Ralzaam Bawmhnak Kongah India Cozah Hmurka A Chuak Rih Lo Kawlram buainak ruangah Mizoram ah a dor lio mi ralzaam hna bawmh dingin Mizoram cozah nih India cozah sin voi tam a hal cang nain India cozah sin in zeihmanh bia le hla a um rih lo tiah theih a si.
Mizoram state planning board vice chairman H. Rammawi nih Kawlram ralzaam hna bawmhnak pe dingin India cozah foreign le home ministry ah a si khawh chungin kan chim.Chief Minister zong nih prime minister sin ah ca a kuat cang.
A pek hna lai cu an rak ti peng.An kan pek te dingah kan ruah ve ko.Atu ah Mizoram ah a dor lio mi ralzam 20,000 hrawng an um. An dirhmun zong India cozah sin ah kan chim cang.Atu hi covid ruangah a rak lut mi an um tuk lo tiah a ti.
Atu hi Mizoram le Kawlram ramri Champhai district chung Tuipuiral area chungah ralzaam 1450 an um.Mah ralzam hna hi hmun dangdang in a rak ra mi hna an si i, Tuipuiral khua 21 lakah khua 19 ah ralzaam an um.
Ralzam cheukhat hi an chungle sin ah a um mi an um bantukin chungle khat a ngei lo mi hna cu YMA, MZP, Krihfabu le Khuami hna nih bawmhnak an pek hna, Mizoram cozah zong nih a si khawh chungin bawmhnak a pek ve tiah theih a si.
The Chin Post
Leave a Reply