Kawlram Mi Poah Kum 18-35 Karlak Ralkap Ttuan Ding Timi Phung Kan Hmang Lai A Ti
Myanmar rampi a him khawhnak dingah le kilvengtu dingah cun a herh a sile ralkap tuan lo si kho lo dingin phun kan ser lai i kan hman lai tiah SAC ralhrang pawl aiawh i biachim tu Zaw Min Tun nih January 14, 2022 chun Ah a phuan. Mah ralkap luh dih ding timi system hi tih a nung taktak mi a si.
Zaw Min Tun nih, “Ralkap tuan lo theih lo dingin timi phung hi a liam cio mi 2010 Novenber thla ah kan rak tawlrel cang. Ramchung ah hin mah hi phung hi hman dingin kan ti nain a taktak in kan hmang kho rih lo, kan pawng kam ram pawl zong nih mah hi phung hi hmang dingin an tawlrel ve cang” a ti.
Cheukhat ram cu a taktak in an hmang cang hna, cheukhat cu an hmang ve rih lo. kan nih cu zeipaoh kan tawlrel cang ruangah a herh a si le hman ding lawng a tang. Hi phung hmang dingin zeipaoh kan tawlrel dih cang a ti. Ralkap tuan lo khawh lo timi phung a hman si le ramchung mi, kum 18 in kum 35 karlak ralkap riantuan dih a si lai. Ralkap an tuan caan cu kum 2 in kum 3 tiang a si laic un hnu ah an mah duhnak in ralkap an tuan duh ko a si le an peh thai te lai.
Relchap, KNU brigade 5 hmunhma Mutraw pengkomh ah, April thla, 2022 chung ah SAC ralkap, BGF phufonh le KNLA kahdohnak voi 383 a chuak i, cu kahdohnak ah cun SAC ralkap le BGF lei tat-yin-hmu 1, duh-tat-yin-hmu 1 telh in SAC ralkap 173 an thi i minung 87 nih hliamhma an tuar, tiah Mutraw media nih a thanh.
Kaphnih kahdohnak ah KNLA lei in minung 3 an nunnak a liam i, minung 17 nih hliamhma an tuar ve, tiah theih a si. KNU brigade 5, battalion hna nih SAC ralkap motor 4, an hriamthil chiahnak ku-dawng 2 le raltuknak ah hman mi Rang le Laa 4 cu an thahpiak hna, tiah KNU nih an thanh. April thla chung kahdohnak ah SAC ralkap nih vanlawng in voi 7 bomb an thlakhnawh hna i, tualchung mi hna umnak khua le dum-hau chung ah hriamngan lung 614 an kah, tiah KNU brigade 5 nih thlafatin kahdohnak record an tuahnak in theih a si.
Butalin Peng Taw Oo Bah Khua A Khangtu SAC Ralkap 20 PDF Nih An Hrilh Hna: Sagaing ramthen Butalin peng Taw Oo Bah(တောဉီးဘ) khua a khangtu SAC ralkap cu nihin May 5 zing Sml 6 tluk ah tualchung PDF nih an kah hna i SAC ralkap 20 an thi, tiah tualchung thawngzamh sin in theih a si.
SAC ralkap hna cu May 4 ah Winmana(ဝင်မနား) palek sakhan chuahtak in rallam a sial mi an si i May 4 zaan Sml 8:50 ah Butalin peng an phan i Taw Oo Bah khua an khangh, tiah theih a si. Kahdohnak chung ah tualchung PDF in 2 hliam an tuar, tiah tualchung mi nih an chim.
Relchap, Mandalay ramthen, Mataya pengkulh ah a um mi Ta Phan Kann khuate chung ah a rak ra mi SAC ralhrang hna cu mipi ralkap phu fonh hna nih an kahdoh hna i, SAC ralhrang lei in a nunnak a liam mi te hliam tuar mi an um lai tiah MPDF nih cathanh a chuah. SAC ralhrang hna nih Ta Phan Kann khuate ah a um mi PDF Sakhan cu SAC ralhrang ralkap thazaang tampi in a luhnawh kahdoh hna i, May thla ni 3, zing lei suimilam pa 6 caan ah unau hoikom phu 4 hna nih SAC ralhrang hna cu phihkham in an kahdoh ve hna i, SAC ralhrang lei in minung 11 an nunnak a liam i , minung pa nga nih hlaim an tuar tiah theih a si.
Khua pawngkam a um mi khuami minung pa nga zong SAC ralhrang nih an tlaih hna tiah thawng theih a si. SAC ralhrang kahdoh tu unau hoi kom hna cu, Naga Unau-PDF, MDY-PDF, Mattaya mipi ral kap-PDF hna an si tiah theih a si. ” Tuni zing lei suimilam 5 hrawngah motor tlangpi pa 7, motor hme mi pa 6, ralkap thazaang 100 le luh hnawh in,
Myaing Thit khua cungah motor cu an dir ter i, Suimilam pa 7 a tlin hlan kahdohnak hram cu thawk a si, Hraimnam ngan in an kah, RPG awthawng zong theih a si. Cu hnu ah SAC ralhrang an umnak lei ah cun minung pa sarih an tlaih hna i, nu minung pathum an itel, pa minung pa 4 an tlaih hna, mah kaa hmun ah cun minung pa 7 an tlaih hna.” tiah Mattaya khuami pakhat nih a chim.
Leave a Reply