Ram Dawtu Pasalțha Ralhrang Kut In A Paam Ai Ee ! Ram le miphun a dawtu kan bochanmi Pasalțha kan ralkap pakhat nih mual a kan liamtak

Ram Dawtu Pasalțha Ralhrang Kut In A Paam Ai Ee ! Ram le miphun a dawtu kan bochanmi Pasalțha kan ralkap pakhat nih mual a kan liamtak. Mual a kan liamtakmi kan Pasalțha hi chuahpi unau lak ah fa upa a si. Chungkhar i hringtu a nu hi mi dam lo a si caah chungkhar zohkhenhtu dingin Malaysia ah a kalmi a si. Malaysia a um lio ah chungkhar țha tein a cawmken a zohkhenh hna lengah dothlennak caah biatak tein țan a lami pa felfai a si.

Chin miphun dothlennak rian ah a langtlang in chawva thawh tiang lawng cu a lung aa tlinh tilo i a mipum hrimhrim in ram caah pumpek nunthap dingin Malaysia in a tlung i a chuahsemnak khua le a dawt cukmakmi hringtu a nu & pa hmanh hrui lo tein le kutnem chanh lo tein dothlennak hmunlipi a fuhpanh i ralkap training a kaimi Chin miphun ralkap a lutmi a si. A nu le a pa nih lailei a tlung ti thawng an theih in chungkhar thar dirh dingah nupi an halpiak i nupi țhit ding tiang an tawlrelpiakmi a si.

Sihmanhsehlaw kan ram le kan miphun nih a fekmi le a hmunmi daihnak federal zauk phung kan hmuh hlan lo le kan miphun nih mahte rorelnak phung kan hmuh hlan lo , ralhrang kan tei hlan lo cu ka rak tlungkho rih lai lo ee tiah hringtu a nu le a pa bia a tiammi miphun dawtu pasalțha a si. Nihin ah ram dawtu pasalțha a tlei thawngtheih cu thinlung a kekkuai dih, a celh in kan celh lo …

Pasalțha ramdawtnak lungput le chungkhar lei nih ton lai nicaan an hngahhlang ning hna ruah ah nihin kan kungtlungmi cu minung sinak nih ton aa harh ko … hringtu nu le pa an tuarfah laining ruah ko ah lung a fak thin a hung … zeican tiang ko hen hi tihin kan tuar rih lai ?? Maw Pathian hringtu nu le pa sin tuarzia thiamnak vun pe hna law, intuar khawhnak teinak țhawnnak pe ko sawh hna tiah chungkhar caah zaangfah nawlhal in thlaza ka cam.

Ram Dawtu Pasalțha nang cu na miphun caah na rian naa lim, vawlei ah nun man na ngei, nangmah an hringtu na nu & pa upat ka pek hna … kan miphun nih kan in philh hrimhrim lai lo, zalen ram kan ser ni ah na min kan rak țial lai mu … sian lo bu tein liam ai ko law …. A Sangbik Upatnak Kan In Pek … Salute !! Zunngaih Par UCCF, Camp Victoria A min le khua ka langhter lomi cungah theihthiam siseh.