Kum 2021 Nobel Peace Prize laksawng cotu Russian Journalist Dmitry Muratov nih Ukraine buainak ruangah a himnak hmun ah a tlizaammi ngakchia hna bawmhnak ding ca ah tiin a laksawng comi cu US dollar 103.5 millions in a zuar. Muratov cu Kum 1991 lio ah a zalongmi Russian Newspaper Novaya Gazeta a rak dirhtu a si i, Phillippines Journalist Maria Ressa he Nobel Peace Prize cu Kum 2021 ah khan an rak co.
A laksawng comi cu America, New York khuapi ah June 20, vawlei cung hartongmi hna Ni ah a zuar i, a hmuhmi phaisa vialte cu Ukraine buainak ruangah a tlizaammi ngakchia hna caah UNICEF’S Humanitarian riantuannak ah bawmtu a si lai, tiah a thanh. Muratov nih a dirhmi Novaya Gazeta Newspaper nih President Putin le a party cu faak piin a mawhchiat hna caah Ukraine buainak kong he pehtlaiin ralrin peknak a ton hnuin March ah khan Russia ramchung i a riantuannak cu a ngol.
Muratov nih a laksawng a zuarmi cu voi dang i Nobel Peace Prize an rak zuar tawnmi man nakin a let in a tam deuh, tiah US ramchung media nih an langhter. Ka hmuhmi phaisa chung in US dollar sing 5 tluk cu zatlang bawmhnak petu phu sinah ka hlut lai tiah biakamnak zong a tuah i, Kum 2000 lio i thah a rak tongmi Novaya Gareta Journalist 6 hna philhlonak ca ah tiin atu bantukin ka tuah tiah Muratov nih a chimchap. Cred : The Chin Post
Leave a Reply