Tuzing suimilam 6:00 hrawngah Magwe ramthen, Yezakyo (ရေစကြိ) pengkulh, Than Taan Yet (ထင်းတန်းရပ်) a hmat 1 sangah a um mi mipi kan ralkap PDF Nay Linn, Myint Soe, San Pee Wan, Khet Thitsa kan ralkap minung pa 4 hna cu SAC ralhrang nih hriamnam he an tlaih hna tiah thieh a si. Cu bantuk thiamthiam in tuni zaan lei suimilam 1:00 hrawngah Pakokku a hmat 7 sang, Zaw Thika lam ah a um mi “Three House” rawl einak dawr ah Myaing pengkulh mipi kan ralkap PDF phu pawl bomchantu a si mi Naing Win San cu SAC ralhrang nih an tlaih tthan tiah theih a si. Naing Win San hi Myaing pengkulh Paantaantaw khuate ah a um mi a si tiah theih a si.
SAC ralkap nih nawlngeihnak an lak hnu Myanmar ramchung ah ngakchia nuai 5 bawmhchanhnak pek an herh ngai tiah UN nih a thanh. Myanmar ramchung buaibainak ruangah thahnawnnak a karh, sifahnak a karh chin caah ngakchia sin bawmhnak pek an herh ngai tiah Unicef nih an chim. Cu leng ah nawlngeihnak latu SAC ralkap nih tlaih an duhmi an hmuh hna lo tik ah an fa le an tlaih mi hna zong an um. Ngakchia tlaihkhih an tonnak kongah SAC ralkap nih chim fiannak an tuahmi a umlo.
Myanmar ramchung phaisa hmannak ah Myanmar phaisa lawng nan hmanlai tiah central bank nih May 25 ah theihternak cathanh an chuah. Ramchung thilcawk le thil zuarnak ah ramdang phaisa in i peknak le i zuarhnak a tam caah ramdang phaisa hmannak cu a hmunhma a kau i, ramdang phaisa thlenret(exchange rate) zong ningcang tein a kalter kholo tiah an thanhmi ah an langhter.
Cu ruangah anmah he pehtlaihnak a ngeimi pyithawngsuh vuanci zung lei ramtthen le ramkulh in cozah le private rian, mibu riantuannak chungah thilri cawk/zuarhnak caah hmanmi phaisa langhter tik zongah ramchung phaisa kyats in langhter le hman dingah nawlpeknak an tuah tiah theih a si. “Vanlawng ticket zong dollars in kan cawk, international sianginn hna zong dollars in pek a si, training kai zong ah cu thiamthiam cu a si. Hotel hna zong dollars in pekkhawh tibantuk a si caah cucu kham an duh tiin ka hmuh” tiah rianngeitu mirum pakhat nih a chim.
Sagaing ramtthen, Kani peng le Yinmapin peng chung ah May 25 le 26 nihnih chungah khua 4 in mipi umnak inn 150 leng an khangh tiah tualchung mi nih RFA ah an chim. “Yinmapin lei ah May 25 in rallam an sial cang, Yama(ယမား) hleidonh pawng ummi thlam le palik gate hngahnak thlam hna zong SAC ralkap nih an khangh. May 26 zinglei zongah zaan an riahnak Watan(ဝါးတန်း) khua cu an chuah lai an khangh” tiah an chim.
May 25 ah Kani peng Ahtatgin(အထက်ကင်း) khua cu khuachung ning ti tlukin inn 130 hrawng an khangh leng ah Yinmapin peng Myayait(မြရိပ်) khua le Htantawgyi(ထန်းတောကြီး) khua inn 25 an khangh. May 26 ah Yinmapin peng Watan(ဝါးတန်း) khuachung lamkam dawr hna le minung umnak inn 77 hrawng an khanghthan. SAC ralkap chimphuannak nawl ngeitu Zaw Min Htun nih cun khuachung ah rallam sial in mipi umnak inn khangh tibantuk cu kan tuah lo, cu thil a tuahtu cu PDF an si tiin bialehnak a tuah.
RFA nih khomhsuatmi nazin ningah Sagaing ramthen chung April 1 in May 24 tiang thlahnih tluk ah pengkulh 19 in inn khanghmi dihlak hi inn 6281 a si tiin an langhter.
May 1 in 15 tiang Sagaing ramtthen pengkulh 51 chungah PDF le SAC ralkap kar kahdohnak a fah caah mizapi (civil) 38 nak tlawmlo an nunnak a liam tiah ISP-Mywnmar nih a thanh. 2022, May 1 in May 15 tiang chungah SAC ralkap le PDF kar kahdohnak voi 104 nak tlawmlo a chuak i, cu kahdohnak chung ah cun SAC ralkap nih vanlawng voi 32 an hman. Cun, SAC ralkap nih inn 5,701 an khangh, Innkang ruang ah mizapi 46 nak tlawmlo an nunnak a liam. SAC ralkap nih hramhram uknak an lak hnu ramchung hmun kip ah kahdohnak a chuak i,
Karen ramkulh le Sagaing ramtthen nih harsatnak tambik an tuar tiah theih a si. 2021,July 1 in 2022, May 15 tiangah ISP-Myanmar nih khawmhsuat khawh tawk cazin ning ah Karen ramkulh chung ah kahdohnak voi 2,432 nak tlawmlo a chuak i cu kahdohnak cu ramchung huap in a cangmi kahdohnak vialte i zatuak 56 (56%) leng a si. Sagaing ramtthen chungah kahdohnak voi 439 nak tlawmlo a chuak i rampi huap in a kahdohnak a tamhbik chang a chuahnak hmunhma a si.
Leave a Reply