Ramdang Um Bochanmi Upa Pawl Tlung Ti Hlah Uh!!

Ramdang Ummi Hruaitu Tlung Ti Hlah Uh
==================================
CNA/CDF nih ramdang ummi miphun hawi cu i bochan a si. Ramdang ummi zong nih an i thei ko. A bomh zong an bomh hna. Lunglawmh awk taktak a si. A sinain mu, ka siarem lo mi pakhat te cu, USA in CBCUSA nih lamkal an thlah hna hnu in Khrihfabu Pastor te nih va tlawng cio an duh hna. Tulio kan rambuai ah hin India lei in a tomtom in Pastor te le upa ai timi an tlung thluahmah ko hna hi.

CNA/CDF ka veh aa timi Pastor te si hna seh, Upa aa timi si hna seh, zeitluk in dah Phaisa an dih lai timi cu tuak hau lo in a fiang tukmi a si ko. A va tlung i, zei ngaingai an tuah khawhmi a um lo. Khrihfabu phaisa maw, Bu phaisa lam an heu/pam ka ti. Buu phaisa lam a pam.

A vatlung i, Buu phaisa in a va langsar sawhsawh. Upatnak le an rak pek hna. CNA/CDF si hna seh, bomtu an si an ti hna i, an ngei lo chunte rawl an pek hna. Itnak ttha an pek hna. Ni fate ral a do mi tu an temtuar. Rawltam in an um. Laimi nih phaisa kan thawh kan timi kha ramdang lei in a rak tlungmi upa te nih an ei viar cang.

Pakhat le pakhat kan i cawng hna. Hi ti ning hin cun zei ral dah kan tei lai i? Zei ral hmanh kan tei lai lo. Cu caah ramdang ummi upa va tlung a herh lo. Nan tlungnak ding phaisa tu kha kua hna uh law, an ca hrang ah thathnemnak tampi a chuah pi lai.

Khrihfabu nih siseh, Buu dangdang nih siseh, upa te pawl kha nan phaisa in tlung ter ti hna hlah uh. An mah larnak ca le sunlawihnak sawhsawh an hman. An tuah khawhmi a um lo. USA in siseh, ramdang dang in a ho hmamh ral va do ding tung lo ah va tlung ti hlah. Kan nawl hna. Crd-Global Village News

Relchap, (photo Dang) Gangaw Ah Thil Caw Ding In A Chuakmi Palik 3 Cu PDF Nih An Kah Hna I, Palik 2 An Thi: Magwe ramṭhen, Gangaw peng Min khua palik sakhan in thil cawk ding ah a chuakmi palik 3 cu lampi ah rak bawh in kan kahdoh hna, tiah PDF-Gangaw(thlanglei) chungtel pakhat nih a chim. Nizaan July 30, chun suimilam 12:30 hrawng ahkhan palik 3 cu PDF nih an kah hna i, palik 2 cu an thi nain pakhat cu kuan hliamhma he a zaam, tiah theih a si.

“An ṭhutnak dawr chung ah kutser bomb 40 mm kan chehhnawh hna hnu ah kan kah hna. Auto meithal kan ngeih rih lo caah 40mm kutser bomb lung khat, 380 pistol pakhat le rifile pakhat he kan kah hna,” tiah PDF-Gangaw chungtel pakhat nih a chim. Palik sakhan lei nih cun minung 1 lawng a thi tiah thawng an thanh nain, kanmah PDF lei nih palik 2 ruak cu kan hmuh caah a thimi cu 2 an si tiah kan fehter, tiin PDF lei nih an chim.

Monkeypox Zawtnak Ruangah Ah A Thi Mi An Um Ṭhan Lengah Zawtnak A Ngei An Karh Chin Lengmang!: Spain le Brazil ram ah monkeypox zawtnak ruangah naite ah khan a an thi mi an um ṭhan i, Sapin i a thi hi Europe ram chung ah a voikhatnak a si, tiah theih a si. Spain ramchung ah zawtnak aa chawnh mi cu minung 3750 an um cang i cuchungah minung 120 cu siizung a phan, tiah Spain Ministry of Health nih an thanh.

Monkeypox zawtnak cu ngandamnak lei ah thinphang le zohkhenh hau zawtnak a si, tiah World Hlealth Organization(WHO) nih kan hnulei thla ah thawng a rak thanh cang bantuk in vawilei cung pumpi ah zawtnak aa chawnh mi minung 21,148 an um cang.

Mandalay Ramṭhen, Pyin Oo Lwin Ah Ruah Tam Ngai A Sur Caah Ti A Lian! Nizaan July 30, zaan in Mandalay ramṭhen ah ruahti tam ngai a sur caah Pyin Oo Lwin khuachung sang cheukhat ahcun ti a lian, tiah theih a si. Ruahti cu a tamtuk caah nihin July 31 zinglei suimilam 10:00 tiang ah tilian a zor kho lo, tiah sangchung ummi nih an chim. Motor cheukhat cu ti nih a phum i, meitung cheukhat zong an pur, tiah Pyin Oo Lwin meithat zung nih an thanh.

SAC Ralkap Umnak Shwebo University Gate Cu PDF Nih Drone In Bomb Thlakhnawh I, Ralkap 3 An Thi!: Sagaing ramṭhen, Shwebo university ah umhmun a khuarmi SAC ralkap gate cu drone in bomb kan thlakhnawh, tiah Black Wolf PDF nih an thanh. Shwebo university gate hngaktu SAC ralkap hna cu nizaan May 30, chunhnu suimilam 1:00 ahkhan tualchung hriamtlai phufonh nih drone in an doh hna. Cu kahdohnak ah cun SAC ralkap 3 an thi, tiah Black Wolf PDF in ṭuanvo ngeitu pakhat nih a chim.

Shwebo university gate ah umhmun a khuarmi SAC ralkap hna cu minung 15 hrawng an si i, lampi i aa chokmi hna sin in phaisa an hal tawn, tiah theih a si. Cu kahdohnak cu BLACK WOLF – PDF le Shwebo pengkomh battalion 5 ṭaṭ-khuai 1 nih an tuah mi a si. Kahdohnak ah cun tualchung hriamtlai phu lei hliamhma tuar um lo in hnu an tolh ṭhan, tiah theih a si.

Sagaing Ah Videographer Pakhat Cu SAC Ralkap Nih An Thah! Sagaing khuapi, Aungchainta(အောင်ချမ်းသာ) sang um mi, videographer pakhat Ko Aye Kyaw cu SAC ralkap nih nizaan July 30, zinglei suimilam 2 ahkhan an tlaih i an thah, a ruak zong lamkam ah an hlonh, tiah a chungkhar he naihniam in ummi nih an chim.

SAC ralkap nih lamkam ah an hlonh mi Ko Aye Kyaw ruak a hmutu tualchung mi nihcun siizung ah an kalpi i, mibawmchantu phu nih a ruak cu a inn ah an phanhter. SAC ralkap nih Ko Aye Kyaw an thah nak a ruang cu theih a si rih lo. Ko Aye Kyaw cu hmanthlak le vedio thlak in pawcawmnak rian a ṭuan mi a si i, khuapau dohthlennak i mizapi cawlcanghnak le lamzawhnak zong ah hman a thla tawn, tiah theih a si.

Myothar Industrial Hmun Pawng Ah SAC Mawtaw Bomb Puah An Tong I A Tlawm Bik Ralkap 10 An Thi! Mandalay ramṭhen, Thada-O-Myothar-Myinchian lam ah SAC ralkap mawṭaw pawl cu bomb puah an tong i, ralbawi tel in ralkap tam ngai an thi, tiah Red Dragon Guerillas Force-Myinchin nih an thanh. July 30 zing Sml 9 tluk ah Myothar in a rak chuak mi SAC mawṭaw ngan 4 cu Myothar industrial hmun pawng ah padeta bomb lung 5 in puahhnawh an si i, Mawtaw 2 cu bomb nih a khen caah ralkap zeimawzat an thi, tiah Red Dragon Guerillas nih cun an thanh.

Red Dragon Guerillas Force-Myinchin in ṭuanvo ngeitu nih cun, “Ralkap 10 an thih cu fiang in kan theih i, hliam tuar zong an tam ngai ko,” tiah a chim. Ruak le hliamtuar hna cu mawṭaw cung ah an khin hna i Myinchian lei ah an kalpi hna. Sii-ai le thlopbulnak an i tinzoh lo caah Myothra lei ah an kalpi ṭhan hna i ruak 7 cu sianginn ah an chiah ta hna, tiah theih a si.

Kayin Ramkulh Nithum Chung Kahdohnak Ah SAC Ralkap 100 Leng An Thi! Kayin ramkulh Myawady thlanglei, Shweayemyine (ရွှေအေးမြိုင်) khua lei ah rallam a sialtu SAC ralkap hna le Venom tualchung hriamtlai phufonh hna cu nizaan July 30, zinglei suimilam 11:00 hrawng ahkhan fak ngai in an i kap i, cu kahdohnak ah cun SAC ralkap 80 hrawng an thi. Tualchung hriamtlai phufonh lei in ralkap 3 nunnak a liam ve, tiah VENOM phu nih cathanh an chuah.

SAC ralkap ṭaṭ-mah 44 kuttang um ralkap hna cu Wawlay (ဝေါလေ) peng in rallam an sial i, Saw Win Myint hruai mi VENOM phu le Aye Sae Wa hruai mi Lion phu nih an kahdoh hna. July 27 in July 30 tiang kahdohnak a chuak i, cu kahdohnak ah cun SAC ralkap 100 hrawng an thih lengah zeimawzat hliamhma an tuar. Tualchung hriamtlai phu lei in minung 4 nunnak a liam, tiah an cathanh ah cun an ṭial.

Pesident Biden Cu Covid Zawtnak In A Dam Cang Tiah An Thanh Hnu In Covid Zawtnak A Ngei Ṭhan! US president Joe Biden cu covid zawtnak a ngeih hnu in a dam cang tiah theih a si nain, a voi hnihnak ah Covid zawtnak hmuh ṭhan a si, tiah ṭuanvo ngeitu hna nih July 30 ah an thanh. Kum 79 mi, president Biden cu a luancia July 21, ahkhan Covid zawtnak nih a rak tlak tiah White House nih a rak thanh. A luancia zarh, nihnih ni in ninga ni tiang a ngandamnak chek a si i Covid zawtnak in a thiang cang, tiah theih a rak si. Sinain nizan ah Covid zawtnak an hmuh ṭhan caah quarantine in a um ṭhan lai, tiah ṭuanvo ngeitu hna nih an chim.

Be the first to comment

Leave a Reply

Your email address will not be published.


*