Nuclear Tam Bik A Ngei Mi Ram Pawl Cu Dan Peek Nan Si Lai Timi Ruahnak Cu Sullam A Ngei Lomi A Si Tiah Russia President Hlun Medvedev Nih A Chim
========================
Russia president hlun Dmitry Medvedev nih U.S cu Russia bantuk in Ukraine kahdohnak caah Nuclear thazaang cu dan peek dingah nitlak lei ram hna nih an i zuamnak cu minung pawl caah tih a nung tuk mi a chuahter kho tiah a chim. Russia nih Ukraine kahdohnak kum 1962, Cuban Missile buaibainak a chuah hnu ah Russia le nitlak lei ram hna karah pehtlainak thalo buaibainak a chuah ter ii vawleipi mimnung hna nih Nuclear raltuknak a chuak sual lai timi hi phan cuahmah caan zong lio a si.
Medvedev nih U.S cu vawleicungpi minung thikhuaitu empire na si tiah a ti ii American minung pawl thahnawnnak, Japan cu American nih nuclear kahdohnak le Vietnam in Afghanistan tiang kahdohnak chuahter in vawleicung mipi thikhuaitu na si tiah a ti. Ukraine ah Russia a thil tuah pawl hlethlai dingah biaceihzung a si loah tribunals hna cu hman dingah i zuamnak cu vawleicungpi rawhral harnak a chuahter khotu a si tiah Medvedev nih a chim.
“Nuclear tampi a ngeih mi ram cu dan peek nan si lai timi ruahnak cu sullam a ngei lo mi a si. Minung, miphun hritlai thutum kalnak ah tlerhkhawnnak a chuah ter kho tiah,” Russian Security Council i chairman a simi Medvedev nih Telegram ah a tarlangh. Russia le American ram hna cu Vawleicung Nuclaer 90% a tlaitu an si ii an mah i ral lei he pehtlaiin thuhmi hriamnam 4000 (warheads) hrawng an ngeihnak kong cu American Scientists pawl sinin theih a si.
Medvedev cu kum 2008-2012 president a tuan chungah nitlak lei ram hna he pehtlainak tha a herh mi le a ser kho mi thlennak a tuah khotu minung pakhat tiah rak auh mi a si. Asinain Putin nih Feb:14 ah kahdohnak nawl a chuah hnu ah Medvedev cu a mah le a mah tein a fak mi Kremlin ruahnak buaibaknak a chuah pitu tiah auh than a si.
“Native Indians miphun pawl laak, uknak thawkin American tuanbia hluan ah thi chuahtertu au thawng, dohral kahdohnak a si.” ti zongin a chim. U.S. President Joe Biden nih Putin cu Ukraine phung ning loin a dotu raltuknak a chuah tertu tiah a ti ii Ukraine cu American nih hriamnam pawl bomhnak a peek ii an mah zalonnak le an nunnak caah raldohnak ah an lut ti zongin a chim.
“A special military operation” tiah uahmi Ukraine ralkap cu thlak ding ah le ral a simi nationalists tiah auh mi minung pawl cu thlak dingah timhlamhnak ngeih a si tiah Russia nih a chim i Russia tlerhkhawn dingah Ukraine cu American nih a hman tiah Putin nih a chim. Vawleicungpi ral a voi 2nak a chuah hnuah American nih vawleicung kip ah minung millions in a thah hna ti zongin Medvedev nih a chim.
RELCHAP, (Photo Dang) Depayin peng palik sakhan cu nihin(July 6) zinglei ah bomb puahhnawh an si i, palik 5 hrawng cu faak ngai in hliam an tuar. Ambulance 3 in siizung ah an tlikpi hna, tiah tualchung mi sin in theih a si. Hi bomb puahnak hi tualchung PDF phuthum i bawm in an tuah mi a si, tiah SNAK EYES-PDF nih an thanh.
An cathanh ah cun nihin July 6 zinglei Sml 11:30 ah Depayin peng palik sakhan cu a lang in control khawh mi bomb in puahhnawh a si i, palik 5 hrawng cu faak ngai in hliam an tuar, tiah an thanh. Cu bomb puahnak ah cun SNAK EYES PDF, Non Profit Soldiers Ye-U le Freedom Revolution Force(FRF) hna an i bawm, tiah an langhter. SNAK EYES PDF phufonh nih July 4 zong ahkhan Ye-U peng Traditional Hospital cu bomb an rak puahhnawh i SAC ralkap 2 an thih lengah ralbawi pakhat le ralkap dang 10 faak ngai in hliam an tuar.
Sagaing Ramṭhen Chung Sianginn Onnak Thlakhat Chung Ah Cachimtu 8 Thah An Tong Cang!: 2022-2023 cacawn kum sianginn onnak thlakhat chung ah Sagaing ramṭhen chung SAC Education department in cachimtu 8 nak tlawm lo thah an tong cang, tiah theih a si. Education department rianṭuantu pakhat nih cun, “Sianginn onnak thlakhat chung ah thah a tongmi cachimtu minung 8 nak tlawm lo an si i, pehtlaih khawh lo in a tlaumi cachimtu zong an um rih,” tiah a chim.
Nizaan July 5, chun ah Yee-U pengkomh Depeyin peng Kyunṭaw khua ah cachimtu pa pakhat le nu pakhat cu Kyunṭaw khua le Innpin khua kar hleidonh ah an kut hnulei hriṭem buin, an hngawng tan in thah an si, tiah theih a si. July 1 chunhnu zong ahkhan cachimtu pa pakhat cu Mawlaih(မော်လိုက်) pengkomh PhawngPin (ဖောင်းပြင်) peng fimcawnnak zung in a kir lei lampi ah thah a rak tong fawn.
Cun, July 3, chunhnu ah KawLin(ကောလင်း) peng TayatKhung(သရက်ခုံ) khua ummi siangniamrun cachimtu U Zaw Win Thein cu a rianṭuannak MawngKaw(မောင်းကော်) khuachung sianginn kalnak lam ah thah a tong, tiah theih a si. Cu ni ṭhiam ah cun Cachimtu Zaw Win Thein a farnu TayatKhung(သရက်ခုံ) siangniamrun i cachimtu sayamah Daw Oungma Win cu innchung a um lio ah thah a tong, tiah theih a si.
Tukum cacawn kum sianginn onnak June thla zarhkhatnak ah Monywa peng Sita khua sianginn ah sianguk ṭuanvo latu cachimtu nu(sayamahgyi) cu Monywa in a rianṭuannak hmun a kal lei, Monywa-Ayardaw motor lampi ṬhaNawngWin(ထနောင်းဝင်း) khua le KyaukKa(ကျောက္ကာ) khua kar ah thah a tong. Cu ni ṭhiam ah cun Shweboo pengkomh Wetlet peng BuṬae(ဘိုတဲ) khua sianguktu (sayamahgyi) le a nau cu an umnak inn ah thah an rak tong.
Sagaing ramṭhen Monywa, Wetlet, KawLin, Depeyin le Phawngpin pengchung ah SAC Education department in cachimtu 8 cu tukum sianginn on thlakhat chung ah thah an tong cang, tiah theih a si.
Model Le Lemcang Thiam Thin Zar Wint Kyaw Cu SAC Ralkap Nih An Tlaih!: Shan State Progressive Party(SSPP) chairman fanu ṭhitumhnak ah a kalmi lemcang thiam minthang Thin Zar Wint Kyaw cu a kir lei ah SAC ralkap nih chekhlatnak gate pakhat ah an tlaih, tiah theih a si. Model le Lemcang thiam Thin Zar Wint Kyaw cu July 4 ah, Shan State Progressive Party(SSPP) chairman fanu ṭhitumhnak puai zanriah dumnak ah Shan State Army(SSA) ralkap thuam he a kalnak cu social media ah a langsar ngai in hmuh a si caah tlaih a si.
Lemcang minthang Thin Zar Wint Kyaw cu SSPP/SSA sawmnak in Haiper tisor le Shan ramkulh chaklei KyayTi(ကျေးသီး) peng, WamHai(ဝမ်ဟိုင်း) ṭhanchonak ding caah Documentary thlak ding in a kal mi a si. July 3 ah Video thlak hram ai thawk i, an dih hnu an kir lei ah vedio ai thlaknak thilthuam he ṭhitumhnak puai zaanriah dumnak ah a telpi hna. Thin Zar Wint Kyaw nih cun zeidang ramkhel lei tinhchih in thlakmi a si lo, fimcawnnak, ngandamnak lei ah le ṭhanchonak ding ca ah zuk thlak ding in SSPP nih sawmmi ka si, tiah SSPP Info ah July 4 ah a rak chim.
Zuk thlak an dih hnu nihin July 6, zinglei ah WamHai(ဝမ်ဟိုင်း) khua chuah Mairel(မိုင်းရယ်) gate ah Thin Zar Wint Kyaw zulhmi motor cu SAC ralkap nih rak chek in, tlaih a ton hi a si, tiah tualchung mi nih an chim. Thin Zar Wint Kyaw tlaih a tonnak kong he pehtlai in SAC ralkap le SSPP nih thawngthanhnak an tuahmi a um rih lo. SSPP cu nawlngeihnak latu SAC nih a sawmmi tonbiaruahnak ah aa telmi a si.
Yangon I Underground Force(UG) Phu Thawngpang A Hlattu Nuva Meithal In Kah An Si!: Yangon ah a ummi Underground Force (UG) hriamtlai phu hna thawngpang a hlat i SAC ralkap sinah thawngpetu nuva hna cu thah an si, tiah SOULS TAKERS-YANGON UNDERGROUND FORCE nih an thanh. SAC ralkap sin thawngpetu hna cu inn 100 uktu sanguk bawi U Thein Aung(ဦးသိန်းအောင်) le an nupi an si, Thaketa(သာကေတ) peng No.4 sang Ganbaung(ကန်ဘောင်) 9 lam ah khua a sa mi an si. Anmah inn ah an nu he July 5 zaan Sml 8:25 ahkhan meithal in kah an si i, U Thein Aung cu a thi colh nain an nu tu cu thi lo in hliam faak ngai a tuar, tiah theih a si.
SOULS TAKERS-YANGON UNDERGROUND FORCE hna cu zaan Sml 10 ah hliam tuar um loin an kir nain SAC ralkap nih hmunkip ah chekhlatnak an tuah, tiah an cathanh ah an langhter. Cucaah Yangon um mipi hna nih khualtlung cazin chek tikah ralring tein um khawh i zuam u, tiah theihternak zong an tuah.
Leave a Reply