“2022-2023 fimcawnnakah sianghngakchia min peek nak cu May thla ni 6-June ni 1 a si lai i, Hi ka chung i atu tiang ah fimcawn dingin Kawlram chungah, cozah sianginn siseh, Phungki sianginn siseh, Private sianginn siseh, min aa pee mi sianghngakchia minung 4,221,29,1 an si cang tiah theih a si.
Sianginn caa fimcawmnak ah min a peetu nu le pa hna le Sianghngakchia nu/pa hna nih tlamgtling tein Sianginn fimcawn mimpeeknak cu taunvo laak a si lai i, Sianghngakchia nu/pa caah Sianginn fimcawnhnak zungin free man lo tein bomhnak peek a si lai i, cacawnnak caah a herh mi cauk a si ah zeipaoh bomhnak peek an si lai caah Sianginn uktu le Saya/ma hna zong nih lungkhat le thinfual te in Sianghngakchia cungah fimchimh a si lai.
Fimcawn dingah Sianginn min peek nak a cohlangtu Saya/ma hna le Sianginn cacawnnak min a peemi Sinaghngakchia le nu/pa hna i humhimnak caah a herh ningin humhimnak tuanvo a negitu hna le mipi pawl ibom in tuanvo laak ti a si lai i, ramthen, State kip le peng le tlang kip ah Vaunci zung pawl, တိုင်းစစ်ဌာနချုပ် kip in zung kip he aa pehtlai mi hna nih humhimnak caah tuanvo laak piak an si lai” tiah SAC ralhrang thanwgzamh a si mi VON nih thanhnak a tuah.
Demoso-PDF Sin Ah SAC Ralkap Pakhat A Lut: Shan ramkulh thlanglei, KhuLam khuapi um SAC ralkap Kah-Lah-Yiah 66 Battalion in ralkap pakhat Saw Wai Phyo Aung cu nizan May 28 ah Demohso (DMO) PDF sin ah CDM tuah tiah DMO-PDF nih cathanh an chuah. PDF sinah a lut mi SAC ralkap Saw Wai Phyo Aung cu SAC ralkap a ṭuannak kum 12 a si cang i, a luan cia January 4 ah khan Kayah ramkulh, Loikaw khuapi, ChiKe veng hmunram security ah a rak i ṭhial mi a si, tiah an langhter. May 25 ah SAC ralkap in a rak zaam i nizan May 28 ah DMO-PDF sin a phan, tiah an langhter.
SAC ralkap hna cu thluaklei in siseh pumsa lei in siseh, a phunphun in hremnak kan tong i, mipi thilri fir, inn khangh, rithaisii tonghtham le sualnak ngei lo tlaihkhih tibantuk; phungning lo in nifatin kan cawlcangh caah cubantuk thil hna cu tuah ka duh ti lo i, SAC ralkap chuahtak in mipi lei ah CDM ka tuahnak hi a si, tiah ralkap Saw Wai Phyo Aung nih a chim tiah DMO-PDF nih cathanh an chuah.
Atu bantuk in CDM a tuahtu ralkap Saw Wai Phyo Aung cu lunglawm tein kan don i, a herh mi biahalnak cheknak hna tuah hnu in a himnak hmun ah an kuat tiah DMO-PDF nih a thanh. SAC ralkap chuahtak a duhmi ralkap hna cu DMO-PDF nih lunglawm tein kan in cohlan hna lai. Hriamnam nan i ken ahcun Sing 50 lawngsawng pek nan si lai, tiah theihternak an tuah.
SAC ralkap nih hriamngan in an kah caah Sagaing ramṭhen, Kalaymyo Tahan sang ummi minung 3 an nunnak a liam, tiah kan theih. Hi thil a can hi May 28 zan sml 8:35 hrawng ah a si. Kum 25, nu pakhat cu a fapa thlaruk mi inn leng ah a oih i, cu lio ah cun an inn tual tlakrawh ah hriamngan kuan a tla. Ralzam nufa hna zong a khen hna caah an nunnak liam, tiah theih a si.
“Tahan sang ummi Pui Pui-kum 25 cu a fapa te (thlaruk) aa hngilh khawh lo caah inn leng ah a oih. Pui Pui a pu fale, Ni Ni Aye-kum 40 hrawng le a fapa Phu La Pih -kum 25 zong inn leng ah an um. Cu lioah hriamngan kuan cu an pawng tlakrawk ah a tla i, a peh hna caah Ni Ni Aye cu le a fapa cu an thi. Pui Pui cu a tukbukhur ah a khen i sii-inn ah a thi,” tiah Pui Pui he chungkhat naihniam mi pakhat nih The Chin Post ah a chim.
“Ni Ni Aye le a fapa Phu La Pih hi Minkin khuami an si i, ralzam in Kalay an umnak thla thum hrawng a si cang. Pui Pui te an inn pawng ah an um i, May 28 zan cu Pui Pui te an inn ah an riak hna. A linh tuk caah inn leng an um lioah hriamngan kuan nih a tlak hna hi a si,” tiah a chimchap. An ruak cu nihin May 29 zanlei sml 2:00 ah an vui lai, tiah kan theih. Pui Pui nih a fapa, thla ruk le a vapa a roh hna. A luancia, May 25 zaan sml 8:30 hrawng ah, KalayTahan sang Wesley Nurse land pawng ah hriamngan kuan innchung ah a rak tla bal cang.
Leave a Reply