Revolution Timi Cu Thinlung In A Tho

Revolution timi hi Kawl nih “Tawhlaingzi” an ti i Laiholh in “Dohthlenak” tiin leh awk a tha hnga maw? Hihi cu holh lei thiam deuh mi nih vun tuak cio te u! Mirang holh REVOLUTION ti hi hmang ko usih, tutan ah cun….!

Revolution hi khoika in dah aa thok ti ahcun lungthin in tiah leh ding a si. Uknak thalo, uktu chiahru hna nih diklo le hmaanlo tukin ram an uk, an hruai tikah mipi nih lungfahnak an ngei. Cu lungfahnak nih uknak, uktu thalo le diklo dohdalnak a chuahter.

Ralhrang kut in a nunnak a liammi biazai phanthiam Khet Thi nih a hmun dingmi bia pakhat a chimta.

“An lu ah an kah hna, a ruang cu revolution timi hi thinlung ah a um ti an thei lo”.

Ralhrang nih lam a zawhmi hna an lu ah an kah lengmang mi hna he pehtlai in U Khet Thi nih a chimmi a si.

Revolution timi cu thinlung in a tho i thinlung ah a um. Cucaah mipi thinlung ah fek tein hram a thla/bunh cangmi revolution cu tei khawh a si lo.

Kum 2021 Spring Revolution cu Myanmar rammi diblak thinlung ah a tho i fek tein hram a bunh cangmi a si caah MAH nih a tei lai lo.

Ralhrang bu nih NLD hrawh an timh. MAH nih thimnak a tuah te dingmi ah i tel kho ti hlah seh ti an duh. Ralhrang rual nih vawlei dongh tiang Myanmar ram le mipi uk an kan duh.

Asinain an duh bangin a si kho lai lo. NLD CEC chungtel U Aung Kyi Nyunt nih BBC ah hitihin a chim.

“NLD hi nawlngeihnak hmangin hrawh khawh a si lo. A ruang cu mipi thinlung ah a nung cang” a ti.

U Aung Kyi Ngunt bia a hmaan tuk. Kum 2020 thimnak ah NLD an sung lai tiah ruah a si. An sungh lo hmanh ah 2015 lio bantuk cun an cak ti lai lo. Anmah lawngin cozah an ser kho ti lai lo hawikom a hawl a hau lai tiah ruah cio a si. Asinain thimnak a vun dih cu 2015 nakin teinak an hmuhning a sang deuh.

Ralhrang nih an duh tikah thimnak an tuah te lai. NLD cu a hrawh cang lai caah aa tel kho ti lai lo. An hrawh lo hmanh ah thimnak ah i tel kho lo in an tuah te lai.

Ralhrang nih Suh Kyi le a party NLD cu kan hrawh/kham khawh hna caah kan duhningin thimnak kan tuah lai i kan duhningin ram kan uk lai tiah chunmang an manh len lai.

Asinain mipi thinlung ah a thi cangmi an si caah an chunmang a tling lai lo. Suh Kyi le NLD hi ramkhel chungin an chuah hna a si zongah mipi nih lamdang an kawl ko lai.

The Chin Post