SAC Nih Spyware Bunh Dingin Nawl A Pek Cang Hna Caah Phone Chawnh Le Cakuat I Ralrin Taktak A Hau

Kum 2021, Spring Revolution a thawnnak bik pakhat cu pehtlaihnak a that caah a si. Online in meeting kan tuah, khua kan khang i lai kan rel. Fawi tein thawng kan i thanh kho. Pehtlaihnak tha hlah sehlaw CRPH, NUG, PDF, CDF le tlangcung hriamtlaibu hna hi atu bantukin an cawlcang kho lem lai lo.

Cucaah atu hi ralhrang khawngsil nih thluak an chuah ve cang. Cucu phong kan i chawnhmi, ca kan i kuatmi tibantuk a karlak ah ngaih le rel khawhnak seh Spyware timi kha bunh dingin pehtlaihnak le company le oparator hna sinah ralhrang khawngsil nih nawl a pek cang tiah Reuter nih cun a tial.

Spyware bunh dingin ralhrang khawngsil nih nawl a pekmi hna cu MPT, Mytel le Ooredo hna an si tiah Reuter nih cun a langhter. Asinain MPT company nih hi nawlpeknak hi kan thei rih lo, kan sin a phan rih lo tiah an chim.

Hihi an sin a phanh rih lo maw a si, asiloah ralhrang an tih hna ruangah an thuh maw a si ti cu theih a si lo. A ngaingai tiah cun Mytel cu ralhrang ngeihmi a si i MPT zong nawlngeihnak an lak hnu cun anmah kuttang ah a um ko cu mu!

Hi kong hi ramchung in Cyber Security thiamsang pakhat nih a chimmi cherhchan in Reuter nih a tialmi a si.

Hi Spyware seh seh hi China ah an cahmi a si. Hi seh an bunh a si ahcun phone na chawnhmi le cakuat na kuatmi hna kha a karlak ah an ngaih, an rel khawh lai ti a si.

Hi kong he pehtlai in Fortify Rights i Myanmar palai nuhrin covo lei thiamsang Nicky Diamond nih cun “Spyware kha Telecom ah an hman lai i biatak tein a cawlcangmi hna kha i hmaithlak in zeitindah an i pehtlaih, khoika dah an um, tiin kawlnak le hlathlainak ah an hman lai. A biapimi pakhat khat i ceihruah ding a um tikah Myanmar i phone le oparator hna cu zumh awk an tha ti lai lo. Lamdang in pehtlaihnak kan kawl a hau” tiah a chim.

Hihi pehtlaihnak lei company nih kan thei lo ti ko hna hmanhsehlaw an chim ngam lo zong a si kho, a dik ko lai ti hi zumh deuh a si. Ramchung lei in Cyber Security thiamsang pakhat chimmi cherhchan in vawleicung minthang REUTER nih a tialmi cu a dik ko lai tiah zumh a um.

Cucaah ramchung pakhat le pakhat siseh, ramleng le ramchung siseh i chawnhbiak le ca i kuat tikah i ralrin taktak a hau ti kha philh hlah usih.

#Reuter nih May 19 ah a tialmi “How Myanmar’s military moved in on the telecoms sector to spy on citizens” timi kha a tawifiannak tein ka lakmi a si.

The Chin Post