Irrawaddy Ramthen Ah Sangkhat Ah Minung 60 In Mipi Ral Dirh Dingin Cazin An Laak
====================================
Irrawaddy ramthen, Bo Kalay khua ah SAC ralhrang kuttang riantuan SAC ralhrang nawl peek nak in khuaukbawi hreuainak in sang khat ah minung 60 in mipi ral dirh dingin cazin an laal hna kong cu tuanchung mi sinin theih asi. ” Aw a si, khuaukbawi hna nih min an khomh hna, kei mah zong cazin chungah kaa tel le tel lo zong ka thei lo. Mino hna nih cun mipi ralkap si an duh deuh.” tiah a chim.
Ralkap tintan cu SAC ralhrang nih peek an si lai. Chungkhar caah bomhnak zong peek an si lai. kan mah khua daihnak ca le humtimtu tatmadaw he ibomin riantuanti ding tiin chim in cazin laak a si. Kan nih cu dai tein um kan duh. Hrmhram in uknak an laak hnu in nikhat te hmanh kan i nuam bal lo tiah tuanchung mi pakhat nih a chim chap.
Bo Kalay ah ramkhel ruangah Sianginn saya/ma telin khuami minung 100 an tlaih cang hna tiah theih a si. Irrawaddy ramthen, Tha Phaung khuapi zongah June thla chungah sangkhat ah minung 60 in mipi ral dirh in tintan an peek hna tiah theih a si.
Hakha No.4 Sianginn Ah Ngakchia Pa SAC Ralkap Nih An Tlaih! Chin ramkulh, khualipi Hakha No.4 Sianginn ah ngakchia pa pakhat cu SAC ralkap nih an tlaih, tiah kan theih. SAC ralkap pawl cu nihin July 10 zanlei sml 2:30 hrawng ah No.4 sianginn ah an ra i, sianginn chung ah ngakchia pa (tangnga kai ding hrawng) cu an tlaih.
A hawile he lente an i celh i, sianginn thlalangawng an khuai sual. A hawile dang cu an zaam manh i, amah cu an tlaih, tiah Hakha ummi pakhat nih The Chin Post ah a chim. Motor pathum in an ra i, an thilri pawl cu sianginn chung ah an luhpi. Rawlchuannak belkheng hna zong aa tel. An thil an chiah dih in motor cu an kir ṭhan. Ralkap pawl tu cu sianginn chung ah an um ko. Sianginn chungah umhmun khuar an i tim i a si ko lai, tiah a chimchap. No.4 sianginn pawng i aa chawk mi mino deuh cu an dirter hna i an phone le an cycle toolbox an chek piak hna, tiah Hakha ummi pakhat nih The Chin Post ah a chim.
Kalaymyo SaeGyi Tiva Ah Ruak Pahnih Hmuh A Si! Nizaan July 9, Kalay peng SaeGyi (ဆည်ကြီး) khua pawng SaeGyi (ဆည်ကြီး) tiva ah TaPhanEin(သဖန်းအိမ်) khuami ruak pahnih cu an ruak in hmuh an si, tiah theih a si. Nunnak liammi hna cu PyinTawU(ပျဉ်တောဦး) khuachung ah Arsa zuar in aa cawmmi nufa an si, tiah tualchung mi hna nih an chim.
Nunnak liammi nufa hna ruak ah cun an lu ah meithal kahnak hliamhma hmuh an si i, a fapa lu ah inches 4 tluk kaumi nam hliamhma zong hmuh a si, tiah an ruak chartu mibawmchantu phu nih an chim. Miruak chartu mibawmchantu phu hna nih an chim ning ah cun, “Zaanlei suimilam 5:00 hrawng ah miruak hmutu hna nih phone in thawng an kan thanh. A thi mi hna cu hmundang ah thah in an ruak an rak hlonhmi a lo,
General hospital ah zohfelnak an tuah hna i nihin zinglei ah an ruak an vui hna. An ruak pawng ah cun Ar ke, Ar chungril le nam zong hmuh a si. An phaisa bawmchung ah ummi phaisa zong laak lo in a um i, mi zei kut in an thih le zei ruangah thah an ton theih a si rih lo,” tiah an chim. Thah a tongmi nu cu kum 50 tluk hrawng a si i, a fapa cu kum 20 in 25 karlak a si lai, tiah ruah a si.
SAC Ralkap Nih Tlangzar Khua An Khangh! Chin ramkulh, Falam Peng Tlangzar khua cu nihin July 10 zanlei 1:30 hrawng ah SAC ralkap nih an khangh, tiah kan theih. Khuami pakhat nih, “Inn 4 cu a ciam cang, inn zeizat a kangh bel kan thei kho rih lo. Zanlei sml 5:20 tiang ahhin SAC ralkap motor cu kan khua chungah an um rih. Ralkap pawl tucu ke in an kal i, Ramthlo an phan cang,” tiah The Chin Post ah a chim.
Tlangzar Khua Pawng Ah Kadohnak A Chuak Sagaing ramṭhen, Kalay in Laitlang lei ah a rak kami SAC ralkap pawl cu Falam peng Tlangzar khua pawng ah Chin ralkap he kahdohnak a chuak, tiah kan theih. Khuami pakhat nih,”nihin July 10 zing ah ah kan khua pawng ah kahdohnak a chuak. Ralkap pawl cu kan khua an phan cang. Motor belte a phan rih lo,” tiah The Chin Post ah a chim.
Yinmapin Pengkomh Ah NUG Fim Cawnnak Lei Hruainak In Exam An Tuah, Sagaing ramțhen, Yinmapin pengkomh i khua pakhat ah NUG cozah fimcawnnak lei hruainak in nihin July 9 ah ah exam an tuah. Cu exam cu taangcheu in taanghra tiang tuah a si i siangngakchia 600 tluk an phi tiah theih a si.NUG Ministery of Education i caan kar lak cacawn kum ah ca chimtu saya/mah, volunteer dihlak 55 le CDMers 18 nih ca an chimh hna tiah theih a si. A luancia July zarhkhat nak zong ah khan Yinmapin pengkomh khua pakhat ah NUG i fimcawnnak lei siangngakchia tonpumhnak, cathiam hlei laksawng pek nak le winter sports an tuah piak hna.
Phungning Lo In Myanmar Rianțuantu Hna Cu Thailand Cozah Nih Work Permit Pek hna Lai Phungning lo in Thailand ramri lawnh in a lutmi Myanmar rianțuantu hna cu Work permit kan chuah piak hna lai tiah Thailand cozah nih fehternak cathanh an chuah. Thailand ram chungah phungning lo in lut in rian a țuan tu Myanmar, Laos ,Cambodia, Vietnam rammi riantuan tu hna cu Pink colour card an ti mi Work permit kan tuah piak hna lai tiah Thailand cozah nih a luancia July 5 ah fehternal cathanh an chuah.
MinKin Peng TaungLat hmunhma Ah Rallam A Sialmi SAC Ralkap Kahdoh An Tong , Ralkap 2 An Thi, Sagaing ramțhen, MinKin peng TaungLat hmunhma ah rallam a sialmi SAC ralkap le PyoSawHtee hna cu kah an tong i SAC ralkap 2 an thi tiah MinKin dothlennak kong thawngthanh tu hna nih an langhter. Nizan July 8 ah MinKin peng Taunglat hmunhma um Nichuah Kolay khua in SAC ralkap hna cu AHtetSaThar ( အထက်စသာ)khua lei ah rallam an sial. TaungLat Pah- Kah- Phah phu hna le MinKin PDF battalion 2, tat- khuai 2 hna nih an bawh hna i an kah hna SAC ralkap 2 an thi tiah MinKin dothlennak tuahtu phu nih an langhter.
Leave a Reply