Ronaldo; Ka Hmai Lei Bia Dik Cu A Phuan Cang Lai!

Ronaldo; Kan Hmai Lei Kong He Pehtlaiin Bia Dik Cu A Rauh Hlanah Ka Phuan Cang Lai
===================
A tu thal chungah hlennak tampi he chimrel le ceihphai a ton hnu ah Man-U hmaikal Ronaldo nih ka hmai lei kong he pehtlaiin arauh hlan ah bia dik ka phuan cang lai tiah a chim. Portugal hmaikal Ronaldo nih Old Trafford in chuah ka duh tiah a chim ko nain Coach Erik Ten Hag nih ‘A nih cu zuar ding ah chiahmi bawlung celhthiam a si lo” tiah a chim.

A sinain a tu ah ManU in Ronaldo cu September ni 1, thlen man phih a si hlanah a chuak kho tiah theih a si. Tonbiaruah bia halknak an tuah tikah a ra laimi caan tlawmpal chungah bia dik cu nan theih te ko lai tiin a Social Media ah a tial tiah theih a si. Atletico coach Diego Simeone nih auh dingin aa ruahchanh timi a fan pakhat nih comment a peek mi cungah Ronaldo nih a duhnak kong a langhter tiah theih a si.

A sinian mah langhter mi cu lehnak comment pek a si tikah Ronaldo nih media pawl a hlen hna tiin an tial tiah theih a si. A luancia mi thla ah khan stories 100 leng hrawng cu notes ah kaa chinchiah ko nain pa 5 lawng a dik mi aa tel tiah Ronaldo nih a chim. A luncia mi kum 1 ah Juventus in aa thial hnu, Man U le Ronaldo minthutnak an ngeih mi cu kum 1 chung a tang rih tiah kan theih.

Ronaldo a rak kir than ko nain Manchester United cu Premier League ah no-6 ah a dir kho kho nain Champions League luhkhawhnak nawl an ngei lo tiah kan theih. Mah Season aa thawk kaa ah puai-2 ning in an sungh ruangah mark peeknak cazin ah Man U cu a tangbik ah a um tiah theih a si.

Ronaldo he Man U ah bawlung aa celhti tonmi hlun Gary Neville nih Rolnaldo nih bia dik a phuan lai ding cu kan hngak cio ko tiah a chim ve. A luancia mi season bawlung zuamcawknak ah goals-24 a goals mi Ronaldo cu Man U Goals tambik a ngeimi pakhat a si ve ko nain Thailand le Australia kal lio ah cun aa tel kho lo tiah theih a si.

Relchap, Ms. Noeleen Heyzer Kawlram Tlawnnak Hi Paucan Dohthlennak Damnak Asimaw?, Paucan Dohthlennak ah hin Ramkhel kalpi ning phu thum in kan um. UN, UNCHR, American, EU, ASEAN phu: Ralhrang MAH phu le GZ phu (NUG / EAOs / PDF / CDF/CNDF/LDF). GZ hmuitinh cu 2008 thih cang seh: Anaasin vialte cihmih: Self Determination le equity (Equality) a um bak mi le Amaakhan mi (8 pine / pine ah nawlvo aum bakmi) Federal Ramkomh dirh.

GZ chunmang, vision, mission lamkhamtu cu MAH le Ralhrang Rallokap an si caah an cihmih awk kandoh cuahmah mi hna cu asi. Ralhrang Rallokap kan thluk in cihmih hnu ah civil Anasin hna an um rih ahcun: an cihmih an si ve lai, ti hi GZ I strategic planning a si.
Min Aung Hlaing te Policy cu: 2023 thimhnak tuah, Tamada Min Aung Hlaing si: Amah MAH Tamada asi khawh lo hnu ah a techin fapar le Rallokap minung hna nih kawlram hi SPH bang in zungzal uk ti kha a saduhthah asi.

Cucaah an ngeih mi hriamnam le phaisa vialte hmang in mipi cu an kan doh, an kan thah cuahmah mi hi asi. EAOs he Peace ati, ASEAN he a ti, UN le UNCHR he a ti, Tuluk he a ti, tbk in aho he an I tawn poah ah an chunmang si khawh ding tu in aa zuam mi MAH le Rallokap an si. UN, UNCHR, EU, UK, Nitlakram hna tbk kan ti zong ah American Policy ah hin aa fu dih ko. American nih Kawlram siseh ti a duh mi cu:

Democracy ah kir ṭhan ding, Nuhrin covo amakhan bak ding: Cuti asi khawh awk ah, tlaih mi vialte luat ter ding: ralhrang rian ngawl bak ding: Pi Suu Ci le MAH tawn ter ding: Amah bia an I ruah hnu ah: Aa tel ding mi vialte I tel dih in, tawn nak le biaruahnak tuah ding: Adih ding mi phaisa kan bawmh hna lai. Amah pumpak in a zuam Bantukin ASEAN in aa zuam mi American asi.

NLD kha uknak pek ṭhan uh a ti lem lo caah, 2023 thimhnak tuah khawh awk ah thazang pek Bantukin asi. GZ muko le authawng he biktaling an si. Ms. Noeleen Heyzer nih achimh mi cu: Ralhrang sinak ngawl, mipi kha Vanlawng in kah ti hna hlah uh; Hriamngan in mipi kah ti hlah uh: Mi sifah bawmhnak kha zalon tein tuahnak pek uh: Pi Suu Ci he online in ka tawn ter uh: Pi Suu Ci le MAH I tawn uh: Aa tel ding mi vialte he tawn biaruahnak ngeih uh. Mipi sin ah uknak pek uh law, Democracy ah kal uh ti hi a tlangpi in asi.

Raldohnak ngawl uh timi aa tel lo. GZ authawng he aa dang. American he aw khat an si. MAH nih ati ve mi cu: EAOs phu 10 he tawnnak kan ngeih cang. A rauh hlan ah senthuhnak kan ngei lai. Tlangcung mi cu 2008 phunghrampi ning in Federal kan pek cang hna ati. Mah tein khuakhan Lairelnak full asi mi federal asi lo. 2008 phunghrampi ning in pek ding mi, Kawlte le Rallokap nih chakhri tlaih mi le duh poah in merh sam khawh mi Federal asi.

2023 thimhnak tuah khawh lo ding in dohtu vialte cu Vanlawng in ka kah dih hna lai, an cihmih dih an si lai, Pu Ngun San Aung zong Matupi CDF kha Vanlawng in kah ding ah nawl a pek cang. Cucaah tutan Ms. Noeleen Heyzer, UN GS Palai le UN Mahaminci Kusale nih kawlram a ratnak hi Thanhca chuah men ah adih ko lai. Mipi thahnak caah hriamnam zuar ti lo ding le Sipuazi phihkarh dih hmanh kha an tuah khawh lo caah, MAH ṭhathnem nak caa tu ah asi deuh lemlam.

MAH le Zaw Me Lung nih, UN le Vawleipi nih cozah ah an kan cohlan cang tiah an thanh colh. Ms. Noeleen Heyzer nih asilo an lih a ti ve. Kawlram in a tlung hlan ah bia raldohnak a um cang. 2023 thimhnak tuah khawh lo ding in a hnursuan tu, Sakai, Makui le CHINLAND vialte cu 2023 thimhnak hlan ah cihmih ding tiah MAH nih RFA in an thanh cang. Kan ngeih mi thazang vialte hmang in kan namh cang hna lai ati.

Vawleipi dindaihnak phu asi mi UN Palai rat lio thengmang ah 2023 thimhnak tuah khawh awk ah Cihmih raldohnak a herh ti rilmal cu a va mak ve. Cucaah Tutan UN Palai nu Ms. Noeleen Kawlram arat cu kan caah Thawngṭha le dindaihnak he asimen lai tiah kan I ruahchan lio ah: CHINLAND ah Harmegadon ral asi nak tu le, rang chak tiang thisen luan awk tu ah Ralhrang nih Vawleipi hngalh in an thanh ni tu asi diam ai.

Uktu ah amah tein aa thimh mi Sachiat Ngun San Aung zong Thantlang remhnak caah 10 billion a va lak I, amah caah fir awk ah aa timh hoi ai. Zeitintiah, Thantlang remhnak caah an hmang lo lailo kha ka hngalh. Rallokap bawi rual le amah Ngun San Aung rumnak caah asi lai ti cu 101% a fiang mi asi. Afir hlan ah vaivuan ah a ṭha men lai.

Tlangcung mi caah cun, Pu Vom ṭih ah kan zam I cakei he kan I tawn, kan zam ṭhan I, tisatlam he kan I tawn, kan I merh I a sirh lei seh, ka zam kan ti lio ah, lim le rul siivai chia lawng te an si bantuk kha si. Gideon le Pathian caah tiah Israel minih ral an doh Bantukin, Pathian le CHINLAND Caah tiah CNA / CNDF / CDF he; Ralhrang kip le Anassin vialte (Chuavinism – Maha Lumiuci Vuadah vailte) kan thluk hna hlan lo Raldoh kha Pathian fialmi asi tiah Pathian nih ka thlacam a ka leh nak cu asi. Federal caa lawng ah asi lo. KRI le Krifabu caah Raldoh asi.

Yinambin Peng Paing khua le Theekone khua cu SAC Ralkap Nih An Khangh, Sagaing ramṭhen, Yinmabin peng, Paing khua le Theekone khua cu SAC ralkap nih nihin August 18 zaanlei suimilam 6 hrawng ah an rak lut i an khangh, tiah tualchungmi nih an chim.
Khuachung an luh hlan ah hriamngan in an kah hmasa i, kahdohnak zong a um lo, khua dang mi 30 hrawng cu ralphaw ah an i ratpi hna, tiah a chim chap. Paing khua le Theekone khua cu a tlaimi a si i kan khuahnih ning in kan zaam dih, atu zong an khangh cuahmah ko, tiah khuami hna nih an chim.

Pathein Vanlawng Tual In SAC Ralbawi Pakhat Le Ralkap 3 An Zaam! Ayeyarwaddy ramṭhen khualipi, Pathein khuapi SAC vanlawng ṭumtual in ralbawi pakhat le ralkap 3 cu an zaam, tiah SAC ralkap he naihniam mi pakhat nih a chim. Pathein vanlawng ṭumtual in a zaam mi ralbawi pakhat le ralkap 3 hna cu Naypyidaw vanlawng ṭumtual ah an kawl len hna nain an hmu rih hna lo, tiah a chim chap.

A zaam mi ralkap hna nih an ID card an chiahta ruang ah khua luhchuahnak kip ah SAC ralkap nih ID card an check, tiah theih a si. Cu lawng siloin Einmay khua um mi khah-lah-yah 63 in ralkap cheukhat zong an zaam caah a pawngkam khua luhchuahnak le mibu an um deuhnak kip cu ID card an check hna, tiah theih a si. Ayeyarwaddy ramṭhen Pathein khua nitlak thlanglei um SAC ralkap pawl ID card cu cunglei nih an fimpiak dih hna, tiah SAC ralkap hna an chungle sin in theih a si.

Kalay Peng Ah Pa Pakhat SAC Bomb Puahnak In Hliam A Tuar! Kalay peng, Meng 56 khua pawng ah nihin August ni 18 ah SAC nih an rak hmanhmi bomb cu tualchungmi pakhat nih a pal sual caah a puak i, hliam fak ngai a tuar, tiah theih a si. Tuzing sumilam 8 hrawng ahkhan kum 50 tluk a simi pa pakhat cu tuai a hrawnnak ah SAC bomb nih a puahhnawh caah fak ngai in aa hliam, tiah khuami pakhat nih a chim. SAC ralkap pawl cu Kalay peng chaklei Yazagyo khua pawng hrawng ah August 4 thawk in rallam an sial i, mipi ngeihmi thilri hna cu an i lak i innlo pawl zong an khangh hna, tiah theih a si.

Ram Pumpi In Thla Sarih Chung Ah Motor Khawndennak Voi 3500 Leng A Cang I, Minung 1700 Leng Nunnak A Liam! Myanmar ram pumpi, ramkulh le ramṭhen hmunkip ah 2022, January thla in July thla tiang ah motor khawndennak (accident) voi 3533 a cangsual i, aa khawng mi minung 4801 an um, khawndennak (accident) ruang ah nunnak a liam mi minung 1730 an phan, tiah Myanmar traffic police pakhat nih a chim.

“Motor khawndennak voi 3533 chung ah Yangon ramṭhen in voi 577 a cangsual i, motor khawndennak a tambiknak hmun a si. A changtu ah Ayeyarwady ramṭhen in a si i, khawndennak voi 479 a cang. Kum hmasa nak in tukum ah voi 300 hrawng in motor khawndennak hi a tlawm deuh. Aa khawng mi le a thimi zong kum dang nak in an tlawm deuh. Motor khawndennak hi Chin ramkulh le Kaya ramkulh ah tlawmbik a cang,” tiah min langhter duh lo mi traffic police pakhat nih a chim.

A luancia 2021, January thla in August thla tiang ah ram pumpi; ramkulh le ramṭhen hmunkip ah motor khawndennak voi 4158 a um i, aa khawngmi minung 5460 an um. Cu chung ah minung 2075 nunnak a liam. 2021, thla sarih chung motor khawndennak ah Yangon ramṭhen chung ah voi 557 a cang i, Bago ramṭhen chung in voi 532 a cang, tiah theih a si.

Motor khawndennak a chuahnak a ruang bik hna cu; rang tuk i motor khalh ruangah, motor khalh pah ngut ruang ah, lam tan tik i ralrin lo ruang ah, motor khalh tik i ralrinlo ruang ah, motor kee kuai ruang ah le seh ṭhat lo ruang ah tibantuk hna an si, tiah traffic police rian in aa din cang mi pakhat nih a chim.

Yesagyo Peng, Ngatayaw Khua Inn 400 Leng Cu SAC Ralkap Nih An Khanghpiak Hna! Magway ramṭhen, Yesagyo peng inn 500 hrawng umnak Ngatayaw(ငတရော်) khua cu SAC ralkap le pyusawhti nih August 17 zinglei suimilam 10:30 in, August 18 zinglei tiang an khangh caah inn 400 leng a kaang, tiah tualchung mi nih an chim. August 17 ah chun ni tlak tluk an khangh hnu ah, a taangmi inn cu August 18 zinglei ah an khangh ṭhan, tiah Ngatayaw(ငတရော်) khuami pakhat nih a chim.

“August 17 zaan suimilam 10:00 hrawng ah ruah fak ngai in a sur caah mei a thi nain, August 18 zinglei in an khangh ṭhan. Meithal zong voi tam ngai an thlah caah naih tein kan zoh ngam lo. Khuami hna cu SAC ralkap khuachung an luh ni August 17 ahkhan hmundang ah an zaam dih cang,” tiah a chim. Ngatayaw(ငတရော်) khua cu, cuhlan zong ah SAC ralkap nih voi 5 tiang hrawng an rak luhhnawh cang. A luancia August 10 zong ahkhan khuachung cycle 14 cu an rak kan khanghpiak cang, tiah tualchung mi nih an chim.

Khuachung inn cheukhat ah cun facang pung 300 hrawng aa chiahmi zong an um i, mei nih a kanghpiak dih hna. Nizaan August 17, SAC ralkap khuachung an luh lio ah, zaam kho lo in khuachung i a ummi tar nu, tar pa le ngandamlo mi hna an nun humhimnak caah kan thin a phang ngai, tiah an chim chap.

August 17, zinglei suimilam 9:00 hrawng in Ngatayaw(ငတရော်) khua pawng ah minutes 15 tluk hrawng kahdohnak a chuah hnu ah SAC ralkap hna cu khuachung ah lut in, innlo cu an khangh. Cu ralkap hna cu August 18 zaanlei tiang Ngatayaw(ငတရော်) khua ah an um rih, tiah an chim. A luancia ni tlawmpal zong ah khan SAC ralkap nih inn 400 leng umnak Hlaekhot(လှေခုတ်) khua cu an khangh caah inn 200 leng a ciam, tiah tualchung mi nih an chim.

Taze Peng Ni Thum Chung Kahdohnak Ah SAC Ralkap 15 Hrawng An Thi, Sagaing ramṭhen, Taze peng ah rallam a sialtu SAC ralkap le tualchung hriamtlai phufonh kar ni thum chung kahdohnak ah SAC ralkap 15 hrawng an thi, tiah Taze PDF nih an thanh. Meiktila(မိတ်ထီလာ) ṭat-mah 99, khah-mah-yiah 113 in SAC ralkap 200 hrawng cu Ye-U khualei ah rallam an sial caah, rallam sialtu SAC ralkap le tualchung hriamtlai phufonh kar ah August 15 in 17 tiang kahdohnak a chuak.

Cu kahdohnak ah cun Taze PDF battalion 6, battalion 7 in Dragon Worrier ṭat-khuai le Phoenix Taze ṭat-khuai, battalion 8, Taze Tiger, SAF Mandalay battalion le Taze pah-kah-phah phufonh nih an kahdoh hna. Tualchung hriamtlai phufonh lei in minung pakhat hliamhma a tuar, tiah theih a si.

August 17 zinglei suimilam 10:00 hrawng ah SAC ralkap nih Kanpauk(ကန်ပေါက်) khua inn 7 an khanghpiak hna hnu ah chunhnu suimilam 12:00 luan ah Kotaungbo(ကိုးတောင်ဘို့) khua inn 13 an khanghpiak hna, tiah theih a si.

Mawlamyine Ah Misual Pahnih Nih Inn Pakhat Luhhnawh In Nu Pakhat An Thah! Nihin, August 18 zinglei ah Mon ramkulh, Mawlamyine khuapi, Aungtukhah(အောင်သုခ) sang i inn pakhat cu misual nih an luhhnawh i nu pakhat an thah, tiah theih a si. Aho si theih lo mi pa pahnih cu an hmai i hup in, cu inn hnu lei kutka ah cun an i thup i, nu pakhat nih kutka a hon lecangka in innchung ah an lut.

kum 44 tluk nu pakhat cu a hngawng ah namte hmuahchih in an thah, tiah theih a si. Cu hnu ah innchung ah lut in, inn ngeitu nu pakhat cu nam in an hmuah ṭhan i, a sui ṭhi, tumbul le banhrolh pawl cu an chuh, tiah theih a si.

“Thah a tongmi nu cu inn ngeitu siloin inn rian bawmtu ding ah umpitu chungkhat, khuate lei mi a si. Inn ngeitu cu nam in an hmuah i, a sui thilri cu an chuh,” tiah Mawlamyine um mi bawmchantu phu chungtel pakhat nih a chim.

Cu thil a can cu nihin zinglei suimilam 5:30 hrawng ah a si i, luhhnawh a tongmi inn ah cun rianbawmtu nu telh in minung 4 khua an sa. Thah a tongmi nu cu Mawlamyine sizungpi ah an kalpi, tiah theih a si.

Karenni Ramkulh, Hpruso Peng kahdohnak Ah SAC Ralkap 4 An Thi! Karenni ramkulh, Hparuso peng Sulyiako(ဆိုလျားကူး) khua pawng umhmun khuarmi SAC ralkap hna cu Central Special Operations, KNDF le Loikaw PDF phufonh nih August 14 le August 16 ah an kahdoh hna. Cu kahdohnak ah cun SAC ralkap 4 an thi, tiah theih a si.

August 14 kahdohnak ah SAC ralkap pakhat a thi i, August 16 kahdohnak ah SAC ralkap 3 an thi, tiah Central Special Operations phu nih cathanh an chuah. Nawlngeihnak latu SAC ralkap hna cu an hram cah tiang ṭangrual phufonh nih kan doh hna lai, tiah Central Special Operation nih an thanh.

Yuangan Peng Ah Minung 3 Cu SAC Ralkap Nih An Khangh Hna!: Shan ram thlanglei, Danu Self-administerd Zone hmunram chung Yuangan(ရွာငံ) peng Taeluh(တဲလု) khua le Taung U(တောင်ဦး) khua kar ah August 17 ah miruak 3 mei in khangh mi cu kan hmuh, tiah tualchung mi nih an chim.

Miruak an hmuhnak hmunhma cu August 16, ah SAC ralkap nih an rak cawlcanghnak hmunhma a si i, khuami cheukhat zong bia an hal hna, tiah Taeluh(တဲလု) khuami pakhat nih a chim. “Cu ka hmun ah cun August 17 ah meithal thawng theih a si, zinglei i SAC ralkap an kal hnu ah minung ruak mei in khangh mi cu hmuh a si. An tai cung an khangh dih hna caah mizei an si theih a si rih lo,” tiah a chim.

Gangaw Peng Ah Sianginn Cachimtu Dalan Sayamah Pahnih Cu CDF-KKG Nih An Thah Hna!, Magway ramṭhen, Gangaw peng Min khua sianginn cachimtu dalan sayamah pahnih cu, CDF-KKG Battlion-5 Gangaw Region nih kan thah hna, tiah nihin August 18 ah cathanh an chuah. Sianginn cachimtu nu pakhat cu siangniamrun chimtu Myint Myint San le tuition sayamah Ya Min Aye an si, tiah theih a si.

“Kan lung cu a ṭha hrimhrim lo. Pakhat hi ca a rak kan chim balmi a si. Dalan a si i, fimhlawm lo awk a ṭhat lo caah kan fimhlawmnak a si,” tiah CDF- KKG chungtel pakhat nih a chim. Cachimtu pahnih nih kan cawlcangh ning vialte cu SAC ralkap an chimh lengmang hna caah kan thah hna hi a si, tiah a chim chap. “Message in kan kuat tawn ko hna, phone zong in kan chawnh lengmang ko hna. Pumpak zong in atu le atu kan va ton ko hna. Sihmanhsehlaw an ngai duh lo, an thah mi hna tu cu fiang tein kan thei lo,” tiah tualchung mi pakhat nih a chim.

Gangaw peng nichuahlei ah dalan an si, tiah an timi hna zung rianṭuantu hi an tampi rih. An min le an umnak dik thliar tein kan hngal kho rih hna lo, tiah a chim chap. SAC nih uknak an laak hnu in dalan tiah ruahmi an thahmi hna le SAC ralkap nih a ruang um loin an thahmi hna fonh ah a thong leng an si cang.

Rohingya Pawl Cu Myanmar Ram Ah An Kir Ṭhan A Hau, Tiah Bangladesh PM Nih UN Palai A Chimh! Myanmar ralkap tuahsernak ruangah Bangladeah ah a zaam mi Rohingya pawl cu Bangladesh Prime Minister Sheikh Hasina nih Myanmar ram ah an kir ṭhan a hau, tiah UN nuhrin covo Commissioner Michelle Bachelet a chimh. Michelle Bachelet cu a luancia August 14 ah khan Bangladesh a phan i, Myanmar ramri Rohingya pawl umnak zong a va phan, tiah theih a si.

Rohingya ralzam hna cu Myanmar rammi an si i, an umnak hmun ah kan kuat ṭhan hna lai, tiah Bangladesh Prime Minister Sheikh Hasina nih cun a chim. Myanmar ralkap pawl nih hmunhma thianhhlimnak an rak tuah kum 2017 lio ah Rohingya minung 700,000 leng cu ramri an tan i, Bangladesh ram ah an rak zaam. Atu lio dirhmun ah cun Rohingya hna hi an umnak hmunram ah kuat ṭhan ding cun a si kho rih lo, tiah Michelle Bachelet nih thawnglatu pawl cu a chimh hna.

August thla hram thawk ah Tuluk ramleng palai Bangladesh a tlawn lio ah, Bangladesh nih Rohingya hna cu an umnak hmun i an kir khawh ṭhan nakhnga Tuluk cu bawmh a rak hal, tiah theih a si.

Matayar Peng Ah PDF Nih SAC Ralkap Motor Cu Bomb An Puahhnawh Hna I, Ralkap 6 An Thi! Mandalay ramṭhen, Matayar peng ah SAC ralkap motor cu, nizan August 17 zanlei sml 4:25 hrawng ah PDF nih bomb an puahhnawh hna, tiah theih a si. Motor 8 in a ra mi SAC ralkap 200 leng cu Matayar peng Nguangngoh le Kyaukselay khua kar ah bomb lung 5 in kan puahhnawh hna, tiah Natsu PDF in ṭuanvo ngeitu Bo Nat Su nih a chim.

“Motor 8 in an ra i, Nguangngoh le Kyaukselay khua lei an kal lio ah bomb lung 5 in kan puahhnawh hna. Motor pakhat cu khalh awk ṭha ti loin a rawk dih,” tiah a chim chap. SAC ralkap pawl cu Sagaing ah umhmun khuarmi Ta Ma Kha 33 an si lai, tiah an zumh. Cu kahdohnak a dih in SAC ralkap pawl cu Kyaukselay khua ah an riak i, a thimi ruak cu an vui hna. Hliamtuarmi ralkap pawl zong an thlopbul hna, tiah theih a si.

A luancia August 17 zing sml 8:05 ah hmunhma thianhhlimnak tuah ding in a kalmi SAC ralkap 30 leng cu, Matayar peng Taungkan le Muang-U khua karah Natsu PDF nih bomb lung 4 in an rak puahhnawh hna caah ralkap 4 an rak thi.

Pale Khua Chung In A Chuak Kho Lo Mi CDM Ralkap 2 Cu PDF Nih An Chanhchuah Khawh Hna, Sagaing ramṭhen, Pale khuachung in a chuak kho lomi CDM ralkap 2 cu nizan August 17 zan sml 8:00 in 9:00 karah PDF nih an va chanh khawh hna, tiah theih a si. Kan va chanh hna lio ah cun SAC ralkap he kan i kap. CDM ralkap 2 cu lam dang in kan kalpi hna i a himnak hmun ah kan va chiah hna, tiah Southern YSO PDF Bo Aye Thaung nih a chim.

“CDM tuah kan duh, tiah ralkap 2 nih an rak kan chawnh caah PDF phu hnih nih kan chanhchuah hna. Atu cu a himnak hmun ah an um cang,” tiah a chim chap. CDM ralkap 2 cu Southern YSO PDF, Pale Battalion 4 hna i bawm in an va chanhchuah hna, tiah theih a si. August 16 lio zong ah Pale khua chung Administrative zung ah umhmun a khuarmi ralkap pawl cu Southern YSO PDF nih hriamngan in an rak kah hna caah ralkap 1 a thi i, 4 sii-inn an rak phan.

PDF An Bawmh Hna Caah KIA Hriamnam Seh Zung Bomb Thlak Ding In Bullet Hla Shwe Nih SAC A Forh: Nizan August 17, Naypyidaw ah thawngfianternak tuah lio ah, USDP Party chungtel le MP hlun Bullet Hla Shwe nih atu bantukin KIA hriamnam seh zung cu bomb thlak ding in ralkap cu a forh hna. KIO nih SAC ralkap a dohtu PDF cu hriamnam a pek hna caah KIA seh zung cu bomb thlak ding in timhtuahnak nan ngei maw, tiah Bullet Hla Shwe nih SAC sinah halnak a tuah.

Bullet Hla Shwe biahalnak cu SAC ralkap chimphuannak nawlngeitu Zaw Min Htun nih a let lo nain, KIA nih PDF cu hriamnam an bawmh hna caah KIA cu tapung an si, tiah Zaw Min Htun nih a chim. “Tapung cu tapung in kan hmuh peng cang hna lai. Ralhrang bawmtu KIA cu tapung an si,” tiah Zaw Min Htun nih cun a chim.

Demoso Peng Kahdohnak Ah SAC Ralkap 6 Hrawng An Thi, Karenni ramkulh, Demoso peng, Konethar khua ah nizan August 17 zanlei ah SAC ralkap le Karenni Revolution Union(KRU) kahdohnak a chuak i, SAC ralkap 6 hrawng an thi, tiah KRU nih cathanh an chuah. Nizan August 4 zanlei aml 6:30 tiang sml 2 chung, hriamngan he hriamhme he kaphnih kar kahdohnak a chuak. KRU lei in ralkap 1 hliamhma a pu ko nain thinphan awk a um lo, tiah theih a si. SAC ralkap nih inn pakhat an khangh caah a ciam dih. Hriamngan in an kan kah tuk caah hnu kan kir ṭhan, tiah KRU nih cathanh an chuah.

Monywa-Chaung-U Lam Ah Pyusawhti Bomb Puahhnawh An Ton Caah 4 An Thi: Sagaing ramṭhen, Monywa- Chaung-U lampi ah SAC ralkap kuttang Pyusawhti cu, nizan August 17 zing sml 6:00 hrawng ah PDF nih bomb an puahhnawh hna caah ralkap 4 an thi i, 2 hliamhma an pu, tiah theih a si. Pyusawhti pawl nih Chaung-U peng Tawpu khua in Monywa- Mandalay lampi ah khual a tlawngmi hna cu tangka an hal hna caah PDF nih bomb an puahhnawh hna, tiah theih a si.

Cu kahdohnak ah cun PDF-South Monywa, Monywa Ranger Group – Truth Army, Black Hunter People’s Task Force le Anyar Defence Force hna i bawm in an kah hna. Kanmah lei in a thimi le hliamtuarmi kan um lo, tiah PDF – South Monywa nih cathanh an chuah.

KNU Brigade 5 Hmunram Kahdohnak Ah SAC Ralkap Le BGF 43 An Thi: KNU Brigade 5 hmunram, Mutaw pengkomh August 1 in 15 tiang SAC ralkap, BGF le KNLA kar kahdohnak a chuak. August 1 in 15 tiang ah Kahdohnak voi 53 a chuak i, SAC ralkap le BGF 43 an thi, 17 hliamhma an pu. Kanmah lei in KNLA ralkap 1 a nunnak a liam ve, tiah KNU nih cathanh an chuah. SAC ralkap le BGF nih khuate lei hoih in hriamngan an kah pin ah lei rianṭuannak hmun zong ah timh ciammam tein hriamngan tam ngai an kah caah tualchung mi 2 hliamhma an pu, tiah an langhter.

Sagaing ramṭhen, Taze peng zong ah kahdohnak voi thum a chuak i, SAC ralkap a thimi le aa hliammi an tam, tiah theih a si. Kanpauk le Kutaung khua a khaangtu Tatma 99 kuttang Kha Ma Ya 113 ralkap hna cu, Taze PDF nih voi thum tiang an kah hna i, SAC ralkap pawl cu a thimi le aa hliammi an tam caah Kanpauk le Kutaung khua pahnih fonh ah inn 20 an khangh. Cycle zong tam ngai an khangh hna, tiah tualchung mi hna sinin theih a si.