Russia ah tuah mi International Army Games ah Ralhrangbu a tel ve mi hi Russia nih Ralhrangbu cawlcanghnak a tanpi ti langhternak a si.
Ralhrangbu cu August 22 in September 4 tiang Russia ram ah tuah ding mi ralkap pawl thanchonak caah ralkap he pehtlaihmi zuamnak phunphun (International Army Games) ah a tel ve.
Zuamnak an tuah ding mi pawl hi tank thiamnak (tank biathlon), raltuk tilawng thiamnak (sea cup), meithal kah (sniper frontier), vanlawng thiamnak (airbone platoon), ralkap phunglam (army culture) hna a si.
Mah zuamnak hi Russia defence ministry nih a timhtuahmi a si i, zuamnak phunphun pin ah hriamnam zuarnak le thiamnak lei thanchonak (International Military and Technicial Forum, ARMY 2021) zong a tel ve lai. Mah forum ah raldohnak lei seh thiamnak (artificial intelligence) zong langhter a si lai.
Hi kong he pehtlaihin Justice for Myanmar chimnak nawlngeitu Ma Yadanar Maung nih; ralhrangbu nih ramchungah mithah, lainawn ralhrang cawlcanghnak a phunphun a tuah cuahmah lio ah Russia nih ralhrangbu a sawm mi cu an i pehtlaihnak a thuh ning langhternak pakhat a si.
Ralkap lei cawnnak le hriamnam zuar phihnak telin world crime a buar lio mi ralhrangbu tanhpinak pakhat a si. Ralhrangbu cungah Russia thiltuahmi cu ngolter dingin vawleicung ram hna cu kan nawl hna.
Mah ralkap lentecelh zuamnak ah ASEAN nih Kawlram buainak kong hnatlaknak 5 a dirpi mi ram hna zong an i tel. Zuamnak ah a tel mi ram hna cu China, Malaysia, Vietnam, Lao, India le Bangladesh, Israel le Europe in Greek, Cyprus ram hna an si.
Ma Yadanar Maung nih; zuamnak ah ralhrangbu hmunkhat in a tel ve mi ASEAN ram cheukhat le pawngkam ramngan hna nih hin an chim bantukin Kawlram mipi thatnak caah le ralhrang cawlcanghnak ngolter dingin an kan tawlrel piak taktak hnga maw ti ruah awk ngai a si.
Ralhrangbu nih uknak a lak ruangah kan ramchungah thil a cang lio mi nuhrin covo kongah UN nih rianrangin silhnalh piak dingin kan nawl tiah a chim.
Ralhrangbu nih mah zuamnakah phaisa a dih ding hi zeihmanh thanh mi a um lo nain, Sea Cup bantuk raltuk tilawng zuamnak caah tilawng hna cu pacific rili tiang kalpi a hau mi a si caah budget tampi dih ding mi a si.
Mah budget vialte hi covid le harsatnak phunphun kar ah ralhrangbu an doh ruangah ralhrangbu tlaihhremnak le nuhrin covo a phunphun in a tuar lio mi mipi phaisa a si tiah Justice For Myanmar nih cathanh an chuah.
The Chin Post
Leave a Reply