Hi Pawl Druh A Zuarmi Pawl Hi SAC Ralhrang Nih Dalaan Caah Thlahmi An Si Lai Tiah Zumh An Si Tih A Nung Kho Taktak
==================================
Mizoram chung ah Kawlram lei in drug an luhpi ti mi thawngpang hi Mizo kan unau mizapi lak ah a leng ngaingai. Mizoram chung ah i dor in a um mi Kawlram lei nan unau kanmah Chin pawl zong cu kong kan theih ve tikah kan lung a nuam ve hrimhrim lo. Hi ti in Mizoram chung ah drug a luh khawh hi zeitin dah a si hnga ti hi a kan ruahter ngai ve.
Kan Kawlram chung ah ralkap nih ram uknak hramhram in an lak hnu ah Kawlram chung ah mah nunnak kilvennak ding caah le ram a dam khawhnak ding caah hriamtlai in CNF, CDF, CNDF, PDF, etc. ti’n cawlcanghnak a chuak. Hi hriamtlai bu vialte hi miphun le ram ca i riantuan mi bu an si bantukin miphun a hrawktu a si mi drug hi an duh lo, cuticun anmah an umnak hmun paoh ah drug hi phorhnak nawl an pe hna lo. Anmah nih an controlled mi areas paoh ah checkpost an tuah i a tlung kal paoh hi an check hna. Drug hmuh a si ahcun an tlaih in an hrawh dih, cun a phorhtu zong nun chimh an si.
Atu Kawlram chung ah drug biatak te a ngei in a hmang kho mi cu ralkap lawnglawng hi an si. Ralkap pawl hi an tli zaam sual lai ti an phan hlei ah an duh ning in rian an fial khawh hna nak ding caah drug hi an ralkap pawl hna cu an pek lengmang hna tiah theih a si. Cucaah Ralkap bawi le hna sinah drug tampi a um ti hi a fiang i ralkap bawi pawl nih rum duh ah drug hi businessman pawl he tiah riantuan ti’n Mizoram chung ah an luhpi in an zuar mi a si kho tiah kan ruah.
Cu lawng si rih lo in atu ralkap cozah hrimhrim nih hin India cozah, Mizoram cozah le Mizo mizapi hna nih an ramchung ah aa dor mi Kawlram mi pawl hna cungah huatnak lungput an ngeihnak hna hnga le Kawlram chung dohthlennak cawlcanghnak hi tha pe lo in doh hna seh ti duhnak in strategy ser in drug hi Mizoram chung ah luhpi in an zuar khawh mi zong a si kho tiah kan ruah. Hi ralkap cozah an strategy hi nanmah Mizo kan unau hna zong nih fiangte in kan hmuhpiak thiam hram ve ulaw tiah kan i nawl duh ko hnga.
Mizoram le Mizo kan unau hna vialte nih Kawlram dohthlennak he pehtlai in nihin ni tiang biatak te’n nan kan dirkamh mi cungah chimcawklo lunglawmhnak kan in ngeih hna ti mi zong hi a thar in kan hun chim than. Kan biak kan Pa kan Pathian tu nih nan ram hi thluachuah in pe chin hna in a thluachuahnak he lam in hruai zungzal ko hna seh.
Chin Refugee Committee of Mizoram
Relchap,Nihin Kalaymyo Kahdohnak Ah SAC Ralkap 10 Hrawng An Thi, Nihin August 8, Sagaing ramṭhen, Kalaymyo kahdohnak ah SAC ralkap 10 an thi, tiah Kalay PDF chungtel pakhat nih a chim. Kalaymyo peng Kyunchaung(ကျွန်းချောင်း) le Tharyarkone(သာယာကုန်း) khua karlak ah nihin chun suimilam 12:30 hrawng ahkhan kaphnih kar kahdohnak a chuak, tiah theih a si.
SAC ralkap 20 hrawng an rat lio ah tualchung hriamtlai phu nih rak bawh in an kah hna. Kaphnih kar kahdohnak suimilam pakhat hrawng a rauh hnu ah SAC ralkap lei 10 hrawng an thi i, tualchung hriamtlai phu lei hliamhma tuar um lo in hnu an tolh kho, tiah a chim chap.
A luancia August 3 ahkhan Tharyarkone (သာယာကုန်း) khua pawng ah fak ngai in kahdohnak a rak chuak. Cu kahdohnak ah cun SAC ralkap 25 hrawng an thi i, hliamhma tuar zong an tam, tiah Kalay PDF nih cathanh an rak chuah. Cu kahdohnak ah cun Kalay PDF battalion 6 in ṭat-sait-hmu (တပ်စိတ်မှူး), Natchaung(နတ်ချောင်း) PDF battalion 1 in duh-ṭaṭ-yin-hnu le sen-ta-ri cawngtu pakhat ti in tualchung ralkap 3 an nunnak a liam.
Butalin Peng Ah SAC Ralkap Bomb Puahhnawh An Ton caah Ralkap 5 An Thi: Sagaing Ramṭhen, Butalin(ဘုတလင်) Peng ah SAC Ralkap pawl cu PDF nih voi hnih bomb an puahhnawh hna i, ralkap 5 an thi, tiah Aung San Generation (A.S.G) nih August ni 7 ah cathanh an chuah. August 7, zing suimilam 7 hrawng ah Butalin peng Zeetawkhua ( ဇီးတောရွာ) Sianginn hmai dawr pakhat ah PDF lemcang in thil a rak cawmi SAC ralkap pahnih cu Aung San Generation phu he an i tong i, SAC ralkap pahnih nih cun meithal puah in an hawile theihternak an tuah hna caah sianginn chung ah a um mi SAC ralkap pawl nih an kah hna hnu in kahdohnak a chuak, tiah theih a si.
Cu kahdohnak ah cun minung thazaang le hriamnam aa thlau tuk ruang ah tualchung hriamtlai phu lei cu hnu an tolh ṭhan, tiah theih a si. Cu hnu ah SAC ralkap pawl cu Poekone khualei ah rallam an sial i, Aung San Generation pawl nih cun bomb an puahhnawh hna. Bomb puahnak ah cun SAC ralkap 4 an thi. Cu hnu ah Butalin lam ah bomb an puahhnawh ṭhan hna i SAC ralkap pakhat a thi ṭhan, tiah Aung San Generation nih an cathanh ah an langhter.
Aung San Generation nih cun SAC ralkap an tukdohnak ah hriamnam an chambau ngai caah, an cathanh ah cun mipi sin bawmhhalnak zong an tuah, China Nih Raltuk Taiwan Rili Kam Raltuk Cawnnak A Tuah Ṭhan. China nih Taiwan rili kam ah kuan tak hmang in raltuk cawnnak a tuahmi cu “A dih cang” tiah August 7 ah a thanh nain, August 8 ah raltuk cawnnak kan tuah ṭhan tiah China lei nih an thanh. Ti chung pil in raltuk ning le rili cung i kahdohnak kan cawng lai, tiah Chief of Eastern Chinese Military Department nih a thanh.
China ralkap nih US House Speaker Nancy Pelosi Taiwan a tlawn lehrulhnak ah ni li chung raltuk cawnnak cu Taiwan rili kam ah tuah. Atu bantuk in raltuk cawnnak a tuah caah US, Australia le Japan hna nih cun duhlonak an langhter. China nih hi thil a tuahmi hi China le Taiwan kar remdaihnak hrawh a timh bantuk a si, tiah an chim.
University Siangngakchia 4 Cu Kum Thum Cio Thong Thlak Ding In Biakhiahnak An Tuahpiak Hna! Yangon University of Economics siangngakchia; Ko Kyaw Htat Aung, Ko That Aung Moe, Monywa University of Economics ah sianginn a rak kai balmi Ma Mu Mitzue le Yangon nitlak lei University ah kaimi Ko Sai Min Khant Kyaw tiin siangngakchia 4 cu August 5 ah Insein thong biaceih zung nih Section 505(A) in kum thum cio thong thlak ding in biakhiahnak an tuahpiak hna, tiah theih a si.
Tutan ah bia an ceihpiak mi hna hi Butathawng(ဗိုလ်တထောင်) peng no. 45 lam cung ah, a luancia March 12 zaan suimilam 10:00 hrawng ah SAC ralkap nih luhhnawh in an tlaih mi hna an si. An pali ning in Section 50(I) le 51(C) zong in taza an cuai rih hna, tiah anmah he naihniam in ummi pakhat nih media ah a chim.
“Atu tiang ah cun section 505(A) in kum thum cio thong thlak ding in biakhiahnak tuahpiak an si. Nihin August 8 ah Section 50(I) le Section 51(C) in tazacuai an tong ṭhan, biakhiahnak tuahmi cu a um rih lo,” tiah anmah he naihniam in a ummi nih cun a chim. AAPP cazin ning ah, SAC ralkap nih nawlngeihnak an lak 2021 in 2022, August 5 tiang ah tlaih a tongmi dihlak hi minung 11,925 an si cang i, cu chung in thongthlakmi 1375 an si, tiah an langhter.
Tamu Khuachung Ah Tualchung Mi 2 Cu “PDF nan si” Tiah Puh In Pyusawhṭi Nih An Thah Hna: Sagaing ramṭhen, Tamu Pahae (ပါဟဲ) hleidawnh ah sualnak ngei lo tualchung mi 2 cu “PDF nan si” tiah an puh hna caah SAC ralkap kuttang um pyusawhti nih an kahthah hna, tiah Tamu khuami nih an chim. Tamu khuachung Myomah sang, Pahae(ပါဟဲ) hleidawnh ah tualchung mi 2 cu nizaan August 7, zinglei suimilam 8:30 hrawng ah pyusawhṭi nih an kahthah hna, tiah Tamu khuachung ummi pakhat nih a chim.
Khuachung mi 2 kahthah an ton hnu, zaanlei ah kahthah an tonnak hleidawnh pawng ummi inn cheukhat cu SAC ralkap le pyusawhti nih luhhnawh in, thilri an thlokpiak hna i thilri man ngei hna cu an firpiak hna, tiah Tamu khuami nih an chim. Kahthah a tongmi hi mi note veve an si i PDF zong an si lo, tualchung mi sawhsawh an si ko, tiah khuami nih an chim.
Mindat Khuachung Ah Biaknak Lei Hruaitu Hna Tawlrelnak Lawng In Facang Cawknak Nawl An Pek Hna! Chin ramkulh chung ah fak ngai in kahdohnak a chuahnak hmun Mindat ah zapi eimi facang cu SAC ralkap nih rikhiah in an zuar, tiah tualchung mi nih an chim. Atu tiang ah tualchung mi hna cu Biaknak lei hruaitu hna nih ṭuanvo an lakpiak hna lawng ah facang cawknak nawl pek an si, tiah Mindat khuami pakhat nih media ah a chim.
“Kan herh zat in cawk khawh cu a si ko nain inn ah i chiah cu sianh a si lo. SAC ralkap nih rikhiahnak an tuah i Biakinn chung ah chiah a si. Rawl chumh a herh tik ah Biaknak lei hruaitu pakhat nih ṭuanvo lakpiak hnu lawng ah an kan thoh piak” tiah a chim. SAC ralkap hna nih cun a luancia August ni 6 in facang tun khat ah Ks. 40,000 in an zuar, tiah a chim chap.
SAC ralkap nih uknak an lak hnu ah CDF-Mindat le SAC ralkap kar kahdohnak a chuah thawk in, Mindat khuachung ah facang telh in zapi nih eimi thilri phorhnak nawl SAC ralkap nih an phih. Kaphnih kar kahdohnak ruang ah Mindat khuachung um mipi 9000 leng cu mah umnak innlo kaltak in ralzaam dirhmun an phan, tiah ralzaam bawmchantu hna nih an chim.
Hakha Campaign For Justice nih Mizapi Sin Ah Kahdohnak Kong He Pehtlai In Theihternak Cathanh An Chuah, A luancia August 6 ahkhan SAC ralkap pawl nih an umnak horkuang cu chuahtak ngam loin hriam ngan puah in an i hrocer. SAC ralkap hna cu chin ralkap hna nih drone hmang in voi 3 tiang bomb an thlakhnawh hna caah SAC ralkap hriamhma tuar an tam lengah sniper kahnak in SAC ralkap pakhat an hrilh.
August 7, ah SAC ralkap lei nih Chin ralkap hna cu voi hnih an nam hna i, Rungtlang lei in hriam ngan voi 15 puah in an rak bawmh hna. Fak ngai in kap hnih kar kahdohnak a chuak. Chin ralkap sniper kahnak in SAC ralkap 2 an thi ṭhan, 3 nih hliamhma an tuar. Chin ralkap lei cu an him.
Nihin, August 8 ah Palik sakhan thlang SAC ralkap nih umhmun an khuarnak sianginn le cazinsit-zung cu zinglei suimilam 7:06 ah Chin ralkap hna nih an kah i SAC ralkap 2 hliamh an pu. Chin ralkap kan him i, Drone hmangtu le bawmtu nan cung ah kan i lawm tuk, tiah Hakha Campaign For Justic nih nihin August 8 ah an thanh.
CDF- Zotung Nih Mizapi Sin Theihternak Le Ralrin Peknak Cathanh An Chuah!, A luancia August 6 ah Zotung hmumram, Nabung khuachung ah a lut mi SAC ralkap 80 cu nihin August 8 ah Nabung khua in an chuak, tiah theih a si. SAC ralkap hna cu Nabung khua in an chuak cang nain Zotung peng Yaungnat (ရောင်နက်), Nabung(နားဘုန်း), Ramsi(ရမ်းစီး), Annta(အန်းတ္တား), Panba(ပန်ဗား) le Tayarkung (သာသယာကုန်း) khua hna in ralzam mi hna cu an kir rih lo, tiah theih a si.
SAC ralkap umkalnak kong he pehtlai in mi cheukhat nih tualchung hriamtlai phu min bunh in mizapi sin ah thawng dik lo thanhmi kan hmuh caah, an thanhmi thawng dik lo nih mipi humhimnak a hnorsuan ahcun CDF-Zotung nih fakpi in dantatnak kan tuah lai, tiah an thanh.
Curuangah Gangaw-Razua lampi hman rih lo ding in thawng thanhnak kan tuahmi cu zulh ding in le, Zotung hmunram chung i a cangmi kahdohnak le tualchung thawng dik hna cu CDF-Zotung nih thawng thanhnak kan tuah lai, tiah CDF-Zotung nih nihin August 8, ah cathanh an chuah.
Leave a Reply