Myanmar ram uknak hramhram in a chuttu ralkap council nih Mindat mino minung 5 an tlaih mi an thlah hna lo ca ah Ralkap Council le mizapi kar kahdohnak ngol ding in biakamnak an rak sermi cu a rawk cang i a herh ning in kan cawlcang than lai tiah CDF- Mindat tuanvo ngeitu nih 2021 May 12 ah a chim.
Ralkap council le CDF-Mindat hna karlak ah biakamnak an rak ser mi cu, CDF-Mindat lei nih”Tlaih a tongmi hna an dihlak nihin 2021 May 12 suimilaam 12:00PM hlan ah nan thlah hna lo ahcun, a hlan i biakamnak kan rak ser mi dihlak a rawk dih lai,” an rak ti. Hi an timi cung ah Ralkap Council lei zong nih, “Sami khuapi lei kal ding ralkap motor 13 hi Mindat khuapi chung in nan kalter ahcun kan tlaih mi hna dihlak kan thlah than hna lai,” tiah an leh ve hna nain an thlah hlei lo hna ca ah atu bantuk in Ralkap Council le CDF-Mindat karlak i biakamnak an ser mi a rawhnak hi a si.
Hi kong he pehtlai in CDF-Mindat chungtel upa pakhat nih, “Nihin zinglei sang ah Council lei upa cheukhat le CDF-Mindat upa cheukhat ton biaruahnak kan ngei. Hi bia kan i ruahnak ah ralkap lei nih, kanmah ralkap minung 200 Mindat khuapi chung umter nan kan sianh ahcun kan tlaih mi hna chung in minung 4 kan thlah hna lai. Minung pakhat bel cu mithat a si ca ah kan thlah lai lo an ti. Ralkap minung 200 khuachung umter ding cu a si khawh lo ca ah atu bantuk in a hlan i biakamnak kan ser mi kahdohnak ngol ding kha kan rawhter i a herh ning in cawlcangh kan i timh hi a si,” tiah The Hakha Post ah a chim.
Mindat khuapi chung ah 2021 April 24-27 tiang ralkap le mizapi karlak ah pehtlai in kahdohnak a chuak i mizapi lei nih ralkap minung 20 fai an thah hna. Cred : The Hakha Post
Leave a Reply