Taningtharyi Ramṭhen Kahdohnak Ah SAC Ralkap 3 An Thi I, Hriamthil Zeimawzat Zong PDF Nih An Laak
Taningtharyi ramṭhen, Kawthoung(ကော့သောင်း) pengkomh, Pyi Gyi Mandaing(ပြည်ကြီးမဏ္ဍိုင်) peng Yadanabon(ရတနာပုံ) khua pawng ramlak hmunkhat ah SAC ralkap le tualchung mipi vengtu ralkap hna cu April 23 zaanlei Sml 5 tluk ah khan an i kap i SAC ralkap 3 an thih lengah hriamthil le zenkuan zeimawzat zong an lak, tiah theih a si. Mipi vengtu ralkap umnak hmun lei ah SAC ralkap nih hriamngan le hriamhme in an kah thlorh i kahdohnak hi Sml cheu hrawng a rau.
Kahdohnak ah SAC ralkap 3 an ti i mipi vengtu ralkap hna cu hliam tuar um lo tein hnu an tolh kho ṭhan, tiah Taningtharyi pengkomh PDF hruaitu nih thawng an thanh. Cu kahdohnak ah cun Kawthoung pengkomh PDF le pah-kah-phah(ပ.ကဖ) an i bawm, tiah theih a si. Cun, April 25 chunhnu ah Pakokku peng Kine(ကိုင်း) khua nichuah lei kap ah a um mi ṭhlam ah chikhat aa din mi SAC ralkap hna cu PUGF, Myaing le PPDF aa bawm mi PDF phufonh hna nih 60mm in an kah hna i, SAC ralkap 5 an thih lengah hliam tuar zong an tam, tiah Pakokku Guerrilla Force nih thawng an thanh.
Khin U Ah Mipi Inn 800 Tluk Khanghpiak An Si, Tualchung Mi 150 Leng An Thi! April thla chung ah SAC ralkap nih Khin U peng ah rallam an sial i khua chung thlok in mipi inn zong an khangh pin ah sualnak ngei lo mipi zong an thah hna, tiah tualchung mi hna sin in theih a si. SAC ralkap nih Sagaing ramṭhen chung peng (township) tam deuh ah March 3 zaanlei in internet line an phih i rallam an sial. Khin U peng ah SAC ralkap nih inn an khangh ruang ah inn 775 an rawk cang i mipi 4000 leng inn ngei lo in an um cang, tiah Khin U peng thawngzamnak nih record a tuah ning in theih a si.
“April 23 zing ah Khin U palik le Shwe Bo training an tuahnak sakhan in ralkap 100 tluk nih Khin U peng Ywa Thar(ရွာသာ) khua inn 62 an khangh pinah civil mi 2 zong an thah hna i, PDF sakhan an luh hnawh,” tiah Khin U peng thawngzamhnak nih a langhter. Khin U peng ah SAC ralkap nih khua mi 156 an thah cang hna i minung 100 hrawng hliam an tuar tiah theih a si. Internet line an phih hnu in SAC ralkap khah-lah-yiah (ခလရ) 77 in thazaang 200 tluk cu Shwe Bo, Khin U, Depaeyin peng hna ah rallam an sial thluahmah, tiah theih a si.
Pyotaung(ပျဉ်ထောင်), Ywa Tit(ရွာသစ်), Dan Kone(ဒါန်းကုန်း), Hmantaw(မှန်တော), Kyon Lay(ကျွန်းလယ်), Tat Pe(သက်ပေး), Ta Moh(တမုတ်), Kalalu(ကုလားလူး), Shia Lun(ရှားလွင်), Nga Tin Gyi(ငါးတင်းကြီး), Min Win Seih Kone(မင်းဝံစိုက်ကွင်း) le Ywa Thar(ရွာသာ) khua hna ah SAC ralkap le Pyosawtee hna nih Inn an khangh ruang ah inn tampi a ciam. Pintaung, Ma Gi Tone(မကျီးတုံး) Mah Daung Hla(မဒေါင်းလှ), le Ywa Tit(ရွာသစ်) khua hna ah SAC ralkap nih umhmun an khuarnak hi khumkhat leng a si cang i cu khua hna in mipi 1500 tluk cu ralzaam dirhmun an phan, tiah Khin U peng thawngzamhnak nih a thanh. Crd- The Chin Post
Australia Nih Raltuknak Caah Timhlamhnak Kan Ngeih A Herh., Russia le China ral tihphannak he pehtlaiin Australia hmunhimnak vuanci Peter Duton theihter ralring peknak a chim hnuah Russia-Ukraine kahdohnak ruangah kan mah lei zongin Raltuknak caah timhcia in um kan herh tiah a chim. Beijing le Moscow cozah ruangah kan Vawlei cung ah nawl ngeitu thar an chuah kho tiah Australia vuancichoh nih a chim dih hnuah a cung lei bantuk in Peter Duton nih a chim.
Beijing le Solomon tikulh ramhnih karlak ah lungtlinhmi ralvennak minthut ruangah kan kutkaa in China cu a hlat nak ah chiahnak ding le, kan hoikom pawl he i fonh dingah hnu lei ah kir a si lai lo i, kan mah lei nih a san zong ralhrawng khamnak kan chiah tiah Morrison nih a chim.
Nu pawl le hngakchia pawl a that tu pawl cu kan mah nih mithmuh kuttongh in kan ton cang bantuk in a tu zongah Nu pawl le hngakchia pawl a that hnga ding miniung pakhat a um rih tiah Peter Duton nih a chim. Bitak te le timhlamhnak kan ngeih a hau i, a tu cozah kutchungah ral tuk nak caah timhlamh nak a um rih lo, ral tuk nak caah timhlamh nak kan ngeih a herh tiah a chim chap.
Peter nih cun Australia China le Russia ral in kan himkhawh nak hnga ding caah timhcia tein timhlamhnak kan ngeih a herh, a tu kan kan cozah kutchungah cun ral tuknak caah zeibantuk timhlamhnak hmanh a um rih lo , Russia bantuk in nu le hngakchia a that e minung pakhat a um rih i, cu cu China uktu Xi Jinping hi a si tiah a ti.
Leave a Reply