CDM Tuah Siloin Chunglei Buainak Ruang Ah Ralkap In A Zaam Mi An Tam, Tiah Ralkap CDMer Pakhat Nih A Chim
=======================
SAC ralkap hna chung in mipi sin ah i fonh in CDM cawlcanghnak tuah siloin, a ruang tampi ruang ah SAC ralkap sinak kaltak in a zaam mi cu hlan nakin an tam, tiah SAC ralkap he naihniam in ummi hna nih an chim. SAC ralkap nih uknak an lak hnu ah, atu bantuk in a zaam mi cu an tam i, SAC nih an kuttang ummi ralkap hna cung ah hnekchihnak an tuah ruang ah le phaisa harsat ruang ah a zaam mi an tam, tiah theih a si.
SAC kuttang um ralkap hna cu a ruang tampi ruang ah an ralkap sinak cu kaltak in a thli in a zaam mi an karh ngai, tiah June thla chung ah CDM a tuahtu ralkap pakhat nih a chim. “SAC kuttang in ka chuah hlan, Meiktila (မိတ်ထီလာ) ah thla 3 training kan kai lio ah, training in a zaam mi hi nitin ngawt in an rak um. CDM tuah siloin, Minung 3/4 tiin a thli in an rak zaam i kan kawl tawn hna,” tiah June thla ah khan CDM a tuahtu Myait battalion 501 in Ko Aung Min Htat nih a chim.
“A tlizaam mi lak ah hin ralkap sawhsawh lawng siloin ralbawi zong an i tel i, an tam ngai cang. SAC ralkap nih nawlngeihnak an lak hnu ah ralkap pawl cu kahdohnak i kal peng a si caah re a thei tuk. Thlahlawh le eidin thilman ah harnak an tong, dinhcaan lak in mah umnak khua ah tlun a ngah lo, cucaah a zaam mi an tam ngai. Hi hnu zong ah a zaam mi an tam rih ko lai. SAC cu amah tein a tlu te ko lai, a donghnak ah cun thantar lawng a dir te lai,” tiah CDM cawlcanghnak a tuahtu Bu-kyi Zin Yaw nih a chim.
Taze Shwe Daung Min Datsi Dawr Ah A Ummi SAC Ralkap Kah An Tong 3 An Thi: Sagaing Ramṭhen, Taze peng, Shwe Daung Min(ရွှေဒေါင်းမင်း) Datsi dawr ah a ummi SAC ralkap pawl cu Taze people Comrades TPC nih nihin August ni 12 chunhnu suimilam 3:15 hrawng ah an kah hna. Kahdohnak ah cun ralkap 3 an thi i, 2 hliam an tuar, tiah theih a si. Shwe Daung Min Datsi dawr cu SAC nih checkgate ah an hman i khualtlawng mi hna phaisa an hal tawnnak hmun a si, tiah theih a si.
Chunhnu suimilam 3:15 hrawng ah hriamngan thawng le hriamhme thawng kan theih hnu ah an i kap, tiah kan theih. Kaphnih kar kahdohnak cu minute 20 hrawng a rau, tiah khuami pakhat nih a chim. Cu kahdohnak ah cun Taze People Comrades phu nih an kah hmasa hna hnu ah kaphnih kar kahdohnak a chuak, tiah a chimchap.
US Ah Monkeypox Zawtnak A Karh Ngai Caah Minung 100,000 Leng Nih An I Chawnh Cang, US ah Monkeypox zawtnak aa chawnhmi cu August 11 tiang ah minung 100,768 tiang an phan cang, tiah ngandamnak lei ṭuanvo ngeitu Centers for Disease Control and Prevention nih an thanh. Atu tiang ah vawleicung ramkip huap in US cu monkeypox zawtnak a tambik nak hmun a si, tiah theih a si.
American mipi hna nih zawtnak an i chawnh ning cu a karh ngai caah August 4 ah mizapi ngandamnak ca ah ralrin a herh ngaimi zawtnak a si, tiah cozah nih thawngthanhnak a rak tuah. Thawng thanhnak tuah a si hnu ah, runvennak si i chunh ding in hmual ngei deuh in cawlcanghnak zong an tuah fawn. Vawleicung pumpi Monkeypox zawtnak ruang ah nunnak a liammi cu 12 tiang an phan cang nain, US ah cun cu zawtnak ruang ah nunnak a liammi an um rih lo.
Monkeypox zawtnak cu pa le pa umṭinak in a tambik i chawnh a si nain, nau pawi lio mi, nau ngei cangmi nu 50 leng le ngakchia cheukhat sin zong ah kan hmuh, tiah Centers for Disease Control and Prevention nih an thanh.
Sagaing Ramṭhen Chung In Thla Khat Chung Ah Ralzaam 70,000 Hrawng An Karh! Sagaing ramṭhen chung in thla khat chung ah ralzaam dirhmun a phanmi minung 70,000 hrawng in an karh, tiah UNHCR nih August 1 ah khan cathanh a rak chuah. UNHCR nih July 4 cathanh a rak chuahmi ah Sagaing ramṭhen chung ah ralzaam dirhmun a phanmi minung 410,000 leng an um i, August 1 tiang cazin lakmi ah ralzaam dirhmun phanmi 408,500 hrawng an si, tiah an langhter.
SAC ralkap nih Sagaing ramṭhen chung ah van lei le vawlei in kahdohnak nitin ngawt in an tuah caah tualchung mi hna cu ralzaam dirhmun an phan i, eidin le umṭhutnak ah harnak tampi an tong, tiah ralzaam bawmtu hna chungtel pakhat nih a chim. Nizaan August 11 ah Yinmarbin, Khin U le Depeyin peng ah SAC ralkap nih rallam an sial i, kahdohnak an tuah caah khuami tampi cu mah umnak hmun kaltak in ral an zaam hna, tiah theih a si.
South Korea President Nih Samsung Company Vice Chairman Cu Luatnak A Pek!, South Korea President Yoon Suk-yeol nih rampi chawhlehnak ah harnak an ton ruang ah rampi chawlehnak a ṭhat ṭhan khawh nakhnga Samsung Company vice chairman
Lee Jae-yong cu thong a tlaknak in luaknak a pek, tiah nihin, August 12 ah biaceih zung nih an thanh.
Rampi nih kan tonmi chawleh harsatnak kan lonh khawh nakhnga chawhlehthalnak lei a thiammi hna le hmai a kan hruai khotu ding hna cu lakhruak in an case ngaihthiam i luatnak pek an si, tiah South Korea justice minister Han Dong-hoon nih thawng fianhternak a ngei. Atu bantuk in rampi chawlehthalnak ah i tel khawh ṭhannak caanṭha kan pekmi hna ruang ah hin rampi chawleh harsaknak cu a si khawh chung in kan lonh khawh lai, tiah a chim chap.
Vawleicung minthang Smart Phone le Memory-chip serchuaktu Lee Jae-yong cu eihmuarnak ruang ah thla 18 thongthlak a si hnu ah atu bantuk in luatnak pek a si. Lotte Company Chairman Shin Dong-bin zong luatnak pekmi chung ah a tel ve, tiah theih a si.
Leave a Reply