NA RUAT BAL MAW
===============
Kawl Ralhrang pawl hi phun 7 in kan doh hna: 1.Hriam i tlaihin ral a do cuahmah mi, tlangcung hriamtlai vialte le Mino vialte (Nunnak thanin). 2.Ralhrang hruainak kut tangah riantuan duh ti loin CDM tuah in ral a domi mifim rual hna (Lahkhah le reng sining vialte kaltak in). 3.Online media cheukhat nih ralhrang thader nak caah mipi lei tangin thawngthanhnak le thawngtheihternak le tangka kawlnak in raldohnak a tuah mi hna. (Vauruang Zunthil le Rungtlang Authawng le a dang cheukhat media).
4.Ramleng/chung he kan sikhawh tawk cio , chuahin tangka, eidin le thilri pekin pumpak, chungkhar le buu cio in ral a domi hna. 5.Mah le khua sang le innlo kaltak loin a um i ralhrang umkalnak thawngthanhtu le a herh ahcun caantha a umning in doh cio ding tiah aa timmi mi tampi hna:-khuapi chung deuh. (Ralzam hi i lawh cio a si lo:-CDM,Tlaih ding mi hna,lungtawr ngeimi hna hi an um ve).
6.NUG cozah nih ramkip theihpinak le cohlan- nak an hmuhkhawhnak caah le ralhrang rian le uknak a dih zaunak hnga ramchung/lengin ral an do cuahmah ve. 7.Ramleng/chung le hmunkip le kakip ka umnak cio in rawl ulhnak le thlacamnak he kan ram dothlennak ah teinak kan hmuhnak Bawipa sinah thla a cammi vialte hi a biapi tukmi ral domi kan si i philh loding a si.Bawipa aa telnak hmunah teinak le himnak a um i Bawipa aa bochan mi hna sinah teinak um.
Cu caah Bawipa sinah bawmhnak halin kan ram dothlennak caah Hriamtlai vialte himnak le ralteinak caah CDM tuahmi vialte caah Hriam,suingun chawva le eidin hlutu vialte caah Ramchung/leng hruaitu vialte caah Mipi kan himnak le innlo himnak caah NUG cozah caah tiin thlacam daithlang hrim hna hlah usih, Amen! Crd-Bawipa Le Kan Ram Caah
Relchap, (Photo Dang) Yeni Nichuahlei Naypyidaw PDF Camp Cu SAC ralkap Nih An Kah I, PDF 1 Nunnak Liam!: Pako ramṭhen Yeni nichuahlei Naypyidaw PDF 802 battalion sakhan cu July 14, zaanlei ahkhan hmunthum in kah an ton caah PDF pakhat nunnak a liam. SAC ralkap lei in minung 6 hrawng an thi, tiah Naypyidaw PDF 802 sin in theih a si.
“Kan umnak hmun panh in SAC ralkap nih hmunthum in rallam an kan sial hnawh i, an kan kah caah kanmah lei in minung pakhat nunnak a liam, kuan kan ngeih ti lo caah hnu kan tolh i, cycle 2 le meithal 2 kan sung,” tiah Naypyidaw PDF 802 nih cathanh an chuah.
Naypyidaw PDF chungtel pakhat cu nai ahkhan SAC ralkap nih an tlaih i rallam sialnak ah an i ratpi tiah PDF chungtel pakhat nih a chim. “Tlaih a tongmi PDF pakhat sin in kan sakhan umnak an theih i, tlaih a tongmi cu hriṭem buin an i ratpi ka hmuh, kahdohnak ah SAC ralkap 6 an thi,” tiah Naypyidaw PDF 802 battalion chungtel pakhat nih a chim.
Ukraine Nih North Korea Phihkharnak A Tuah Ruangah N. Korea Nih A Mawhchiat!: Russia nih Ukraine ram nichuahlei um Donetsk le Luhansk cu Independent ram ah a phuan mi cu North Korea ram nih a cohlan hnu in Ukraine nih N. Korea he ramhnih i pehtlaihnak cu a phih i, North Korea nih Ukraine cu a mawhchiat tiah theih a si.
N. Korea nih Donetsk le Luhansk cu Independent ram ah a cohlan hnu in Ukraine nih July 13 ahkhan ramhnih kar pehtlaihnak cu a rak phih ve. Kan hnu thla ah Russia hawikom a si mi Syria nih Donetsk le Luhansk cu independent ram ah a cohlan hnu in North Korea nih atu bantuk in a cohlan ve.
Hi ramkulh pahnih Independent ram ah kan cohlan mi cung ah Ukraine nih North Korea cung ah phihkharnak tuahnak nawl a ngei lo tiah N. Korea Khualipi Pyongyang ministry of foreign affairs zung chimnak nawlngeitu nih a chim, tiah KCNA nih a ṭial. Russia nih N. Korea sin ah Donetsk le Luhansk cu independent ram ah cohlan piak ding in a nawl tiah Ukraine ramleng minister Dmytro Kuleba nih a chim ve. Donetsk le Luhansk he pehtlaihnak ṭha kan ser lai, tiah N. Korea nih cun a chim chap.
Tamu Ah Khuami Pahnih Kahthah An tong India- Myanmar ramri Tamu ah July 13 le 14 ah khuami 2 cu a ho si theihlo mi hriamtlai phu hna nih meithal in an kah hna tiah tualchung mi hna sin in theih a si. July 13 ah Tamu SawBua 4 veng kam Kala Daw Sat ah kum 40 a si mi U Aung Aung i aruak cu hmuh a si i Tamu bawmchan tu phu nih a ruak cu an fimtual tiah theih a si.
A nupi cu tisik annhnah a zuarmi a si i U AungAung cu zeiruang ah an thah ti zong a thei lo. July 14 zan Sml 12:00 hrawngah Tamu Myomah 13 um U Zaw Khine ( Kum 35 ) cu Phyo Saw Htee hna nih PDF he ai pehtlai tiah an lunghrinh caah a mah a inn cia ah an kahthah tiah theih a si. A ruak cu India ramri PanKaa luhnak tiva kam ah an hlawnh tiah theih a ai. U Zaw Khine cu Ke thum ngei mawtaw mawngmi a si i Saya San, WatRub, Than ZawSin khua ah meihawl chuahnak ah riantuan in paw a cawm mi a si tiah khuami hna nih an chim.
Myaing Ah SAC Ralkap Nih An Tlaihmi PDF Pahnih SAC Ralkap Bawmhnak In An Luat, Magwe ramțhen, Myaing peng ah SAC ralkap tlaih a tongmi tualchung PDF pahnih hna cu SAC ralkap chungtel nih bawmhnak ruangah an luat țhan tiah theih asi. Myaing peng nitlak lei le Pauh peng ramri YeNanHmaw lei ah umhmun a khuarmi SAC ralkap hna nih Myaing peng PDF pahnih cu an tlaih hna.
PDF pahnih hna cu WatPok khua ah an chiah hna i nizan July 14 zan Suimilam 8:00 hrawngah sakhan chung um SAC ralkap pakhat nih an kut țemnak cu a phoih piak hna i a himnak tiang a thlah hna. Tlaih a tongmi PDF 2 cu tluang tein a himnak hmun an phan cang tiah Bu Kyan Tone nih a chim. Luatnak a hmu than tu PDF 2 cu khoika PDF an si kan thei kho rih lo. Hi cathanh kong he pehtlai in We Love Myaing phu sin in pehtlaihnak kan tuah ko nain lehnak a um rih lo .
KyaukKyiSatLay Khuami Pakhat SAC Hrianngan In A Thi, KNU hmunhma, NgiangLayPin pengkomh, KyaukKyi Peng chung kahdohnak ah SAC ralkap Khah- Mah- Yiah – 351, Khah – Lah- Yiah 60 hna nih SatLay khua cu hriamngan in an kah caah khuami pakhat a nunnak a liam i ngakchia pahnih hliam an tuar tiah KNU nih an thanh. Khuachung inn 2 zong a rawk. Nizan July 14 zan ah KyaukKyi khuapi Mala Oo gate le SinmaTaung in SatLay khua cu an kah hi a si.
Hrianngan kahnak ruangah a thi mi cu Saw Si May (kum 40 ) asi i a fale Naw Hti Se Khu( Kum 12) le Thlaruk a si mi Saw Hti Phu Ka Loe an i hliam. Kyauk SaYit khuakomh, TaungPuh khuakam ah SAC ralkap Kah- Mah- Yiah 350, Khah- Mah- Yiah – 603 le National Liberation Army Battalion 5 hna karlak ah kahdohnak a chuak i SAC ralkap lei a thi mi na um ko nain a zat cu fiang in kan thei kho rih lo.
Leave a Reply