Tuni Kahdohnak Ah Ralkap Tam Taktak An Thi

Monywa In A Chuakmi Ralhrang Mawtaw Bomb Puahhnawh An Tong I Ralhrang 10 Leng An Thi Monywa khuapi in Sagaing lei ah a kalmi ralhrang mawtaw 13 hna cu Min Moe peng ah voikhat, Sagaing peng ah voikhat bomb puahhnawh an tong i mawtaw pahnih an rawk, ralhrang 10 leng an thi tiah theih a si.

Tuni October 27, zinglei suimilam 5:00 Am hrawngah a chuak mi ralhrang mawtaw hna 13 cu 6:00 am hrawngah Min Moe peng Alakappa khua le Wan Pyih khua kar ah mipi vengtu ralkap hna nih bomb in an puahhnawh hna i mawtaw pahnih rawk, cun ralhrang 10 nak tlawm lo an thi lai tiah pawngkam thawnglatu hna nih an chim.

Ralhrang mawtaw bomb a puahhnawhtu hna hi zeibantuk dah an si ti theih an si lo. Mah Bomb puah a tong mi ralhrang mawtaw hna cu pehzulh in an kal i Sagaing peng, Natt Khayan khua pawngah zinglei Suimilam 6:30 hrawngah bomb an puahhnawh than hna. Hi zawn i a puahhnawhtu hna cu ralhrangbu dohtu People Army to Fight Dictatorship (PAFD) an si tiah theih a si.

Demosu kahdohnak ah ralhrang 10 hrawng an thi tiah KNDF nih a thanh Kaya ramkulhDemosu peng chungah nizaan October 26, zaanlei ah i kahdohnak a um i ralhrang 10 hrawng an thi tiah Kaya (Kayinni) ralkap (KNDF) nih cathanh an chuah. Demawhsu peng chung Thuilwinbila le Ngwe Taungkhuathar kar ah ralhrangbu le Kayinni ralkap (KA), KNDF cu nizaan zaanlei suimilam 2:30 hrawng tiang an i kap.

Ralhrangbu nih Demosu peng chung Kawi biaknak inn chay-ya-daw hmun pawngah umhmun khuar in minung umnak sangchungah hriamngan le hriamhme hmang in an kah tiah KNDF nih an cathanh ah an langhter. A luan cia ni tlawmpal chung zongah ralhrang phu nih hriamngan in an kah hna caah Moebe khuami minung pakhat a nunnak a liam, ngakchia pahnih tel in khuami minung 6 nih hliamhma an tuar tiah BBC nih a tial.

A voi 39 nak ASEAN Summit cu Oct 26, nizan ah thok a si cang. Tutan ah ASEAN chungtel ram 10 chungin Myanmar aiawhtu a bau ruangmang. Chungtel tling loin a voikhatnak an tuah a si. Tutan meeting ah US President amah pumpak in aa tel khawhmi hi lung a hmui ngai.

US President Joe Biden nih cun ASEAN Summit ah ralhrangbu nih hramhram a thiltuami vialte ngol ding, tlaihkhihmi vialte hna thlahpiak dih ding, ASEAN biakhiahnakl phun 5 zulh ding le democracy lei kar hlan ding timi bia a chim. A bik in ASEAN biakhiahnak phun 5 hna cu a tak in zulh ding le tuahsernak in langhter dingah US President Joe Biden nih cun a chim.

Be the first to comment

Leave a Reply

Your email address will not be published.


*