Ralhrang nih nawlngeihnak an lak hnu ah kahdohnak a tu le a chuahnak hmun Kaya ramkulh in ralzaam hna a bawm tu nu pakhat cu an tlaih khawh lo caah a nu le a ta tel in minung 5 cu ralhrang phu hna nih tlaih in an kalpi hna tiah theih a si.
Thil a can ning cu”Volunteer tlangval pakhat cu zinglei thil a cawk ah, motor cung in kanmah ramlak ah hman mi rawlchumh nak um, emergency case le kedan hna an hmuh caah lunghrinh nan si tiah an tlaih.A voikhatnak ah an tlaih mi hi a phunphun in biahal in checkhlatnak an tuah lai kan zumh,kanmah PDF hruaitu ah an ruah caah kawlter mi a lo.Keimah cu kahdohnak a chuah thok in ralzaam sakhan ah ka um peng” tiah ralzaam hna a bawm tu kum-27 nu pakhat nih Mizzima ah a chim.
Ralhrang phu hna nih Loikaw khua chung an um nak inn ah kum-50 a si mi a nu,kum-23 a ta pa le kum tling rih lo in mibawmchan riantuan mi minung 3 cu August 14, chunhnu suimilam 2:00 hrawng ah an tlaih hna tiah theih a si.
“PDF bawmtu nan si tiah an tlaih hna ahcun zeihmanh chim ding a um lo. Zei he hmanh pehtlaihnak a um lo mi, ralzaam sawhsawh bawmtu tu bantukin an tuah mi hi ka lung a tha lo.Nai zongah hmundang ralzaam hna caah hlutmi facang tun 70,80 cu hitluk a tam mi ralzaam hna bawmhmi cu a si lai lo,tlaih khawh a si,thah khawh an si tiah a phunphun in an tlerhkhonh hna, hman zong an thlak dih ” tiah a chim chih.
Ralhrang nih nawlngeihnak duh lo in a doh tu khuami hriamtlai phu hna le nawlngeihnak la tu ralhrang phu hna kar kahdohnak a chuah nak Kaya ramkulh ah ralzaam dirhmun in a um mi,mipi hna cu an karh i, ralhrang phu hna nih phih khar piak ruang ah ralzaam dirhmun in a um mi hna caah eidin le sii-ai ah harnak an tong tiah ralzaam bawmchan tu hna nih an chim.
The Chin Post
Leave a Reply