SAC ralhrang nih nawlthar an chuah hoi cang!!

Kalaymyo Ah Pa Pahnih Cycle I Citṭi Lo Ding In SAC Ralkap Le Palik Nih An Kham Hna!
===========================
Sagaing ramṭhen, Kalaymyo khua chungah nihin November 12 zing thawk in cycle pakhat ah pa pahnih i citṭi lo ding in SAC ralkap le palik nih Kalaymyo lamtonnak, Tahan lamtonnak le Bogyoke lamthluan ah nizan November 11 zanlei ah ralrinnak an pek hna, tiah Kalaymyo khua chung ummi hna nih an chim.

“Sa em kan va cawk lai tiin ka hawipa he kan kal lioah palik pa nih, hihnu cun pa pahnih i cit ti hlah u nan i cit ahcun kan in tlaih hna lai a kan ti,” tiah pumpak in ralrin pek a tongmi pakhat nih a chim. Kalaymyo lamtonnak thlanglei, sii-inn hlei lonh bazar chak ah nizan November 11 chun ah pyusawhti hruaitu pahnih kah an tong i pakhat a thi. Cu hnuah SAC ralkap le palik nih a tu bantukin pa pahnih cycle i cit ti lo ding in ralrin an pek hna hi a si, tiah theih a si.

Pa pahnih cycle i citṭi khawh lonak kong cu SAC nih cathanh an chuahmi pakhat hmanh a um lo, tiah Kalaymyo khua chung a ummi hna nih an chim. Tamu zong ah a luancia thlathum lioah pa pahnih cycle i citṭi khawh a si lo an rak ti i, aa citmi cu thong an thlak hna pinah kyats 30,000 an rak liamter hna. Atu cu pa pahnih i citṭi zong ah an tlai ti hna lo, tiah theih a si. Nizan November 11 chun ah pyusawhti pahnih cu meithal in kah an ton caah pakhat a thi i pakhat cu a baan ah hliamhma a pu i a zam, tiah Kalaymyo khua chung a ummi hna nih an chim.

Falam Ah Sia A Seh Tawn Tu Cakei An Kah Thah! Chin ramkulh, Falam khua ah tualchungmi hna nih paw cawmnak caah an zuatmi Sia le Meheh a seh tawn tu Cakei cu nizan November 11 ah tualchungmi pakhat nih a kah i a thi, tiah theih a si. Cakei an kahmi hi a ngan ngai i a sau pe 4 reng lo a si.

Monywa Peng Ah SAC Ralkap Drone In Bomb Thlakhnawh An Ton Caah SAC Chungtel Pahnih An Thi! Sagaing ramṭhen, Monywa peng Tawpu khua in a chuakmi SAC ralkap le pyusawhti cu drone in bomb kan thlakhnawh hna caah pahnih an thi, tiah KUG Battalion G Y Z in ṭuanvo ngeitu nih a chim.

Nizan November 11 zing sml 9:35 hrawngah Monywa peng um pyusawhti khua tiah a min a thangmi Tawpu khua in a chuakmi SAC ralkap le pyusawhti cu, thingkung tang an i dinh lioah drone in bomb kan thlakhnawh hna hi a si, tiah KUG nih an langhter. Cu bomb puahnak ah pyusawhti hruaitu pakhat telh in SAC ralkap chungtel pakhat a thi i, 5 hliamhma an pu. Cu chungah pathum hi an hliamhma a fak ngaingai, tiah KUG in ṭuanvo ngeitu nih a chim.

Bomb puahhnawhnak ah KUG Battalion G Y Z le Companny 1, Eagle Brothers Revolution Force, Companny 2 ၊ Dragon Brothers’ People’s Defence Force hna i bawm in an doh hna, tiah theih a si. Monywa peng Tawpu khua cu pyusawhti an tam ngaingai nak khuate pakhat a si i, PDF ralkap an thah hna pinah khuate inn hna zong mei in an khanghpiak hna, tiah theih a si.

Tualchung Mi Mipe(မြေပဲ) A Firtu Pyusawhti 6 Kah Thah An Tong! Magway ramṭhen, Myaing peng Tayetkan khua in pyusawhti 10 cu khuami an mipe dum ah mipe an firpiak hna i cu lioah kan kah hna, tiah Myaing PDF in bawino Letyar nih a chim. Tayetkan khua thlanglei farlong 3 hrawng a hlatnak ah a ummi khuami an mipe dum ah nihin November 12 zinglei sml 6:00 hrawngah pyusawhti nih mipe an phawi lio le an fir lioah an kah hna, tiah theih a si.

“Khuami an mipe dum ah pyusawhti 10 cu an kal i mipe an phawi lioah kan kah hna. A hmun ah pyusawhti 6 cu an thi colh i pakhat cu a luat. Tayetkan khua um SAC ralkap pawl nih 60mm le 40mm in an kan kah ko nain kanmah lei a thimi le aa hliammi kan um lo,” tiah bawino Letyar nih cun a chim chap.

Cu kahdohnak ah Myaing PDF, Pyituh Aaman PDF, Mung Taing Phu le MUGBS hna i bawm in an kah hna, tiah theih a si. A luancia November 9 lio zong ah Pauk biaceih zung chungah thongtla phortu palik pawl cu, Myaing peng PDF nih kutcheh bomb in an rak puahhnawh hna caah palik pakhat a thi i pathum hliamhma fak ngai an rak pu. Crd-The Chin Post

Be the first to comment

Leave a Reply

Your email address will not be published.


*