Russia Nih Nifatin In Gas Mei In An khangh Pengnak A Ruang Mithiamsang Hna Nih A Phi An Kawl Kho Lo!
================================
Europe ram i energy a dih zah van tong tiang tiawk in a man kai lio pi ah Russia nih Amount of natural gas tampi mei in an khangh nak kong cu vawnleicung mithiamsang hna nih an chimnak in theih a si. Cu gas pawl cu hlan deuh ah cun Germany ramah kuat dingah an i timh tiah vawleicung thiamsang hna nih an chim. Finland ramri pawng sehzung ah nifatin in U.S dollar in 10 millions man a si mi gas pawl cu a kang peng tiah fimthiamsang hna nih an chim.
Gas meikangh ruangah Amount of carbon dioxide tampi a chuah ter lai i (a kik-lum) hrolhra tlang pi cu ti (a hangin luan) ah a cang dih sual lai timi zong mithiamsang hna an thinphang tuk tiah theih a si. Cu gas cu nifatin in 4.34 million cubic meters a kang peng ti zongin an chim.
St. Petersburg khuapi nitlak thlang lei Porto Bay hmunhma ah a um mi gas hang seh zung thar ah meikanhnak a chuah hi a si. Hi bantuk in thil a caan hi ramri ah a um mi Finland mipi hna nih thal chungah a voikhat nak bik an hmuh a si tiah kan theih.
Cu sehzung cu Germany lei ah gas kuat mi ti-tang pipe (ti pep) lam hram ah a um mi Compressor sehzung pawngah a um mi a si tiah kan theih. Cu gas pipe lam cu Russia nih a phih i fimthiamnak lei in buainak ruangah kan phih mi a si tiah an chim i Germany nih cun cu thil tuahnak cu ramlkhel kong he aa pehtlai mi a si tiah a chim ve.
Cu gas sehzung nifatin in U.S dollar in milion man Russia nih mei in an kangh pengnak a ruang cu mithimsang pawl nih a phi an kawl kho lo bantuk in a phih chuahter dingah an i harh ngaingai tiah theih a si i, cu meikang ruangah hroltral tlang a hang in a luang dih sual lai timi zong an thin a phang tuk tiah theih a si.
Chin ralzaam siangngakchia hna nikhat ah suimilaam pakhat lawng sianginn an kai, Hriamnam thazaang hmang in Myanmar ram uknak hramhram in a latu Min Aung Hlaing le a ralkap hna ruang ah Chinram in Mizoram lei a zaam mi Chin ralzaam ngakchia a tam deuh cu, nikhat ah suimilaam pakhat lawng sianginn ah ca an cawng tiaht ralzaam camp a ummi hna sin in thawng kan theih.
Hi kong he pehtlai in ralzaam camp ah a ummi CDM sayama Pi Thawng Tha Par nih, “District lei rian ngeitu hna nih sianginn ah ca cawn khawhnak nawl cu an kan pek ko. Asinain, kan sinak nih a tlinh lo ca ah sianginn ah kan chia kho hna lo. Hi bantuk dirhmun kan si ca ah, anmah sianginn tu hi nikhat ah suimilaam pakhat an kan hlanh. Hi suimilaam pakhat an kan hlanh mi chung ahhin kanmah nih Myanmar ram kan cawnmi ca te kan chimh hna. Ngakchia hi, an catang ning in then a si tik ah nikhat ah suimilaam pakhat hi cu kan i zaa deuh lo,” tiah CCN ah a chim.
Nikhat suimilaam pakhat sianginn an hlanh hna hi, anmah Cozah sianginn I a kaimi siangngakchia ca an cawn dih hnu zaanlei suimilaam 4:00 hnu ah a si, khi hnu i ngakchia sianginn vun kai than ter ding ah harnak an tong ngai tiah hmuh le theih a si.
Hi kong he pehtlai in, “Kan unau hna nih sianginn cu an kan kaiter ko an kan hlanh ko. Asinain, a caan hi a tlai pah tik ah kan fale ca ah a har ngai cang.
Hi bantuk dirhmun kan phak tik ah, upa hna bia kan i ruah hna i kanmah le kan umnak camp cio zong ahhin chimh ding an si ve ko tiah biakhiahnak kan tuah. Biakhiahnak kan tuah bantuk tein CDM saya/ma hna nih pumpek in ca kan chimh tawn hna,” tiah CDM Sayama Pi Tin Sung nih CCN ah a chimchap. Cun, ngakchia hna fimcawnnak kong he pehtlai in Lawngtlai District Primary School tuanvo ngei nih, “Ralzaam ngakchia hna hi kan ruah hna tik ah zaangfak tuk an si ko.
Fim cawnnak lei ah biatak tein tanlak pi cu kan timh ko hna. Sianginn zong extra class in kan hlanh hna i, anmah ca te hi kan cawnter hna. Anmah ca kan cawnter hnanak a ruang zong hi, nan ram zeitik a that lai theih a si lo. A caan a rau rih ding phung a si. Caan saupi kanmah ca an cawn a si cun anmah holh, an ram holh an philh sual lai ti kan phanpiak hna ca ah anmah ca kan cawnter hna hi a si,” tiah CCN nih 2022 August 7 bia kan halnak ah a chim.
Myanmar ram buainak ruang ah le COVID-19 zawtnak ruang ah ngakchia sianginn kai kho loin an umnak hi kum thum leeng a si cang. Kum thum leng ca he an i hlat tik ah ca hi a hram in thok than a si tiah saya/ma hna sin in kan theih.
Kyunhla Peng Komesi Khua Cu SAC Ralkap Nih An Khangh, Tualchungmi 3 Ralphaw Ah An Tlaih Hna, Sagaing ramṭhen, Kanbalu pengkomh Kyunhla peng Konesi khua cu nizan August 25 ah SAC ralkap 180 hrawng cu an lut i umhmun an khuar tiah theih a si. Cu SAC ralkap hna nih cun nihin August ni 26 zinglei suimilam 7 hrawng ah khua cu an khangh, cun tualchungmi 3 cu ralphaw ah an tlaih hna i an i kalpi hna, tiah Kanbalu peng mipi ralkap chungtel pakhat nih a chim.
Konesi khua cu inn 60 hrawng a ciam, tiah theih a si. Atu tan an khangh hi a voihnihnak a si, a voikhat an rak khangh ah inn 7 a rak ciam cang, cu lawng si loin phungki sianginn ah an chiahmi thilri hna cu an hrawh, mawtaw le cycle pawl zong an khangh, tiah tualchungmi nih cun an chim.
Mizoram Chung in Zarhkhat Chung ah Rithaisi Bing Rupees sing 169 Man Leng Tlaih a Si!: India, Mizoram ramkulh hmunkip ah tuzarh chung lawng ah rithaisi bing 3kg a ritmi, Rupees sing 169 man leng (sing 5070 mmk leng) kan tlaih, tiah rithaisi khamtu nih cathanh an chuah.
Cun, tukum 2022 January thla in August 24 tiang bing/riathaisi hmannak ruang ah pa 22 le nu 1 an nunnak a liam, tiah theih a si. A luancia 2021 kum chung ah rithaisi hman ruang ah pa 39 le nu 8, an dihlak minung 47 an nunnak a rak liam, tiah theih a si. Tuzarh chung lawng ah Mizoram chung ah rithaisi bing a phortu Myanmar mi minung 6 tlaih an tong cang.
Demoso Peng Nihnih Chung Kahdohnak Ah SAC Ralkap 5 An Thi, Hliam Tuar Zong An Tam, Karenni ramkulh, Demoso peng Ngwetaung khuathar pawng Karenni Revolution Union (KRU), Demoso-PDF le SAC kar August 24 in 25, nihnih chung kahdohnak ah SAC ralkap 5 an thi, hliamtuar zong an tam, tiah KRU nih cathanh an chuah.
August 24 kahdohnak ah SAC ralkap 5 an thi i, August ni 25 zinglei suimilam 11:15 hrawng ah kahdohnak a chuak ṭhan. SAC lei hliamtuar zong an tam, a thimi zat tu cu aa fiang rih lo, tiah KRU nih an cathanh ah cun an langhter. Nihnih chung kahdohnak ah tualchung hriamtlai phu lei hliamhma tuar um lo in hnu an tolh kho ṭhan, tiah theih a si. Kahdohnak a chuahnak pawng khua hna cu zeitik caan paoh ah kahdohnak a chuak \han khomi a si caah a himnak ah zaam dingin ralrin peknak zong an langhter chih.
Tamu ah CDM a Tuahtu Siangcachim sayamah Pakhat Amah le Mah Aa That! Sagaing ramṭhen, Tamu khuachung Zayṭan no. 10 sang ah a ummi kum 30 tluk CDM a tuahtu siangcachim sayamah pakhat cu nihin August 26, zaanlei suimilam 4:00 hrawng ah, a umnak inn ah hri-awh in a nunnak ai la, tiah theih a si.
Siangcachimtu nu cu nihin August 26 ah biaceih zung ah a pasal he ṭhennak an tuah i, inn a phanh ah atu bantuk in a nunnak ai la, tiah theih a si. “Naith-ban-lan” (နိဗ္ဗာန်လမ်း) mi bawmchantu phu hna nih sizung ah kalpi in an thlop lio ah a nunnak a liam, tiah theih a si.
Sagaing Ramṭhen, Monywa Peng Layzin Sanpiah Khuami 3 Cu SAC Ralkap Nih An Thah Hna! Sagaing ramṭhen, Monywa peng Layzin Sanpiah(လယ်ဇင်စံပြ) khua cu nihin August 26 zinglei sumilam 5:45 minute hrawng ah SAC ralkap nih luhhnawh in khuami 3 an thah hna, tiah tualchungmi hna sin in theih a si. Tuzing suimilam 5:45 minute hrawng ah SAC ralkap cu an rak lut i khuami 2 cu mei in an khangh hna, cu hnu ah U Aung Chit timi pa cu an tlaih i an hrem hnu ah nam in an sawh i an thah.
Mei in an khanghmi 2 hna tu cu an muihmai a rawh dih caah aho an si cu kan thei kho rih hna lo, tiah an chim. A luancia 2021 December thla chung zong ah ralkap pawl cu an rak lut i, Ko Ye Yar Lin, Ko Thein, Ko Htun Oo le Ko Bone hna cu an tlaih hna i an rak thah hna, tiah an chim chap.
Paletwa Ralzaam Hna Caah World Food Programme(WFP) Nih Bawmhnak Pekmi Facang Tun 2,000 Hrawng a Phan Cang! Chin ramkulh, Paletwa um ralzaam 5,000 leng ca ah World Food Programme (WFP) nih bawmhnak pekmi facang tun 2,000 hrawng cu August 25 ah Paletwa khua a phan kho cang, tiah theih a si.
A luancia August 24 tiang ah World Food Programme (WFP) nih facang tun kuatmi cu Rakhine ramkulh Kyauktaw(ကျောက်တော်) hrambunh sah-kah-khah 9 nih phorhnak nawl pek lo in an rak hren hna i, August 25 ah phorhnak nawl an pek cang hna, tiah ralzaam bawmtu hna nih an chim.
“Tilawng 2 in facang tun hna cu an phan, ralzaam dirhmun in a ummi hna cu August thla dih in phawtzamh an si lai. Paletwa ah SAC ralkap le AA kar kahdohnak nitin ngawt in a chuah caah, ralzaam cu karh lei an panh. Cucaah cu hlan ah cun minung pakhat ah facang pawng thum pek a si ah cun, tutan ah cun minung pakhat ah facang pawng hnih tluk hrawnglawng pek khawh an si lai, ralzaam cu minung 5,000 leng an si,” tiah Paletwa ralzaam bawmtu pakhat nih a chim.
World Food Programme (WFP) nih cun Paletwa ralzaam hna ca ah facang, chiti, cite, pee le vitamins ummi changreu hna cu thla tin ngawt in bawmhnak a pek tawn. Tutan ah cun facang lawng in bawmhnak an pek, tiah Paletwa ralzaam bawmtu hna sin in theih a si. Chin ramkulh Paletwa ah a luancia May 26 in SAC ralkap le Arakan Army(AA) kar kahdohnak a chuah hnu ah, SAC ralkap nih Paletwa-Kyauktaw ti lam cu thla thum leng an phihkham i ti lam cu an hon cang nain, aa chawkhlatmi tilawng a um rih lo, tiah tualchung mi nih an chim.
Japan PM Hlun Thah a Tong Mi Shinzo Abe Thlahnak Ca ah $ 1.8 Million Hman An Timh! A luancia July thla ah thah a tongmi Japan Prime Minister hlun Shinzo Abe thlahnak ca ah $ 1.8 million hman ding in biakhiahnak kan tuah, tiah Cabinet in tuanvo ngeitu Hirokazu Matsuno a chim.
Ruak thlahnak ah aa tel dingmi hna hi minung 6000 reng lo an si i hi caan ah a telmi minung hna zohchun in thutdirnak, umtonak le humhimnak cu a herh ning in kan tawlrel hna lai tiah, Hirokazu Matsuno nih cun a chim chap. Abe thlahnak ca hman ding tangka cu 2022 i hman dingmi phaisa chung in an hman lai.
Shinzo Abe cu a luancia July 8 ah inn ser meithal in mi pakhat nih a rak thah. Shinzo Abe thihnak kong he pehtlai in Japan Palik bawizik zong nih palik nih kan rian ka tlamtlinh lo ca ah a si tiin rianchuah aa timhnak kong a chim ve.
Videozohnak-
Leave a Reply