SAC Ralhrang Nih Tuah Hnga Ding Rampi Thimnak Cohlan Le Pom Piak A Si Lonak Kong NLD Nih Cathanh A Chuah!
=======================
SAC Ralhrang nih phu thar an dirh mi Pyidaungsuu thimnak commission nih tuah hnga ding rampi thimnak cu NLD lei in an cohlang lonak kong le an pom lonak kong cu zeitik hmnah ah cohlan le pom piak an si lai lonak konh cu cathanh an lanhgter.
Rampi president lawng nih phu dirnak nawl a ngei i Pyidaungsuu Hluttaw nih pom piak mi phung ning a si mi Pyidaungsuu rampi thimnak commission (UEC) cu hrawhin SAC ralhrang nih phu thar an dirh mi cu phung ningin a si lonak kong,
Mah commission nih tuah hnga ding rampi thimnak telin an riantuannak lam le zeibantuk a si ah zeitik hmanh ah pom piak le cohlang piak an si lai lonak kong zong mah cathanh ah langhter a si. A luanciami 2020 thimnak result cu phung ningin langhter le theihter a si ko nain SAC ralhrang nih mipi nawl ngeihnak cu chuh in hramhram in uknak an laak i hrawh a rak si.
Mah lio thawkin mipi nih hramhram le uknak a laa tu SAC ralhrang cu lam kikin dohin dohthlennak a chuak ii a tu ah a zualhma chinchin mi kan phak lio caan piah SAC ralhrang nih Kawlram mipi le ramdang mi vialte cu hlen timhin tuah than hnga ding rampi thimnak cu cohlan piak an si lonak kong NLD nih an langhter.
Kawlram mipi nih Covid-19 kan tuar cuahmah lio ah 2020 November ni 8 rampi thimnak ah mee pee kho tu hna i 71% lenhg nih mee cu thlak cio a si ii NLD nih meehmun 82.36% in teinak a hmu ii Hluttaw palai cu minung 920 thim an rak si. Mah rampi thimnak he cun pehtlaiin thimnak hlethlaitu phu hna nih zaa lawng i tlukruannak thimnak tiin cohlan a sinak kong zong NLD nih an langhter.
Yinmapin Pengkomh Ah NUG Fim Cawnnak Lei Hruainak In Exam An Tuah, Sagaing ramțhen, Yinmapin pengkomh i khua pakhat ah NUG cozah fimcawnnak lei hruainak in nihin July 9 ah ah exam an tuah. Cu exam cu taangcheu in taanghra tiang tuah a si i siangngakchia 600 tluk an phi tiah theih a si.NUG Ministery of Education i caan kar lak cacawn kum ah ca chimtu saya/mah, volunteer dihlak 55 le CDMers 18 nih ca an chimh hna tiah theih a si. A luancia July zarhkhat nak zong ah khan Yinmapin pengkomh khua pakhat ah NUG i fimcawnnak lei siangngakchia tonpumhnak, cathiam hlei laksawng pek nak le winter sports an tuah piak hna.
Phungning Lo In Myanmar Rianțuantu Hna Cu Thailand Cozah Nih Work Permit Pek hna Lai, Phungning lo in Thailand ramri lawnh in a lutmi Myanmar rianțuantu hna cu Work permit kan chuah piak hna lai tiah Thailand cozah nih fehternak cathanh an chuah.
Thailand ram chungah phungning lo in lut in rian a țuan tu Myanmar, Laos ,Cambodia, Vietnam rammi riantuan tu hna cu Pink colour card an ti mi Work permit kan tuah piak hna lai tiah Thailand cozah nih a luancia July 5 ah fehternal cathanh an chuah.
MinKin Peng TaungLat hmunhma Ah Rallam A Sialmi SAC Ralkap Kahdoh An Tong , Ralkap 2 An Thi, Sagaing ramțhen, MinKin peng TaungLat hmunhma ah rallam a sialmi SAC ralkap le PyoSawHtee hna cu kah an tong i SAC ralkap 2 an thi tiah MinKin dothlennak kong thawngthanh tu hna nih an langhter.Nizan July 8 ah MinKin peng Taunglat hmunhma um Nichuah Kolay khua in SAC ralkap hna cu AHtetSaThar ( အထက်စသာ)khua lei ah rallam an sial. TaungLat Pah- Kah- Phah phu hna le MinKin PDF battalion 2, tat- khuai 2 hna nih an bawh hna i an kah hna SAC ralkap 2 an thi tiah MinKin dothlennak tuahtu phu nih an langhter.
Ṭaal Khua Pawng Kahdohnak A Dih In Ṭaal Khua Cu SAC Ralkap Nih An Khangh Caah Inn 10 A Ciam, Falam peng, Falam-Hakha lam cung um Ṭaal khua cu SAC ralkap nih inn 10 leng an khangh cang, tiah tualchung mi hna sin in theih a si. Nizan July 8 ah Ṭaal khua pawng ah SAC ralkap le CNA, CNDF, CDF kar kahdohnak a chuak i, SAC ralkap 15 nak tam an thi, tiah theih a si. SAC ralkap pawl nih Ṭaal khua cu an khangh i, Falam khua zong in hriamngan voi hnih hrawng an kah, tiah tualchung mi hna sin in theih a si. Ṭaal khua cu SAC ralkap nih a voi thumnak an khangh a si i, inn 30 leng a kaang cang. Ṭaal khua cu inn dong 36 umnak khua hmete a si.
Chin Miphun Palik 2 Hriamthil He Myine PDF Sin Ah CDM An Tuah, Magway ramṭhen, Myine peng KaiṬawMah(ကိုင်းတောမ) palik sakhan in palik 2 cu nizaan July 8, zinglei ah Myine PDF sinah CDM an tuah tiah theih a si. CDM cawlcanghnak a tuahtu hna cu Private number lah/261731 Pasang le lah/284488 Lu Taw an si. Meithal pakhat veve leng ah kuanfang 90 zong an i put tiah Myine PDF in Bu Latya nih a chim.
“Nizaan June 8, zinglei suimilam 9:45 hrawngah CDM an tuah hi a si. An pahnih in KaiṬawMah(ကိုင်းတောမ) palik sakhan in an si. An pahnih in BA 94 meithal pakhat veve an i put caah minung pakhat ah sing 50 laksawng pek an si” tiah a chim. CDM cawlcanghnak a tuahtu ralkap cu Pakokko pengkomh KaiṬawMah(ကိုင်းတောမ) palik sakhan ah rian an ṭuannak ni 4 lawng a si rih, an pahnih in Chin miphun an si caah a tu ah cun Chin ramkulh lei ah kalter an si cang tiah theih a si. CDM cawlcanghnak a tuahtu palik 2 telh in Myine PDF sinah CDM cawlcanghnak a tuahtu ralkap dihlak 9 an si cang. Cu chung in minung 3 nih an hriamthil he CDM cawlcanghnak an tuah tiah Bu Latya nih a chim.
TapaitKyin CDM Siangcachim Pakhat SAC Nih Kum 15 Thong Thlak Ding In Bia An Khiah, Mandalay ramṭhen, TapaitKyin(သပိတ်ကျင်း) peng ZayatKwin(ဇရပ်ကွင်း) khua ummi CDM sayamah Daw Cho Ya Min Han cu SAC nih Uboe(အိုးဘို) thonginn biaceihzung ah phungrelnak caang poh-mah 50(ည) in July 6 ah kum 15 thong thlak ding in bia an khiah piak tiah theih a si. SAC nih CDM cawlcanghnak a tuahtu sayamah Daw Cho Ya Min Han cu 2021,December 15 ah a umnak ZayatKwin (ဇရပ်ကွင်း) khua ah an rak tlaih hnu ah Uboe(အိုးဘို) thong inn ah an rak kuat.
“PDF he pehtlaihnak na tuah tiah an puh caah phungrelnak caang poh-mah 50 (ည) he kum 15 thong thlak ding in Uboe(အိုးဘို) biaceihzung nih July 6 ah biakhiahnak an tuahpiak” tiah Daw Cho Ya Min Han he neihniam in ummi pakhat nih a chim.
SAC le SNA An Țangți Tiah CSUR-Chindwin,Uru Spring Revolution Nih Thanh, Sagaing ramṭhen Homalin(ဟုမ္မလင်း) peng NawngKhamKu(နောင်ခမ်းကူး) ah July 8, chunhnu ah HPDF 124 ralkap pahnih tlaih an tong, tlaih a tongmi pahnih chung in pakhat cu a nunnak liam tiah CSUR-Chindwin, Uru Spring Revolution nih cathanh an chuah.
July 8, ah Homalin peng NawngKhamKu(နောင်ခမ်းကူး) ah HPDF 124 ralkap 2 cu SAC ralkap kuttang um sah-yiah-phah(စစ်ဘက်ရေးရာလုံခြုံရေးတပ်ဖွဲ့) phu le Shan (Shanni) National Army(SNA) cheukhat nih an kah hna i an tlaih hna tiah theih a si. Kaphnih kar kahdohnak ah hriam thazaang aa thlautuk caah HPDF 124 ralkap Ko Pa Gyi le Ko Pi Lung cu tlaih an ton hi a si, Ko Pa Gyi cu kah a tonnak hmun ah a nunnak a liam tiah an langhter.
Kahdohnak chung ah Shan National Army(SNA) chungtel cheukhat an i tel caah, SNA nih media cheukhat ah SAC ralkap he hmunkhat ah rian kan ṭuanṭi lo tiah phung ning tein an langhtermi cu a lem lawng a si tiah CSUR-Chindwin,Uru Spring Revolution nih cathanh an chuah.
Leave a Reply