Ruahnak palhsual bu in ralhrang dirpi hrim hlah usih!
Photo-A Dang
Kan hnulei zeimawzat a liamcia mi thla ah Total Chevron Company pawl Myanmar ram in kan chuak cang lai, tiah cathanh an rak chuah mi kha kan ciin cio rih lai ka zumh. Hihi a ngaite cu ramchung ramleng in mifimthiam hna thawng in le rammi mizapi kanmah thawng in a si. Hi hna pawl hi ralkap thalo hna he kum tampi rian a tuanti mi an si hna. Atu bantuk in Myanmar ram in kan chuak cang lai, tiah an thanh tik ah khuaruahhar lunglawmhnak ni a tlang, ti tluk khi a si. Atu ka cabia hin mizapi nih fiangraang tein kan hngalh khawh nakhnga ka vun tial ko lai.
Thisen he kan kilhkamh mi tangka ti mi khi a taktak cu ralkap thalo hna sin ah tangka fangkhat hmanh lut hlah seh, tinak khi a si. Ral kan ti mi cu tangka a um lo ahcun zeitihmanh in doh khawh a si lo. Cucaah, Kawl ralkap thalo sin ah a luut mi tangka dihlak cu rammi mizapi thahnak hriamnaam lila ah an cang than lai. Cucaah, ramchung chawhrawlnak company hna nih ralkap thalo uknak an doh bantuk in ramleng in tangka luhnak a si mi zinaan le gas tehna company (MOGE) zong kan kham khawh ding hi a biapi taktak mi a si.
Atu hi rammi mizapi kan i zuamnak le tanrualnak thawng in cu bantuk company pawl cu Myanmar ram in an chuak cang. European Union (EU) zong nih MOGE cu dan a that i phihkharnak a tuah cang. Nain, atu hi kan nawr than ding mi asiloah kan thawl than ding mi company 3 a taang rih.
Company pawl an chuak cang, kan ti nain cu hna pawl nih ralkap thalo pawl kha tanga dollar 250 million an bat rih hna. A ngaite ti ahcun cu tangka zong cu ralkap thalo hna ta a si lo. Myanmar rammi kan dihlak ta a si. Kanmah ngeih mi a si. Cucaah, hi tangka hi ralkap thalo hna kutcung phan kho lo ding in Freeze a si khawh nakhnga kan i zuam a herh fawn. Tangka umtuning in vun fianter ahcun, kan hnulei ah khan Ei Pencilo le C2D i bawm in Dragon Fly Project in tangka an kawl i an hmuh mi kha nuai 2.2 (million) a si. Ralkap nih an hmuh ding mi nuai 250 (million) he tuakchun tik ah alet zakhat leng in a tam tinak a si i cucu ralkap thalo hna kutcung a phanh khawh lo nakding kan i zuam a herh.
EU nih an ngeih mi phungphai ning ah Sanction an chiahpiak hna nain anmah he aa pehtlai mi ram pawl sin in luat khawhnak nawl phun 2 halnak nawl an ngei. Cu hna ram pawl nih an cohlan ahcun pehtlai in tawlrel khawh a si. Atu tiang hi US Cozah nih phihkharnak taktak a tuah rih lo. A tawinak in kan chim a si ahcun mah hi company pawl nih hin ralkap thalo pawl tangka an pek ding mi hna kha pe kholo ding in kham, French Cozah zong nih hi company pawl hi zohsawh lo ding le US Cozah zong nih MOGE hi dantat in phihkharnak tuah ding tiin hi thil phun 3 hi hal than hrimhrim a herh mi a si.
Hi kong ah ahodah tuanvo a ngei, tiah cun Myanmar rammi kan dihlak hi tuanvo ngeitu kan si. Cun, NUG Cozah hi an biapi taktak fawn. Cun, ramchung ramleng Media pawl le rammi kan dihlak hi kan bipi tuk hringhran. Chim ko ahcun, ralkap thalo he a tuanti mi companies hna hi Myanmar ram in an chuak te lai, tiah zeitik hmanh ah kan mang kan manh bal lo. Cucaah, hihi rammi nih kan tei hna, tinak a langhnak pakhat a si. Asinain, a thlithup riantuannak timi mizapi hngalhlokar in tangka pek ziar i riantuanti tibantuk a um khawh caah hihi mizapi nih kan hgnalh a herh i kan i ralrin zong a herh mi a si.
Ralkap thalo nih atulio dohthlennak rian a tuantu hna bawmhnak a petu hna pohpoh cu an tlaih hna ti cu zapi hngalh a si ko. Tangka a um lawng ah hriamnaam ti mi cu a um cu mu. Cucaah, rammi nih ralkap thalo he aa pehtlai mi tangka luhnak asiloah chawhrawlnak pohpoh kha kan hrial hrimhrim a herh. Lih le hrokhrol in aa thawk ralkap thalo hna hi an thazaang a thawn nakding rian pawl kha kan ngol a herh. Kan hrial a herh. Cucu, a cunglei kan chim mi tangka ruang ah a si bik. Cucaah, rammi kan dihlak kan lungfim a herh i kan i ralrin a herh. Crd- The Independent Post
Thawngdang, Sagaing ramthen, Tamu khuapi, Pengkomh Mipi Sizuung chungah zinglei suimilam 7:00 hrawngah meikanghnak a chuak tiah Tamu myoma sangah a um mi mipi pawl sinin theih a si.
” Siizung pawngkam chungah siizung innpii pakhat a kang, Zinglei suimilam 8:00 hrawngah mei cu an hmih than khawh. Mei khangnak a hrawm thawk nak a ruang bik cu Electric Tower a shock ruangah a si lai” tiah Tamu pengkulh mithat zungin tuanvo ngeitu pakhat nih a chim.
Mei kang ruangah sunghmi thilri pawl cu kan hlethlai cuah mah lio a si ti zongin a chim. Tamu khuapi cu India-Myanmar ram, ramri ah a um mi a si i a tu le tu in kahthoh nak a chuak peng lengmang i, mi umnak inn le zuung sermi inn pawl zong a kang lemngmang tiah Tamu phua mi nih an chim.
Leave a Reply