damlo Caan Ah Sii Thlopnak A Har, Ayeyarwaddy ramṭhen, Pathein thonginn ah ummi ramkhel lei thongtla damlo mi hna caah sii lei i thlop a har tiah thongtla chungkhar he naihniam in ummi nih an chim. Pathein thonginn ah ek inn le ti a thian lo caah pawfah zawtnak a ngeimi hna le zawtnak dang a rak ngei ciami hna cu a hleiin Kal fah zawtnak nih a phak colh hna tiah theih a si.
Ramkhel lei thongtla chungkhar pakhat nih “sii ai kongah harsatnak a um, thonginn chung ah sii hi fawi tein pek chanh khawh a si fawn lo” tiah a chim. Cu thonginn ah cun ramkhel lei thongtla 100 hrawngah ekinn 2 pek an si, anmah le caan te lawngah kal khawh a si caah harsatnak tampi a um tiah luatnak a hmu cangmi thongtla hna nih an chim. SAC ralkap nih hramhram uknak an lak hnu in Pathein thonginn ah ramkhel lei thongtla 400 hrawng an um i, biaceihzung nih biakhiahnak tuahpiak cangmi hi minung 100 hrawng an si tiah theih a si.
Daw Aung San Suu Kyi Kum 3 Thong An Chap Caah Thongthlakding Biakhiahpiakmi Kum 26 Tiang A Phan, Myanmar rampi ruahnak petu le hruaitu Daw Aung San Suu Kyi cu SAC ralkap nih sualpuhnak a-hmuh 2 caah kum 3 chung thong thlak dingin October 12 ah biakhiahnak an tuahpiak chap ṭhan caah, thong a tlak ding kum dihlak hi kum 26 tiang a phan cang tiah theih a si.
Rampi ruahnak petu le hruaitu Daw Aung Dan Suu Kyi cu businessman U Maung Wat sin in American dollar sing 5 le cheu a lak tiah sualpuhnak an tuahmi ca ah le poh-mah 55 ca sualpuhnak an tuahmi ca ah, kum 3 thongthlak ding an chap piak hi a si. SAC ralkap nih Daw Aung San Suu Kyi cu sualpuhnak phun 12 an tuah i kum 23 thong thlak ding in biakhiahnak an tuahpiak cangmi a um ca ah thong a tlakding kum dihlak hi kum 26 tiang a phancang. Cun SAC ralkap nih Daw Aung San Suu Kyi cung ah sualpuhnak an tuahmi phun 5 ca ah biaceihpiak ding a tang rih tiah theih a si.
SAC Nih Thimnak A Tuah Dingmi Cu Kan Hrawh Hrimhrim Lai – NUG Acting President Duwa Lashi La, A ra laimi 2023 ah SAC nih a tuah dingmi thimnak cu a si khawh chungin kan hrawh hrimhrim lai, tiah NUG caan kar lak President Duwa Lashi La nih a chim. Nizan October 11 zinglei ah a voi 71 nak NUG cozah tonpumhnak meeting ah a tu bantukin a chim hi a si.
Cu pinah SAC nih thimnak an tuah dingmi hi anmah le anmah an luat khawhnak hnga ca ah an tuahmi a si. An kuttang USDP party zong hruaitu thlen nawnnak an ngei i, thimnak tuah khawh dingin an i zuam cuahmah, tiah NUG President nih cun a chim. SAC nih nawlngeihnak an lak hnu in rampi a sifak chinchin i, harnak le thinphan thlalaunak a tam chinchin. Rammi hna cu zawnruahnak ngei loin an thahnawn hna, tiah a chim.
Myanmar rammi hna cu vawleicung ramkip nih bawmhnak a pek ko hna nain SAC nih a cohlan lo caah NUG cozah chungtel dihlak nih fak piin tawrel khawhnak dingah kan i zuam a hau, tiah a chim. NUG cozah nih SAC cu kumkhat chungah kan doh lai i, a hram in kan phawi dih lai, tiah cathanh an chuah.
Mon Peace Defense Force(MPDF) Cu SAC Kuttang Hriamtlai Ah An Cang, New Mon State Party(NMSP) in a chuakmi Mon Peace Defense Force(MPDF) cu SAC ralkap he kan ṭangṭi lai, tiah October 10 ah cathanh an chuah. MPDF nih rampi daihnak hmaithlak in rian kan ṭuan lai i, mizapi harnak petu kan doh hna lai. SAC kuttang rianṭuantu pyituhsit kan si lai, tiah an langhter. An ralkap bawizik General Naing Shaung ai ah Brigadier General Naing Aung zong an thim, tiah theih a si.
MPDF ralkap cheukhat cu a luancia kum 2019 ah phung ning loin hriamnam le rithaisii an cawk zuar caah an rak tlaih hna. 2017 lio zongah Paung peng Teykone(သဲကုန်း) khua vawlei hmun zong phung ning loin an rak zuar, tiah Media cheukhat nih an rak langhter. MPDF cu NMSP in a luancia kum 2010 lioah a rak chuakmi an si. Crd-the Chin Post
Leave a Reply