SAC Ralhrang Nih PDF Bomtu Tiah Tlaihmi Taksapur In Thah Mi Ko Tan Htun Oo A Ruak Cu

Magwe ramthen, Poh pengkulh Than Poh Kung khua mi Ko Tan Htun Oo cu SAC ralhrang nih PDF phu pawl na bomh hna tiah an ti i February ni 21 ah an rak tlaih i an rak thah mi i, chungkhar hna sinah a ruak cu an pee duh hna lo tiah theih a si.  Ko Tan Htun Oo cu inn in a chuah lio ah SAC ralhtrang pawl he ruah lo piin an i tong hna i, SAC ralhrang nih PDF bomtu na si tiah an ti i, an tlai hnu ah taksapure in an hrem hnu ah fak taktak in an thah tiah theih a si.

” Ko Tan Htun Oo an tlaih lio ah Than Poh kung khua ah ralhrang minung 30 hrawng an rak ra. Cu ni ah a mah cu khua leng siangiin cachhimtu hna caah tiseh mawngh piak dingin inn in a chuak, Cu lio ah cun SAC ralhrang pawl nih cun an tlaih. An tlaih nak kong cu SAC ralhrang lei nih an tlaihnak kong thawng an kan thanh i,

Ko Tan Htun Oo cu PDF bomtu tiah SAC ralhrang nih an ti i, an tlaih an hrem hnu ah sakhan lei ah an kal pi. Duakdap in a chungkhar hna nih an zulh colh i, SAC ralhrang nih rak kan zulh hlah tiah an au hnawh hna. Cu hnu ah SAC ralhrang nih tlaih mi mino pakhat a rak chuak i, a mah nih cun Ko  Tan Htun Oo cu an hrem nak ah thi lawng te in a khat dih , a nunnak a liam cang tiah a chim. A ruak zong tutiang an kan pee duh lo.”tiah tualchung mi pakhat nih a chim.

SAC ralkap nih remdaihnak ding tonbiaruah sawmnak ah lungtling in minthutnak a tuahtu hriamtlai phu 7 le NCA ah min thutnak a tuah rih lo mi hriamtlai phu 3 an i tel lai, tiah theih a si. Nationwide Ceasefire Agreement(NCA) minthutnak tuah ding in SAC ralkap sawmnak ah tel aa tim mi phu hna cu ALP, RCSS, KNLA-PC, DKBA, MNSP, PNLO le LDU hna an si. NCA minthutnak ah aa tel rih lo i SAC ralkap tonbiaruah sawmnak ah tel aa tim mi phu hna cu UWSP, SSPP le NDAA hna an si. Thazaang a ṭhawng ngai mi hriamtlai phu KIO, KNU, KNPP le CNF hna nih cun SAC ralkap sawmnak, tonbiaruahnak ah kan i tel lai lo, tiah fiang tein an thanh.

Kokang (ကိုးကန့်) MNDAA, TNLA le AA hna cu SAC ralkap sawmnak tel le tel lo ding ah biaruahnak kan tuah lio, tiah an chim nain SAC ralkap nih thawng thanh ṭhan ding in a hnubik rikhiahnak an tuah ni, May 9 tiang ah bialehnak an tuah rih lo. NCA minthutnak a tuahtu All of Burmese Students Democratic Front-ABSDF zong nih kan i tel lai lo, tiah an langhter. Ramkhel lei buainak kong tawlrelnak ding caah biapi ngai a si mi NUG cozah le PDF cu lanhtak in, SAC ralkap nih daihnak ding ca tonbiaruahnak tuah cu a dik mi a si lo, tiah tlangcung hriamtlai phu hruaitu hna nih an chim.